Mbeti-kapa ti sewa: Versê ti lâ oko oko
1 Ababâ na mama ti ndoye ayeke sala ngangu mingi ti mû nzoni kobe na amolenge ti ala lâ oko oko. Ti mû na ala kobe ti yingo so alondo na Mbeti ti Nzapa ayeke biani kota ye mingi (Mat. 4:4). Mbeni lege ti mû maboko na amolenge ti mo ti maï nzara ti ala teti aye ti yingo na ti ‘kpengba na lege ti tënë ti Nzapa si a sö ala’, a yeke ti mû lâ na lâ angoi ti sala lisoro na ndo versê ti lâ oko oko (1 Pi. 2:2, Fini Mbuki, 2001). Na ngoi wa mo lingbi ti zia ni na yâ ti mbeti-kapa ti mo?
2 Angoi ti tengo kobe: Ti to nda ti lango ni na salango lisoro na ndo versê ti lâ oko oko ayeke mû maboko na sewa ni ti bi bê na Jéhovah na yâ ti lango ni kue (Ps. 16:8). Mbeni mama ti sewa asoro ti sala lisoro na ndo versê ti lâ oko oko na molenge ti lo ti koli na ngoi ti nyongo kawa ti ndapelele, na lo yeke sambela na molenge ni kozoni si lo gue na ekole. Ye so amû lani maboko na molenge ni ti bele pëpe tënë ti mabe ti lo na gbele atënë ti vorongo kodoro, a mû lege na lo ti luti na gbele tara ti salango aye ti pitan nga ti fa tënë na mbito pëpe na a-élève nga na awafango mbeti. Atâa so a yeke gi lo si ayeke oko Témoin na ekole ni so, lâ oko pëpe lo bâ tele ti lo so lo duti gi lo oko.
3 Tongana lege ayeke dä pëpe ti sala lisoro na ndo versê ti lâ oko oko na ndapelele, mo lingbi ti sala ni na mbeni ngoi nde na yâ ti lango ni. Peut-être na ngoi ti tengo kobe ti lakui. Ambeni nga ayeke sala lisoro na ndo aye so asi na yâ kusala ti fango tënë nga na ambeni nzoni tënë so ala wara ni na dikongo Bible ala mveni na oko ngoi ni so. Na ngia, mingi ni adabe ti ala na angoi ti tengo kobe ti lakui tongana mbeni ngoi so sewa ni awara ngia dä mingi.
4 Kozoni ti gue na gbogbo: Ti ambeni sewa, nzoni ngoi ti sala lisoro na ndo versê ti lâ oko oko ayeke ti sala ni kozoni ti gue na gbogbo. So nga alingbi ti duti mbeni pendere ngoi ti sambela legeoko na sewa. Tongana amolenge ti mo ayeke mä go ti mo lakue na salango tënë na ndo Jéhovah nga na sambelango lo, lo yeke ga tâ zo biani na lê ti ala.
5 Zia Jéhovah ahiri deba nzoni na ndo angangu so mo yeke sala ti yôro tâ tënë na yâ ti amolenge ti mo tongana mo yeke sala kusala nzoni na brochure Gingo nda ti Tënë ti Nzapa lâ oko oko.