E Yeke Yekia Aye ti Nzoni-Kue?
1 Tongana mbeni zo ahunda na e wala e yeke yekia aye ti nzoni-kue, fade fade e yeke kiri tene: biani! Ambeni oko oko ti aye ti nzoni-kue so Nzapa aleke na so e yeke yekia ayeke so wa?
2 E yekia mingi asongo so Babâ ti e ti yayu amu lege na e ti wara na lo! Lo mu yanga na e so tongana ‘e ga ndulu na lo, fade Lo yeke ga ndulu na e.’ (Jacq. 4:8) Ngbanga ti sacrifice ti kota ngele ti Jésus Christ pepe, ka fade zo oko alingbi pepe ti wara fini ti lakue lakue. (Jean 3:16) Na tâ bê ti kiri singila, lâ oko oko e yeke kiri singila mingi na Nzapa na yâ sambela teti matabisi ti kota ngele so.
3 Tene ti Nzapa so asû na gbe ti yingo, Bible ti Nzoni-kue, ayeke nga nzoni-kue na lê ti e, legeoko tongana bungbi ti Jéhovah na ndo sese. E yeke fa kiringo singila so alingbi teti aye so Nzapa aleke na batango akpengba-ndia ti Bible na yâ fini ti e, na kpengbango asongo ti ita so abungbi e, na yekiango mbilimbili lege so aleke na aye ti théocratie nga na salango kusala maboko na maboko na azo so ayeke na li ti e.—1 Pi. 1:22.
4 Na lege ti ngbâ ti be-ta-zo na ti ndara, e yeke wara gbâ ti kobe ti yingo. A yeke duti ande tongaso na ngu so na kota bungbi ti district “Awasalango Ye Alingbi na Tene ti Nzapa.” Fade e yeke wara kâ mbeni fango ye so ayeke kota, na e yeke wara ande nzoni na lege ti kpengba songo so alingbi na e biani. Tongana nyen ti fa tâ yekiango ndo teti ye ti nzoni-kue so aleke?
5 E ba da ti Jéhovah tongana ye senge pepe: Nehémia awa la ni ala so abi tele ti ala ti kiri ti leke agbagba ti Jérusalem ti ‘zia da ti Nzapa ti ala pepe.’ (Néh. 10:39) Laso, “da” ti Jéhovah ayeke aye so lo leke so andu vorongo. Akota bungbi ti e ti district ayeke na popo ni. Ti ba pepe ye so aleke tongana ye senge, a lingbi e duti dä na e dengi mê nzoni; na lege so, fade e yeke fa na Jéhovah so e yeke ba na nene ni mingi aye so lo leke. (aHéb. 10:24, 25) Aye wa alingbi e leke fadeso ti fa so e yekia mingi ye ti nzoni-kue so?
6 E duti dä na alango ota ni kue: A lingbi zo oko oko na popo ti e aleke tele ti lo ti duti dä na alango ota ti assemblée ni kue. Mo leke na bê ti mo kozoni awe ti si hio lango oko oko na ti ngbâ juska na sambela ti nda ni na dimanche? Na salango tongaso, fade mo yeke wara aye ti nzoni mingi. A yeke lakue kete ye pepe ti ga na mbeni kota bungbi. Ngoi na ngoi, ti wara lege ti zia kua ti nginza teti assemblée ahunda na zo ti luti ngangu na ndo aye so lo leke na bê. Awarango lege ti guengo na ni ayeke lakue nzoni kue pepe. Me e zia pepe si aye so asala si e nze ti gue na assemblée.
7 E gbu li na ndo nzo tapande so: Na ngu so ahon, na lege ti guengo na mbeni kota bungbi ti district na yâ mbeni kodoro ti Afrika so bira ayeke na popo ti azo ti kodoro ni, mbeni bungbi ti aita atingbi na ambeni turugu. Aturugu ni ahunda na ala: “Ala yeke azo wa, na ala yeke gue na ndo wa?” Ala kiri tene: “E yeke aTémoin ti Jéhovah, na e yeke gue na kota bungbi ti district.” Mbeni oko ti aturugu ni atene: “I, aTémoin ti Jéhovah, i zia mbito asala i pepe. I gue, na fade i yeke sala bungbi ti i senge. Me zia i hinga so fade i yeke tingbi na aturugu mingi na lege. I tambela lakue gi na bê ti lege! Tongana i ba azo mingi abungbi tele, i ngbâ lakue ti tambela na bê ti lege ni.” A yeke ye so aita ni asala, na ala si na kota bungbi ni, na ye oko a sala ala pepe. Aita so awara deba nzoni teti so ala fa so ala yekia aye ti nzoni-kue.
8 Legeoko na aita ti e na yâ akodoro mingi, e nga e yeke na akpale. Ye oko, e lingbi biani ti mu tapande ti mabe ti ala na ti leke na bê ti gue na ambage kue ti assemblée ti e ti district. Tongana salango tongaso ahunda na e aye mingi, e gi fango lege ti Jéhovah, na hingango so fade lo yeke hiri deba nzoni na ndo angangu so e yeke sala ande ti gue na kota bungbi ni kue.
9 E ko aye ti nzoni: E yeke na kota nzala mingi teti Tene ti Nzapa, teti na lege ni, e yeke maï teti salut. (1 Pi. 2:2) Na guengo na kota bungbi ti district, nga na mango adiskur, fade e yeke kpengba mabe ti e na yâ Tene ti Nzapa, na e yeke duti na aye ti bira so alingbi ti luti na gbele angangu ti Satan. Na ndo ni, fade e yeke fa na Jéhovah nga na azo kue so ayeke ba e so e yeke na tâ yekiango ndo teti aye ti nzoni-kue na “e yeke pepe mara ti azo so akiri na peko . . . me mara ti azo so ayeke na mabe teti batango âme na fini.”—aHéb 10:39, NW; 12:16; aProv. 27:11.
10 Zia e hinga biani so fade Jéhovah Nzapa ayeke lungula yanga ti yayu na fade lo sa na ndo e gbâ ti deba nzoni ti yingo. (Mal. 3:10) E zia na gbele e ti duti dä na kota bungbi ti district “Awasalango Ye Alingbi na Tene ti Nzapa,” na tongo nda ni na lango ti vendredi na ndapelele, ti si na sambela ti nda ni nga na “amen” ti dimanche na peko ti midi. Fade vundu ayeke gbu e pepe!