Mandango buku Koli so ahon tanga ti azo kue
1 Na yenga ti lango 4 ti août 2008, fade e yeke manda buku Koli so ahon tanga ti azo kue na bungbi ti mandango buku ti kongregation. So tâ ngia si ayeke duti ti kiri ti bâ aye so asi na yâ ti fini ti Jésus nga kusala ti lo! Teti so buku ni ayeke nde kete na tanga ti abuku so e yeke manda ni, a yeke nzoni ti bâ akete wango so ge.
2 Teti so alembeti ti buku ni ayeke na anumero pëpe, a yeke zia na yâ ti Kusala ti Royaume kapa so afa achapitre so a yeke manda ni; mingi ni achapitre ota wala osio teti yenga oko oko. Achapitre 35, 111 nga na 116 ayo mingi, fade a kangbi yâ ni use si a manda ni. Na peko ti so mbeni ita so ahinga ti diko ye nzoni adiko chapitre ni kue awe (wala aparagraphe so ayeke na gbe ti mbeni kete li ti tënë tongana ti achapitre 35, 111 nga na 116), fade ita so amû li ni ayeke hunda atënë so ayeke na hunzingo ti chapitre ni; ahundango tënë so ague oko na chapitre ni wala mbage so a londo ti diko ni. Akiringo tënë ni ayeke gi lakue na peko ti tere pëpe na yâ ti chapitre ni. Fade akiringo tënë so ayeke nduru na polele aluti gi na ndo ti aye so a fa na yâ ti achapitre ni.
3 Na pekoni, tongana ngoi angbâ, a lingbi ti diko aversê kue so a fa atënë ti yâ ni pëpe so ayeke na hunzingo ti chapitre ni. A lingbi ti kangbi nduru nduru aversê so ayo mingi ti mû maboko na awafango nde nde ti diko ni, na pekoni a lingbi ti sara tënë na ndo ni. Na lege ti ahundango tënë so ayeke polele na so lo leke ni nzoni, fade ita so amû li ni ayeke mû maboko na e ti bâ kamba so ayeke na popo ti aversê ni na angbongboro tënë ti yâ ti buku ni. A yeke nzoni ahundango tënë nga na atënë kue amû maboko na azo so aga na bungbi ni ti zia lê ti ala na ndo ti Jésus, fini ti lo nga na afango ye ti lo.
4 Buku Koli so ahon tonga ti azo kue afa na peko ti tere aye so asi na yâ ti fini ti Jésus. Ti bâ aye nde nde so asi na ti bata na li ndo so aye ni asi dä ayeke mû maboko na e nzoni ti dabe ti e na ni. Na ndo ni, bâ nzoni afoto na kiri lakue na ndo ti karte so ayeke na tongo nda ti buku ni, na peko ti akozo tënë.
5 Na kozo yenga ni, fade a yeke manda atënë ti tongo nda ti buku ni. Na peko ti so a diko aparagraphe kue so ayeke na gbe ti kete li ti tënë, fade ita so amû li ni ayeke hunda atënë so lo leke ni nzoni. Ye so a yeke duti gere ti mandango ye teti ngu so ayeke ga. Fade aye ti nzoni mingi ayeke duti na ngoi ti mandango ye so tongana azo kue so aga aleke tere nzoni. A yeke nzoni ita so amû li ni aleke tere ti lo nzoni yenga na yenga tongaso so si lo mû maboko na azo ti groupe ni ti hinga nzoni koli so ahon tanga ti azo kue, Seigneur na Sauveur ti e, Jésus Christ.