E Yeke Fa Nzo Tene
1 So mbeni pendere matabisi so e wara, ti yö “anzo tene ti aye ti nzoni.” (aRom. 10:15, NW) E yeke na mbeni tokua, so adë bê, ti kangbi na azo so akpale ahon ndo ti ala na asala si ala nze. Tongana nyen e lingbi ti mu maboko na ala ti hinga so e yeke mu na azo “nzo tene ti nzoye.”—Es. 52:7.
2 Leke mbeni tokua ti nzoni: Fade alisoro ti e na yâ fango tene ayeke sala nzoni ye na ndo azo tongana e luti mingi na ndo aye ti nzoni. Tongaso, na ngoi so e yeke leke fango ye ti e nga e yeke ba ambeti so e yeke fa ande, a lingbi e gboto lê na ndo anzoni mbage ti tokua ni. Na kangbingo beku ti e so aluti na ndo Bible na bê kue nga na wâ, e lingbi ti wara aye ti pekoni so akpengba zo.—aProv. 25:11.
3 Atä so e yeke kangbi mawa na azo tongana ala fa na gigi tongana nyen dutingo ti sese, so aga sioni mingi ahon, asala ye na ndo ala, a lingbi e fa na ala tâ yorö ti akpale ti zo, Royaume ti Nzapa. Atä e yeke sala tene na ndo “lâ ti futango kula” so aga fadeso ndulu mingi, e ye ti fa na awamango e so biani a yeke “nzo tene na azo ti be-ti-molenge.” (Is. 61:1, 2, NW) E lingbi ti dë bê ti awamango e na fango na ala so ye kue so Jéhovah asala ayeke ga ande na ye ti nzoni ahon, nga na nda ni, ngia ti kota ahon.
4 Fa tâ tene na tâ ngia: Tongana azo aba so e yeke na ngia nga so e sala tene na bê kue, ala yeke ndulu mingi ahon ti mä e. Tongana awamango e aba beku na lê ti e, fade ala yeke hinga so e “duti na ngia na yâ beku.” (aRom. 12:12) Na lege so, ala lingbi ti duti ndulu mingi ahon ti yeda na nzo tene. Tâ tene, e yeke na nzoni nda ti tene ti fa lakue mbeni bango ndo so ayeke na beku, na ti duti na ngia na yâ ambage nde nde kue ti kusala ti e.
5 Teti e yeke awakua ti nzo tene, e sala ye ahon gi ti mu sango na azo. Fango tene ti e akangbi mbeni tâ beku ti fini ti nzoni ahon, teti laso nga teti ngoi ti kekereke. (1 Tim. 4:8) Bibe ti e ti nzoni ayeke sigigi ande polele na yâ ye so e yeke tene, ye so fade amu maboko na awamango e ti yeda na nzo tene. Na bingo bê na ndo ye so e yeke tene nga na ndo lege so e yeke fa ni, fade e wa azo ti be-ti-mbilimbili ti yeda na nzo tene so e yeke fa.