E Bi Bê na Tene ti Jéhovah Lâ Oko Oko
1 Lâ oko oko so ayeke hon, a yeke sala ngangu na mabe ti e. Mbeni kamarade ti ndo ti kusala, so ayeke na kode mingi ti gboto zo, atisa mo na mbeni lakui gi mo na lo use; mbeni wafango ye awa mo ti gi ti si na mbeni ndo ti kua so ayeke kota; patron ti mo ahunda na mo ti gboto yâ ti angbonga ti kua ti mo; wala seni ti mo ayeke ga na mo agingo bê. Amara ti tara tongaso alingbi ti si na ngoi kue, me e yeke gi e oko pepe. Jéhovah ayeke na nzala ti mu na e ndara so alingbi si e luti na gbele atara so. Bango versê ti lâ oko oko na commentaire ni na yâ brochure Gingo Nda ti Tene ti Nzapa Lâ Oko Oko ayeke mbeni nzoni lege ti te kobe ti Tene ti Nzapa lakue lakue. Mo yeke wara nzoni na lege ti lekengo ye so?
2 Mungo maboko so a zia na gbele e: Isaïe 30:20 (NW) ahiri Jéhovah “Kota Wafango ye” so awakua ti lo ayeke ga ndulu na lo ti wara mungo maboko. Lo yeke mu na e tâ ye so alingbi na e ti luti na gbele atara. Tongana nyen? Versê ti pekoni atene: “Fade mê ti i amä yanga na peko ti i, so atene, So ayeke lege ni, i tambela dä.” Laso, Jéhovah ayeke fa “tene” ti lo na lege ti Bible nga na ambeti ti “ngba ti be-ta-zo na ti ndara.” (Mat. 24:45, NW) A-article ti Tour ti Ba Ndo so asigigi na yâ angu so ahon ayeke na mbeni kota wungo ti ndara mingi so andu ndulu na ambage kue ti fini ti Chrétien. Tongana e kiri e diko ala so afa ni na yâ brochure Gingo, e yeke bata mbeni wungo ti hingango ye so ngele ni ayeke ngangu mingi na yâ atara nde nde.—Es. 48:17.
3 E bata mbeni ngoi: Atä so lo yeke na aye mingi ti sala na ndapelele, mbeni mama ti sewa aglisa lâ oko pepe ti diko na ti sala lisoro na molenge ti lo na ndo versê na commentaire ni, na ngoi ti nyongo kawa ti ndapelele. Atene so nga na sambela ayeke atanga ti atene so molenge ni ayeke mä lâ oko oko kozoni ti gue na ekole. Ala mu maboko na lo ti luti na gbele atara ti salango pitan, ti ke ti sala beoko na tene ti kodoro na ti sala tene ti mabe ti lo na wâ na gbele akamarade na awafango ye ti lo. Atä so lo duti gi oko Témoin ti ekole ni kue, lo ba tele ti lo gi lo oko lâ oko pepe.
4 E gi fango lege na wango ti Jéhovah na ti Tene ti lo. Tongaso, lo yeke duti ande mbeni tâ zo na yâ fini ti e, tongana mbeni ndeko so alingbi a zia bê na lo. E gi lo lâ oko oko! Na tele ti azo kutu mingi so ayeke gi wango na yâ Mbeti ti Nzapa lâ oko oko, e leke lê ti e ti ‘ba Kota Wafango ye na e.’