“Ala bata angasangbaga ti Nzapa so lo zia na maboko ti ala”
“Ala bata angasangbaga ti Nzapa so lo zia na maboko ti ala; zia a gbu ala gbungo na ngangu pëpe ti sara ni, me zia ala sara ni na bê ti ala wani.”—1 PI. 5:2.
1. Ngbanga ti nyen Pierre aye ti kpengba amba ti lo aChrétien na ngoi so lo sû kozo mbeti ti lo?
BAZENGELE PIERRE asû kozo mbeti ti lo ngoi kete kozoni si Néron ato nda ti sara ye ti ngangu na aChrétien ti Rome. Pierre aye lani ti kpengba amba ti lo aChrétien. Zabolo “ayeke tambela” ti gi aChrétien ti te ala. Ti dö sese na lo, a lingbi ala “zia li ti ala kpô” nga “ala sara tere ti ala kete na gbe ti ngangu maboko ti Nzapa”. (1 Pi. 5:6, 8). A lingbi ala ngbâ nga beoko. A lingbi ala tiri na popo ti ala pëpe. Ndali ti so tongana ala ‘te tere na ala sara sioni na mba’, a yeke sara si ala “futi tere na popo ti ala”.—aGal. 5:15.
2, 3. Zo wa la e yeke tiri na lo? Aye wa e yeke bâ na yâ ti article so nga na ti so ayeke ga na pekoni?
2 Laso, e nga kue e yeke na gbele mara ti ye tongaso. Zabolo ayeke gi ti te e (Apoc. 12:12). Nga na yâ ti kete ngoi mbeni “kota ye ti vundu ayeke si, ye ti vundu so mara ni ade ti si lâ oko pëpe ngbene ye so dunia abâ gigi juska fadeso”. (Mat. 24:21). Tongana ti so a lingbi akozo Chrétien akpe ti papa na popo ti ala, a lingbi e nga kue e kpe ti papa na popo ti e. Ti sara tongaso, ngoi na ngoi e yeke na bezoin ti a-ancien so alingbi.
3 Zia e bâ tongana nyen a-ancien alingbi ti bâ na nene ni mingi ahon ti kozo kusala ti ala ti batango “angasangbaga ti Nzapa so lo zia na maboko ti ala”. (1 Pi. 5:2). Na pekoni, e yeke bâ nzoni lege ti sarango kusala ti berger. Na yâ ti article ti peko, e yeke bâ ande tongana nyen azo ti yâ ti congrégation alingbi ti ‘ne azo so ayeke sara kua ngangu na ayeke fa lege’ na kundu ni (1 aThes. 5:12). Gbungo li na ndo ti atënë so ayeke mû maboko na e ti dö sese na kota Wato ti e, na hingango so lo la e yeke tiri na lo.—aÉph. 6:12.
Ala bata angasangbaga ti Nzapa
4, 5. A lingbi a-ancien abâ angasangbaga tongana nyen? Mû mbeni tapande.
4 Pierre awa a-ancien so ayeke na popo ti akozo Chrétien ti duti na bango ndo ti Nzapa na ndo ti angasangbaga so lo zia na maboko ti ala. (Diko 1 Pierre 5:1, 2.) Atâa so a bâ lo lani tongana mbeni zo so ayeke gbu congrégation na nduzu, na yâ ti sarango tënë ti Pierre lo bâ a-ancien tongana ambumbuse zo pëpe. Lo mû wango na ala tongana amba ti lo a-ancien (aGal. 2:9). Na tapande ti Pierre, laso Bebungbi ayeke wa a-ancien ti sara ngangu ti sara kota kusala ti ala so ayeke ti batango angasangbaga ti Nzapa.
5 Pierre atene so a lingbi a-ancien ‘abata angasangbaga ti Nzapa so lo zia na maboko ti ala’. A yeke nzoni ti tene ala hinga so angasangbaga ni ayeke ti Jéhovah na Jésus Christ. A-ancien ayeke kiri tënë na ndo ti lege so ala yeke bâ ndo na ndo ti angasangbaga ti Nzapa. Tara ti bâ so mbeni kamarade ti mo ahunda na mo ti bâ ndo na ndo ti amolenge ti lo na ngoi so lo hon. Mo yeke bâ ande lege ti ala nzoni pëpe nga mo yeke mû kobe na ala pëpe? Tongana mbeni atï kobela, mo yeke gue na lo na hôpital pëpe? Legeoko nga, a-ancien ti congrégation ayeke “bata congrégation ti Nzapa, congrégation so lo vo na mênë ti Molenge ti lo wani.” (Kus. 20:28). Ala girisa pëpe so Jéhovah avo ngasangbaga oko oko na mênë ti Jésus Christ so ngere ni ayeke kota mingi. Teti so a-ancien ahinga so ala yeke kiri tënë na Nzapa, ala yeke mû kobe na angasangbaga ni, ala yeke bata ala nga ala yeke bâ lege ti ala.
6. Kusala ti aberger ti ngoi ti giriri ayeke so wa?
6 Gbu li na ndo ti akusala so aberger ayeke sara na ngoi ti giriri. A lingbi ala tambela na gbe ti lâ nga na yâ ti dê na bï ti bata angasangbaga ti ala (Gen. 31:40). Ala yeke zia même fini ti ala na lê ti kuâ ndali ti mbeni ngasangbaga ti ala. David so ayeke berger na ngoi so lo de maseka asö angasangbaga ti lo na maboko ti anyama ti ngonda, so na popo ni a yeke wara bamara na ours. Na ndo ti anyama so oko na oko, David atene ni ‘gbu kuä ti ngbangba ti lo, ni pika lo, na ni fâ lo.’ (1 Sam. 17:34, 35). Biani lo sara ye na mbeto pëpe! Atâa so a lingbi lo ga tâ nduru na yanga ti nyama ti ngonda ni ti tiri na lo, lo kiri na peko pëpe, lo sara kue ti sö angasangbaga ti lo.
7. Tongana nyen la a-ancien alingbi ti zi mbeni ngasangbaga na yanga ti Satan na lege ti fä?
7 Laso, a lingbi a-ancien asara hange na Satan so ayeke gi ti gbu azo tongana mbeni bamara. Ye so alingbi ti hunda ti sara ye na mbeto pëpe ti zi mbeni ngasangbaga na yanga ti Zabolo na lege ti fä. Ala lingbi ti sara tënë na aita so lê ti ala akpengba pëpe, so Satan ayeke gboto ala ti tene ala tï na yâ ti akûkû ti lo. (Diko Jude 22, 23.) Tâ tënë, a-ancien ayeke sara ye so grâce na mungo maboko ti Jéhovah. Ala yeke sara ye na ndoye na mbeni ngasangbaga so awara kä. Ti sava kä ni, ala yeke sara kusala na Mbeti ti Nzapa so ayeke tongana mbeni pommade ti dë bê ti lo.
8. A-ancien ayeke gue na angasangbaga na ndo wa? Ala yeke sara ni tongana nyen?
8 Mbeni berger ayeke gue nga na angasangbaga ti lo na mbeni nzoni ndo so pere na ngu ayeke dä. Legeoko nga, a-ancien ayeke fa lege ti congrégation na angasangbaga ni, ala yeke wa ala ti gue lakue na abungbi tongaso si ala te ye nzoni nga si ala wara “kobe ti ala na ngoi ni so alingbi.” (Mat. 24:45). A lingbi ti hunda na a-ancien ti mû ngoi mingi ti mû maboko na aita so ayeke na kobela na lege ti yingo ti yeda na nzoni kobe so ayeke na yâ ti Mbeti ti Nzapa. Mbeni ngasangbaga so agirisa alingbi ti gi ti kiri na yâ ti kundu ni. Ahon ti zia mbeto na yâ ti ita ti ala, na ndoye a-ancien ayeke fa na lo na yâ ti Bible aye so Nzapa ahunda nga ala yeke fa na lo lege ti sara ye alingbi na ni na yâ ti fini ti lo.
9, 10. Tongana nyen la a-ancien alingbi ti bâ lege ti azo so ayeke na kobela na lege ti yingo?
9 Tongana tere ti mo ason, mo ye mara ti docteur wa? Mo ye mbeni docteur so ayeke mû gi ngoi kete ti mä mo na so ayeke gi gi hio ti fa na mo yorö so mo lingbi ti mû tongaso si mo hon na lo bâ mbeni zo ti kobela nde? Wala mo ye ti bâ mbeni docteur so ayeke mû ngoi ti mä mo, so ayeke fa na mo kobela ti mo nga na aye so mo lingbi ti sara ti wara sava?
10 Legeoko nga, a-ancien alingbi ti dengi mê ti mä mbeni ita so ayeke na kobela na lege ti yingo na ti mû maboko na lo ti wara sava. Tongaso, na lege ti fä ala “sara mafuta na tere ti lo na iri ti Jéhovah.” (Diko Jacques 5:14, 15.) Legeoko tongana baume ti Galaad, Mbeti ti Nzapa alingbi ti sara nzoni na zo ti kobela (Jér. 8:22; Ézéch. 34:16). Tongana zo ti kobela ni asara ye alingbi na andia ti Bible, a lingbi ti mû maboko na lo ti kiri ti sara na Jéhovah na bê ti lo kue. Biani, a-ancien ayeke sara nzoni mingi tongana ala dengi mê ti mä mbeni ngasangbaga so ayeke fa na ala agingo bê ti lo nga ala sambela na lo.
A gbu ala gbungo na ngangu pëpe me ala sara na bê ti ala wani
11. Nyen la apusu a-ancien ti sara kusala ti batango angasangbaga ti Nzapa na bê ti ala wani?
11 Pierre akiri adabe ti a-ancien na ndo ti lege so a lingbi ala sara na kusala ti berger nga ye so a lingbi ala sara pëpe. A-ancien so ayeke bata angasangbaga ti Nzapa, a yeke nzoni “a gbu ala gbungo na ngangu pëpe ti sara ni, me zia ala sara ni na bê ti ala wani”. Nyen la apusu a-ancien ti sara kusala na aita ti ala na bê ti ala wani? Biani, nyen la apusu lani Pierre ti sara kusala ti batango angasangbaga ti Jésus na ti mû kobe na ala? Kota ye ni ayeke ndoye so lo yeke na ni teti Seigneur (Jean 21:15-17). Ndoye apusu a-ancien ti duti na “fini ndali ti ala wani mbeni pëpe, me ndali ti lo so akui ndali ti ala”. (2 aCor. 5:14, 15). Ndoye so a-ancien ayeke na ni teti Nzapa nga teti aita ti ala apusu ala ti mû ngangu ti ala, mosoro ti ala nga na ngoi ti ala ti sara kusala ndali ti angasangbaga ni (Mat. 22:37-39). A gbu ala gbungo na ngangu pëpe me ala sara ni na bê ti ala wani.
12. Aye wa bazengele Paul ayeke nduru ti sara ti mû tere ti lo na kusala ni?
12 Aye wa a-ancien ayeke nduru ti sara ti mû tere ti ala na kusala ni? Na ngoi so ala yeke bâ lege ti angasangbaga ni, ala yeke mû tapande ti bazengele Paul so lo nga kue lo mû tapande ti Jésus (1 aCor. 11:1). Teti so Paul aye aita ti lo ti kodoro ti Thessalonique mingi, lo na amba ti lo so ayeke sara kusala na tere ti lo ayeke na ngia mingi ti ‘fa na ala gi nzoni tënë ti Nzapa pëpe, me ti mû nga âme ti ala kue na ala’. Na sarango tongaso, ala sara ye na nzoni bê “tongana mbeni mama so ayeke mû me na amolenge ti lo na lo bata ala nzoni.” (1 aThes. 2:7, 8). Paul ahinga so mbeni mama so ayeke mû me na amolenge ti lo andoye ala mingi. Lo yeke sara ye kue ndali ti ala. Lo yeke londo même na bê ti bï ti mû kobe na ala.
13. A lingbi a-ancien asara nyen na ndo ti tënë ti kua ti ala ti ancien nga na ti sewa?
13 A lingbi a-ancien abâ si kusala ti ala ti ancien akanga lege na ala pëpe ti bâ lege ti sewa ti ala (1 Tim. 5:8). Angoi so a-ancien ayeke mû ndali ti congrégation ayeke anzoni ngoi so ala lingbi fade ti mû ni ti duti na sewa ti ala. Mbeni ye so ala lingbi ti sara si kua ti ala ti congrégation akanga lege pëpe na kusala ti ala ti yâ ti sewa ayeke ti tene na ambeni ngoi ala tisa ambeni ita ti bungbi oko na ala na ngoi so ala yeke voro Nzapa na yâ ti sewa. Teti angu mingi, Masanao so ayeke mbeni ancien na Japon atisa aita so ayeke kumbamba nga asewa so babâ ni ayeke na yâ ti tâ tënë pëpe ti bungbi oko na sewa ti lo ti manda tënë ti Nzapa. Tongana ngoi ayeke hon, ambeni ita so Masanao amû maboko na ala aga a-ancien na ala mû pendere tapande ti lo.
Ala kpe bibe ti warango ye na lege ti likisi, me ala bata angasangbaga ni na bê ti ala kue
14, 15. Ngbanga ti nyen a lingbi a-ancien akpe “bibe ti warango ye na lege ti likisi”? Na lege wa ala lingbi ti mû tapande ti Paul na ndo ti tënë so?
14 Pierre awa nga a-ancien ti bata angasangbaga ni na “bibe ti warango ye na lege ti likisi pëpe, me na bê ti ala kue”. Sarango kua ti ancien ahunda ngoi mingi, me ala ku pëpe ti tene a futa ala na pekoni. Pierre abâ so a yeke kota ye ti wa amba ti lo a-ancien ti kpe ti fa lege na angasangbaga ni na “bibe ti warango ye na lege ti likisi”. A yeke bâ kpale ni so polele na yâ ti fini ti akota zo ti bungbi ti vorongo nzapa ti “Babylone, Ngangu gbata”. (Apoc. 18:2, 3). Akota zo ti bungbi ni ayeke na gbâ ti mosoro atâa so azo mingi ayeke na yâ ti yere. Laso, a-ancien ayeke na nzoni raison ti kpe ti sara ye tongaso.
15 Paul ayeke mbeni nzoni tapande teti a-ancien. Atâa so lo yeke bazengele nga so lo lingbi lani ti ga “mbeni nengo kungba” na ndo ti aChrétien ti Thessalonique, lo “te kobe ti mbeni zo senge senge pëpe.” Me ‘bï na lâ lo sara kua ngangu na gbiki ti li ti lo’. (2 aThes. 3:8). Laso, a-ancien mingi, so na popo ni a yeke wara asurveillant so ague na ando nde nde, ayeke anzoni tapande na ndo ti tënë so. Atâa so tongana aita ti ala atisa ala ala yeke yeda, ala yeke “ga mbeni nengo kungba” na ndo ti mbeni zo pëpe.—1 aThes. 2:9.
16. Ti fa lege na angasangbaga ni na ‘bê kue’ aye ti tene nyen?
16 A-ancien ayeke bata angasangbaga ni na “bê ti ala kue.” A yeke bâ ni polele na lege so ala yeke nduru ti dö ambeni ye ti zia ti mû maboko na angasangbaga ni. Me ye so aye pëpe ti tene so ala yeke gbu angasangbaga ni gbungo na ngangu ti sara na Jéhovah. Nga a-ancien so ayeke sara ye na ndoye ayeke pusu pëpe aita ti ala ti sara na Nzapa na bibe ti mandako (aGal. 5:26). A-ancien ahinga so ngasangbaga oko oko ayeke nde nde. Ala ye mingi ti mû maboko na aita ti ala ti sara na Jéhovah na ngia.
Ala sara mokonzi pëpe na ndo ti angasangbaga ni me ala ga atapande ndali ti ala
17, 18. (a) Ngbanga ti nyen na ambeni ngoi a yeke ngangu na abazengele ti gbu nda ti ye so Jésus afa na ndo ti sarango tere kete? (b) Na lege wa dutingo ti e ayeke oko na ti ala?
17 Tongana ti so e londo ti sara lisoro dä, a lingbi a-ancien agirisa pëpe so angasangbaga so ala yeke fa lege na ala ayeke ti Nzapa, me ti ala pëpe. Ala sara hange si ala ‘sara mokonzi pëpe na ndo ti ala so ayeke aye ti Nzapa’. (Diko 1 Pierre 5:3.) Na ambeni ngoi, sioni bibe apusu abazengele ti Jésus ti gi ti wara mbeni kusala. Legeoko na amokonzi ti amara, ala ye gi ti wara kota ndo.—Diko Marc 10:42-45.
18 Laso, a yeke nzoni aita so ayeke ‘gi kusala ti zo ti bango ndo na ndo ti congrégation’ abâ wala nyen la apusu ala ti gi ti sara kusala ni so (1 Tim. 3:1). A yeke nzoni ala so ayeke a-ancien ahunda tere ti ala polele ti bâ wala ala yeke na nzara ti komandema wala ti wara kota ndo tongana ti so ambeni bazengele asara lani. Teti so ye so ayeke lani mbeni kpale teti abazengele, a yeke nzoni a-ancien asara ngangu ti kpe bibe ti dunia so so ayeke pusu azo ti komande na ndo ti amba ti ala.
19. Ye wa a lingbi a-ancien agirisa ni pëpe na ngoi so ala yeke bata angasangbaga ni?
19 Tâ tënë, na ambeni ngoi a lingbi a-ancien aluti nganganga, na tapande tongana a yeke ti tene ala bata angasangbaga ni ndali ti “ambo ti ngonda”. (Kus. 20:28-30). Paul ahunda na Tite ti ngbâ ti ‘wa azo nga ti suku na ala na komandema kue so lo yeke na ni’. (Tite 2:15). Ye oko, même tongana a hunda ti sara ye tongaso, a-ancien ayeke gi ti sara ye na azo ni so na mbeni lege so ane ala. Ala hinga so ahon ti suku sukungo na zo, mingi ni ti gue na mbeni zo yeke ti yeda na mbeni tënë ayeke ndu bê ti lo nga ayeke pusu lo ti sara ye so ayeke nzoni.
20. Tongana nyen la a-ancien alingbi ti mû tapande ti Jésus na ziango mbeni nzoni tapande?
20 Pendere tapande ti Christ apusu a-ancien ti ndoye angasangbaga (Jean 13:12-15). Tongana e bâ lege so lo fa na adisciple ti lo ti fa tënë nga ti sara si azo aga adisciple, a ndu bê ti e mingi. Teti so Jésus asara tere ti lo kete, tapande ti lo andu bê ti adisciple ti lo, apusu ala ti sara ye na mbeni lege so afa so ala yeke ‘na tâ be-ti-molenge nga ala bâ amba ti ala tongana azo so ayeke kota ahon ala.’ (aPhil. 2:3). Laso a-ancien nga kue ayeke mû tapande ti Jésus na ala ye ti duti “atapande ndali ti angasangbaga ni.”
21. Ye wa a-ancien alingbi ti ku ti wara?
21 Pierre ahunzi wango ti lo na a-ancien na sarango tënë ti mbeni zendo teti kekereke. (Diko 1 Pierre 5:4.) A-ancien so a soro ala ti gue na yayu ‘ayeke wara couronne ti gloire so pendere ni ayeke hon pëpe’ legeoko na Christ na yayu. A-ancien so ayeke na popo ti “ambeni ngasangbaga” ayeke duti ande na pasa ti fa lege na angasangbaga ti Nzapa na ndo ti sese na gbe ti komandema ti “kota berger ni”. (Jean 10:16). Article ti peko ayeke fa ande aye so amembre ti congrégation alingbi ti sara ti mû maboko na azo so a soro ala ti mû li ni.
Mo dabe ti mo na ni?
• Ngbanga ti nyen a yeke kota ye ti tene Pierre amû wango na amba ti lo a-ancien ti fa lege na angasangbaga ti Nzapa so lo zia na maboko ti ala?
• Tongana nyen la a lingbi a-ancien abata aita so ayeke na kobela na lege ti yingo?
• Nyen la apusu a-ancien ti bata angasangbaga ti Nzapa so lo zia na maboko ti ala?
[Foto na lembeti 25]
Tongana ti aberger ti giriri, a lingbi a-ancien ti laso abata “angasangbaga” so a zia na maboko ti ala