Hunda Maboko so Mo Ye ti Wara

¹ Tene “ti ngangu,” so asû na gbe ti yingo ti Nzapa, alingbi biani na ngoi ti e ti kpale. (2 Tim. 3:1, NW) Tongaso, mo lingbi ti sala nyen tongana mo yeke wara akpale so aye ti buba mo na lege ti yingo na mo ba so mo lingbi pepe ti luti na gbele ni?

² Mo yeda ti sala tene na mbeni zo ti kongrégation so ayeke biazo na lege ti yingo? Ambeni zo ayeke ku peut-être kete ti sala tongaso teti ala gi bê ti ala, ala ye pepe ti so li ti aita, wala ala dë kite so mbeni zo alingbi biani ti mu na ala maboko. Tâ tene, a lingbi e sala ngangu ti yö akungba ti e mveni alingbi na ngangu ti e; me, a yeke nzoni e ku lâ oko pepe ti gi maboko na yâ atene so andu dutingo nzoni ti e na lege ti yingo.​—aGal. 6:2, 5.

³ Ndo ti tongo nda ni dä: Peut-être mo ye ti ga ndulu na zo so amu li ni na mandango buku ti mo na ti hunda wala mo lingbi ti sala kusala legeoko na lo na yâ fango tene. Fade ye so ayeke mu lege na mo ti fa na lo nzala ti bê ti mo ti maï na lege ti yingo. Tongana lo yeke mbeni serviteur ti mungo maboko, fa na lo bezoin ti mo ti wara maboko na lege ti yingo na fade lo hunda mbeni ancien ti mu maboko na mo. Wala mo lingbi ti sala tene na mbeni oko ti a-ancien ti kongrégation ti mo na ndo akpale so asi na mo.

⁴ Mara ti maboko wa mo ye? Mbeni ye ayeke kiri na wâ ti mo na peko? Mo yeke mbeni babâ wala mama so ayeke gi lo oko, so asala ngangu ti bata amolenge ti lo na yâ tâ tene? Mo yeke mbeni mbakoro so ahunda maboko? Wala mbeni kpale ayeke dä so asala si mo nze? Lege ti sala ye na gbele ngoi ti e ti ngangu ayeke kete ye pepe, me a lingbi ti hon ndo ni. Mo lingbi ti wara maboko dä.

⁵ Lege so a-ancien alingbi ti mu maboko na mo: A-ancien ayeke bi bê biani na ndo azo. Ala yeke dengi mê ti mä ande atene ti bê ti mo. Tongana ambeni wafango tene nde ayeke nga na mara ti kpale tongaso, fade a-ancien ayeke bi bê dä na ngoi so ala yeke sala vizite pastorale nga ala yeke fa ye na kongrégation. Teti ala yeke “tapande ti kundu ni,” ala yeke ndulu lakue ti sala kusala na ngia na tele ti mo. (1 Pi. 5:3) Na lege ti awango so aluti na ndo akpengba-ndia ti Bible, aita-koli so ahinga kusala nzoni alingbi ti mu maboko na mo ti sala kusala ti fango tene nzoni ahon nga ti mu maboko na mo na yâ fini ti mo ti lâ oko oko.​—2 Tim. 3:16, 17.

⁶ Jésus amu na e “amatabisi so akoli ayeke na popo ni.” (aÉph. 4:8, NW, kete tene.) So aye ti tene a-ancien ayeke dä teti mo. Ala yeke ndulu ti mu maboko na mo. Biani, ala ‘yeke ti mo.’ (1 aCor. 3:21-23) Tongaso, a hon ti gbanzi tele, sala tene na ala. Hunda maboko so mo ye ti wara.