“Ala gue, ala sara si azo . . . aga adisciple”

1-2. (a) Ti gue oko na commandement ti Jésus so ayeke na Matthieu 28:18-20, kota kua so a mû na congrégation ti aChrétien ayeke so wa? (b) Ahundango ndo wa la e yeke bâ ande na yâ ti article so?

TERÊ ti abazengele adoit lani ti nzere mingi na ngoi so ala bungbi na terê ti mbeni hoto. Na peko ti so a zingo Jésus na kuâ, lo leke ti wara terê na adisciple ti lo na ndo so (Mat. 28:16). A yeke peut-être na ngoi so la “lo si na aita ahon 500 na ngoi oko”. (1 aCor. 15:6). Ngbanga ti nyen la Jésus ahunda na adisciple ti lo ti wara terê na lo kâ? A yeke ti mû na ala mbeni kua so ayeke pendere mingi. Lo tene na ala: “Tongaso ala gue, ala sara si azo na popo ti amara kue aga adisciple.”—Diko Matthieu 28:18-20.

² Adisciple so amä lani atënë ti Jésus so aga amembre ti congrégation ti akozo Chrétien. Kota kua ti congrégation so ayeke lani ti sara si azo mingi aga adisciple ti Christ.b Laso, wungo ti acongrégation ti atâ Chrétien na yâ ti dunia ayeke saki mingi mingi, nga kota kua ti ala ayeke gï oko kua so. Na yâ ti article so, e yeke bâ ahundango ndo osio so: Sarango adisciple ayeke kota kua mingi ndali ti nyen? Aye wa la a lingbi e sara ti sara adisciple? A-Chrétien kue alingbi ti mû maboko ti sara si mbeni zo aga disciple? Ngbanga ti nyen la sarango adisciple ahunda kangango bê?

SARANGO ADISCIPLE AYEKE KOTA KUA MINGI NDALI TI NYEN?

3. Ti gue oko na Jean 14:6 nga na 17:3, ngbanga ti nyen la kua ti sarango adisciple ayeke kota kua mingi?

³ Ngbanga ti nyen la kua ti sarango adisciple ayeke kota kua mingi? A yeke ngbanga ti so gï adisciple ti Christ la alingbi ti ga akamarade ti Nzapa. Na ndö ni, azo so amû peko ti Christ, gigi ti ala ayeke nzoni mingi laso nga ala yeke na beku ti duti ande na fini ti lakue lakue na yâ ti ngoi so ayeke ga. (Diko Jean 14:6; 17:3.) Biani, Jésus amû na e mbeni kua so ayeke kota mingi, me gï e oko la e yeke sara ni ape. Bazengele Paul atene na ndö ti lo wani nga na ambeni mba ti lo, lo tene: “E na Nzapa e sara kua oko.” (1 aCor. 3:9). So ayeke mbeni pasa la Jéhovah na Christ amû na azo so ayeke mbilimbili-kue ape!

4. Nyen la e lingbi ti manda na lege ti tapande ti Ivan na Matilde?

⁴ Kua ti sarango adisciple alingbi ti ga na e ngia mingi. Gbu li na ndö ti tapande ti Ivan na wali ti lo, Matilde, so ala yeke na Colombie. Ala fa tënë na mbeni maseka-koli so iri ti lo ayeke Davier, lo tene na ala: “Mbi ye ti changé, me mbi peut ape.” Davier ayeke lani boxeur, lo yeke nyon mbangi, lo yeke nyon sämba ahon ndö ni nga lo yeke vivre na Erika. Ivan atene: “E komanse ti manda Bible na lo na kete kodro ti lo so ayo mingi, ti si kâ a lingbi e kpe na vélo angbonga mingi na yâ ti popoto. So Erika abâ so sarango ye ti Davier nga na bango ndo ti lo aga nzoni ahon ti kozo, lo kue lo ga na yâ ti mandango Bible ni.” Mbeni ngoi na pekoni, Davier azia lege ti nyongo mbangi, ti nyongo sämba nga ti sarango boxe. Lo sara nga mariage na Erika. Matilde atene: “Na ngoi so Davier na Erika awara batême na ngu 2016, e dabe ti e so Davier ayeke tene lani, atene: ‘Mbi ye ti changé, me mbi peut ape.’ Terê ti e anzere lani mingi na ngu ti lê ti e asigi.” Kite ayeke dä ape so tongana e mû maboko na azo ti ga adisciple ti Christ, terê ti e ayeke nzere mingi.

AYE WA LA A LINGBI E SARA TI SARA ADISCIPLE?

5. Kozo ye so e doit ti sara ti sara adisciple ayeke nyen?

⁵ Kozo ye so e doit ti sara ti sara adisciple ayeke ti “gi” azo so aye ti hinga ye na ndö ti Jéhovah (Mat. 10:11). E yeke fa so e yeke biani aTémoin ti Jéhovah tongana e fa tënë na azo kue so e wara ala. E yeke fa so e yeke atâ Chrétien tongana e sara ye alingbi na commandement ti Christ ti fa tënë.

6. Nyen la e lingbi ti sara ti tene azo amä e?

⁶ A nzere na ambeni zo ti manda atâ tënë ti Bible, me ti ambeni mingi, na tongo nda ni, ala yeke na nzara ti mä e ape. Peut-être a lingbi e sara si ala wara nzara ti hinga atâ tënë ti Bible. Ti tene azo amä e, a lingbi e leke terê ti e nzoni. Soro atënë so alingbi ti nzere na azo so mo wara ala na fango tënë. Na pekoni, leke fason so mo ye ti komanse na lisoro ni.

7. Mo lingbi ti to nda ti lisoro na mbeni zo tongana nyen? Ngbanga ti nyen la mo pensé so a yeke kota ye ti mä azo nga ti bâ na nene ni bango ndo ti ala?

⁷ Na tapande, mo lingbi ti hunda na zo ni: “Mbi peut ti hinga bango ndo ti mo na ndö ti mbeni ye? Akpale mingi so e yeke wara laso, azo ti dunia kue ayeke wara nga ni. Mo pensé so e bezoin mbeni gouvernement oko so akomande dunia kue ti leke akpale ti dunia ni?” Na pekoni, mo lingbi ti sara lisoro na ndö ti Daniel 2:44. Wala mo lingbi ti hunda tënë so na mbeni zo: “Ti mo, nyen la ayeke mû maboko na zo ti fa na amolenge ti lo ti duti na anzoni sarango ye? Mo pensé a yeke nyen?” Na pekoni, sara lisoro na ndö ti Deutéronome 6:6, 7. Atâa tënë wa la mo soro ti sara lisoro na ndö ni, pensé na azo so ayeke mä mo ande. Pensé na anzoni ye so ala yeke wara tongana ala hinga ye so Bible afa biani. Na ngoi so mo yeke sara lisoro na ala, a yeke kota ye ti mä ala nga ti bâ na nene ni bango ndo ti ala. Tongana mo sara tongaso, mo yeke comprendre ala nzoni mingi nga ala lingbi ti mä mo.

8. Ngbanga ti nyen la a lingbi e ngbâ ti sara vizite na azo?

⁸ Kozo ti tene mbeni zo amû desizion ti manda Bible, peut-être a lingbi e mû ngoi nga e sara ngangu ti kiri ti bâ lo fani mingi. Ngbanga ti nyen? Ngbanga ti so peut-être na ngoi so e ga ti sara vizite na azo e yeke wara ala na yanga-da ape. Na ndö ni, peut-être mo bezoin ti ga fani mingi si zo ni ayeda ti manda Bible. Girisa ape so tongana a tuku ngu na terê ti mbeni keke lakue, a yeke maï. Legeoko nga, ndoye so mbeni zo ayeke na ni ndali ti Jéhovah na Christ alingbi ti maï tongana lakue e sara lisoro na lo na ndö ti Bible.

ACHRÉTIEN KUE ALINGBI TI MÛ MABOKO TI SARA SI MBENI ZO AGA DISCIPLE?

9-10. Ngbanga ti nyen la e lingbi ti tene so awafango tënë kue ayeke mû maboko ti wara azo so aye ti hinga ye na ndö ti Jéhovah?

⁹ Awafango tënë kue ayeke mû maboko ti wara azo so aye ti hinga ye na ndö ti Jéhovah. E lingbi ti haka kua so na gingo mbeni molenge so agirisa. Na lege wa? Gbu li na ndö ti ye so asi tongana mbeni molenge-koli ti ngu ota agirisa. Azo 500 tongaso akomanse ti gi lo. Na nda ni, ngbonga 20 na pekoni, mbeni zo so amû maboko ti gi molenge ni awara lo na yâ ti mbeni yaka ti nzo. Zo so awara molenge ni so ake ti tene azo agonda lo ndali ni. Lo tene: “Azo ngbangbo mingi la agi molenge ni juska awara lo.”

¹⁰ Azo mingi ayeke tongana molenge so agirisa so. Ala yeke na beku ape, me ala ye ti tene a mû maboko na ala (aÉph. 2:12). E kue so wungo ti e ahon kutu miombe, e yeke sara kua maboko na maboko ti wara azo so agirisa. Peut-être a yeke pëpe mo wani la mo yeke wara mbeni zo so aye ti manda Bible. Ye oko, ambeni wafango tënë so ayeke fa tënë na yâ ti oko territoire ti mo alingbi ti wara mbeni zo so aye ti hinga tâ tënë so ayeke na yâ ti Bible. Tongana mbeni ita awara mbeni zo so aye ti ga disciple ti Christ, azo kue so amû maboko ti wara lo ayeke na nzoni raison ti duti na ngia.

11. Même tongana mo yeke manda Bible na mbeni zo ape, mo lingbi ti mû maboko na kua ti sarango adisciple na ambeni lege wa?

¹¹ Même tongana mo yeke manda Bible na mbeni zo ape, mo lingbi ti mû maboko na kua ti sarango adisciple na ambeni lege nde. Na tapande, tongana afini zo aga na Da ti Royaume, mo lingbi ti yamba ala nga ti sara kamarade na ala. Tongana mo sara tongaso, mo lingbi ti mû maboko na ala ti hinga biani so ndoye so ayeke na popo ti e afa so e yeke atâ Chrétien (Jean 13:34, 35). Na ngoi ti bungbi, même tongana mo mû anduru kiringo tënë, a lingbi ti mû maboko na afini zo ti fa aye so ala mä na bê na ni na bê ti ala wani nga na nengo zo. Mo lingbi nga ti fa tënë legeoko na mbeni fini wafango tënë na ti mû maboko na lo ti sara kua na Bible ti fa ye na azo. Tongana mo sara tongaso, mo yeke fa na lo lege ti sara ye tongana Christ.—Luc 10:25-28.

12. Eskê e bezoin anzoni kode mingi ti sara adisciple? Mo tene tongaso ngbanga ti nyen?

¹² A lingbi e tene ape so e bezoin anzoni kode mingi si e mû maboko na azo ti ga adisciple ti Jésus. Ngbanga ti nyen? Gbu li na ndö ti tapande ti Faustina, so ayeke na kodro ti Bolivie. Na ngoi so lo wara terê lani na aTémoin ti Jéhovah, lo hinga ti diko mbeti ape. Fadeso, lo hinga ti diko mbeti kamême kete. Lo wara batême awe, nga a nzere na lo ti fa ye na azo. Mingi ni, yenga oko oko, lo yeke manda Bible na azo oku. Atâa so Faustina ayeke diko mbeti nzoni mingi ape tongana ti azo mingi so lo yeke manda Bible na ala, lo mû maboko na azo omene ti wara batême.—Luc 10:21.

13. Même tongana e yeke na kua mingi, ambeni nzoni ye wa la e lingbi ti wara na yâ ti kua ti sarango adisciple?

¹³ A-Chrétien mingi ayeke na gbâ ti akota kua ti sara. Me ala wara ngoi ti manda Bible na azo, nga a nzere na ala mingi ti sara ni. Na tapande, Melanie, so ayeke na Alaska, ayeke bata lani molenge ti lo ti wali ti ngu omene gï lo oko. Lo yeke nga lani na mbeni kua so amû ngoi ti lo mingi nga lo yeke bâ lege ti babâ ti lo so ayeke na kobela ti cancer. Melanie ayeke lani gï oko Témoin na yâ ti kete gbata so lo yeke dä so ayo mingi. Ndali ti so lo ye biani ti wara mbeni zo so aye ti manda Bible, lo yeke sambela lakue ti wara ngangu ti gue ti fa tënë atâa so dê ayeke sara mingi. Na nda ni, lo wara Sara, so terê ti lo anzere mingi ti hinga so Nzapa ayeke na iri. Ambeni ngoi na pekoni, Sara ayeda ti manda Bible. Melanie atene: “Na avendredi na lakui, mbi yeke fatigué ka mingi, me mbi na molenge ti mbi ti wali e yeke gue lakue ti sara étude ni na e wara anzoni ye dä. A nzere na e lani mingi ti gi akiringo tënë na ahundango ndo ti Sara nga ti bâ so lo ga kamarade ti Jéhovah.” Na mbeto ape Sara agbu ngangu na yâ ti kangango lege, lo quitté eglize ti lo na lo wara batême.

NDANI SO SARANGO ADISCIPLE AHUNDA KANGANGO BÊ

14. (a) Na lege wa la azo so ayeke sara kua ti sarango adisciple ayeke tongana azo ti gingo susu? (b) Atënë ti Paul so ayeke na 2 Timothée 4:1, 2 asara nyen na ndö ti mo?

¹⁴ Même tongana ade mo wara pëpe mbeni zo so aye ti ga disciple, ngbâ lakue ti gi azo so alingbi ti ga adisciple. Girisa ape so Jésus ahaka kua ti sarango adisciple na kua ti gingo susu. Azo ti gingo susu alingbi ti gi susu l’heure mingi si ala wara susu. Fani mingi ala sara kua na bï wala na kota ndapre, nga na ambeni ngoi ala gue ayo (Luc 5:5). Legeoko nga, ambeni zo so ayeke gi ti sara adisciple ayeke kanga bê ala mû l’heure mingi ti gi azo so alingbi ti ga adisciple na angoi nde nde nga na ando nde nde. Ngbanga ti nyen? Tongaso si ala lingbi ti wara azo mingi. Fani mingi azo so asara ngangu mingi ti gi azo so aye ti ga adisciple awara aye ti nzoni ndali ti so ala wara azo so atënë ti e agbu bê ti ala. Eskê mo lingbi ti gi ti fa tënë na mbeni ngoi so mo lingbi ti wara azo wala na mbeni ndo so mo lingbi ti wara azo dä?—Diko 2 Timothée 4:1, 2.

15. Ngbanga ti nyen la mandango Bible na azo ahunda kangango bê?

¹⁵ Ngbanga ti nyen la mandango Bible na azo ahunda kangango bê? Mbeni raison ni ayeke so e bezoin ti sara ye mingi ahon gï ti mû maboko na mbeni zo ti hinga aye so Bible afa nga ti ye ni. E bezoin nga ti mû maboko na zo ni ti hinga Jéhovah, Wa ti Bible, nga ti ye lo. Nga na ndö ti fango na zo ni ye so Jésus ahunda ti tene adisciple ti lo asara, e bezoin ti mû maboko na zo ni ti hinga tongana nyen ti sara ye alingbi na ni. Na ngoi so zo ni ayeke sara ngangu ti sara ye alingbi na amama-ndia ti Bible, a lingbi e kanga bê e mû maboko na lo. Ambeni zo so e manda Bible na ala, na yâ ti anze mingi ape ala wara lege ti changé fason ti pensé ti ala nga na aye so alï ngangu na yâ ti sarango ye ti ala; me ti ambeni, a mû ngoi mingi.

16. Nyen la tapande ti Raúl afa na mo?

¹⁶ Mbeni missionnaire na Pérou awara lani aye ti nzoni ndali ti so lo kanga bê. Lo tene: “Mbi manda lani buku use na mbeni koli so iri ti lo ayeke Raúl. Me lo ngbâ lani ti wara angangu kpale na yâ ti gigi ti lo. Lo yeke na akpale mingi na yâ ti mariage ti lo, lo yeke tene sioni yanga nga a yeke ngangu na amolenge ti lo ti ne lo. Lo yeke gue lakue na bungbi, tongaso mbi ngbâ lani ti gue ti bâ lo na ti mû maboko na lo nga na sewa ti lo. Ngu ota tongaso na peko ti so mbi wara lo, lo wara batême.”

17. Nyen la e yeke bâ na yâ ti article ti peko?

¹⁷ Jésus atene na adisciple ti lo ti “gue, [ti] sara si azo na popo ti amara kue aga adisciple.” Ti sara ye alingbi na atënë ti Jésus so, fani mingi e doit ti sara tënë na azo so fason ti pensé ti ala ayeke nde mingi na ti e; na popo ti ala, a yeke wara azo so ayeke na yâ ti mbeni bungbi ti nzapa ape wala so atene so Nzapa ayeke dä ape. Na yâ ti article ti peko, e yeke bâ tongana nyen la e lingbi ti fa nzoni tënë na ala.