Azo wa la ayeke sara laso ye so Jéhovah aye?
1. Lawa la e yeke to nda ti manda brochure Azo wa la ayeke sara laso ye so Jéhovah aye? na ye ti nzoni wa e lingbi ti wara dä?
1 Ti to nda ni na yenga ti lango 28 ti nze ti octobre, e yeke manda ande brochure Azo wa la ayeke sara laso ye so Jéhovah aye? na Mandango Bible ti Congrégation. A sigigi na fini brochure so na Kota Bungbi ti District ‘Bata bê ti mo!’, ndani a yeke ti mû lege na azo so e manda Bible na ala ti ga na bungbi ti Jéhovah. Mandango brochure so ayeke sara si e kiri e bâ na nene ni mingi pasa so e yeke na ni ti duti na yâ ti bungbi ti Jéhovah, na ndo ni, a yeke mû nga ande maboko na e ti sara kusala na ni nzoni na fango tënë.—Ps. 48:14.
2. Tongana nyen la a yeke manda ande brochure so na yâ ti congrégation?
2 Lege ti manda ni: A yeke nzoni ti tene ita so amû li ni akangbi yâ ti ngoi so lo yeke na ni si angbongboro tënë ti ye ti manda oko oko asigigi polele. Lo yeke fa oko na oko ali ti tënë ti aye ti manda 28 so a yeke ahundango tënë. Na pekoni, lo yeke hunda na ita so ayeke diko ni ti diko paragraphe ti tongo nda ni. Nga zo so ayeke mû li ni ayeke hunda na aita mbeni hundango tënë so lo leke teti tënë ti tongo nda ni. Na pekoni, a lingbi a diko ambage oko oko so ato nda ni na atënë so a sû ni vuko vuko nga a sara lisoro na ndo ni nde nde. Na peko ti so a diko mbage ni so awe, ita so amû li ni ayeke hunda na aita ti fa tongana nyen mbage ni so akiri tënë na hundango tënë so ayeke li ti tënë ti ye ti manda ni. Atapande mingi ayeke na yâ ti brochure so nga, a lingbi a sara tënë na ndo ni. Tongana lege a yeke dä, a lingbi a diko aversê so aluti na ndo ti kota tënë ni. Kozo ti hon na ye ti manda ti peko, ita ni ayeke hunda atënë ti dango bê so ayeke na gbe ti lembeti ni. Tongana encadré “Ye so mo lingbi ti sara” ayeke dä, a lingbi ita so adiko aparagraphe a diko nga ni, na pekoni ita so ayeke mû li ni ayeke hunda na aita ti fa tongana nyen mbeni wamandango Bible alingbi ti wara ye ti nzoni na mungo peko ti wango so. Na hunzingo ti mandango ye ni tongana ngoi angbâ, ita so amû li ni alingbi ti sara kusala na ali ti tënë ti aye ti manda ni tongana ahundango tënë ti dango bê. Zia e hinga so kode so ayeke ti manda na Bible pëpe na azo na yanga-da ti ala.
3. Tongana nyen la e lingbi ti wara ye ti nzoni mingi na lege ti mandango brochure so?
3 Ti wara ye ti nzoni dä mingi, leke tere nzoni kozo ti ga na bungbi ni. Sara kue ti mû mbage dä na kiringo tënë. Na ngoi ti mandango ye ni, gi ti bâ tongana nyen brochure ni alingbi ti ga na ye ti nzoni na awamandango Bible. Zia si mandango brochure so amû lege na e ti mû maboko na ambeni zo ti ga ti bungbi oko na e ti sara ye so bê ti Nzapa aye si ala kue alingbi ande ti wara fini ti lakue lakue.—1 Jean 2:17.