E sara kusala nzoni na apériodique ti e

1. Tongana nyen Tour ti Ba Ndo na Réveillez-vous! andu bê ti azo mingi so adiko ni?

¹ Tour ti Ba Ndo na Réveillez-vous! ayeke akpengba périodique so ayeke ga na ye ti nzoni na azo so adiko ni laso. Ngbanga ti nyen? Ngbanga ti so tâ tënë ti Mbeti ti Nzapa so ayeke na yâ ni alingbi ti sara ye ti nzoni na ndo ti fini ti azo teti lakue lakue. Tongana nyen la e lingbi ti sara kusala tâ nzoni na ambeti ti e so?

2. Ngbanga ti nyen a yeke nzoni e kpe ti buba apériodique?

² E kpe ti buba ala: Apériodique so e yeke wara nze oko oko adü gbani na yâ ti da ti e? A lingbi ti si tongaso tongana commande ti e alingbi pëpe na tâ bezoin ti e. Tongana e zia angbene périodique adü na e sara kusala na ni pëpe afa so e bâ akpengba mbeti so na nene ni pëpe. Tâ tënë so ayeke na yâ ti périodique oko oko ayeke na ngangu ti zingo na ti kaï nzara ti aye ti yingo na bê ti zo. Nyen la e lingbi ti sara ti kpe ti buba ambeti ti e?​—Jean 6:11-13.

3. Nyen la e lingbi ti sara tongana angbene périodique ti e adü mingi?

³ E sara kusala nzoni na angbene mbeti: E girisa pëpe so atënë ti yâ ti Tour ti Ba Ndo na Réveillez-vous! alondo na Bible. Atâa so ngoi ayeke hon, atënë ti yâ ti ala angbâ lakue ngangu (És. 40:8). Tongana angbene périodique angbâ nzoni a yeke nzoni e sara kamene pëpe ti mû ni na azo. Mo wani mo lingbi ti sara nyen tongana apériodique ti mo adü gbani? Sara tënë ni na surveillant ti kusala na fade lo yeke bâ apionnier na ambeni wafango tënë ti tene ala leke ti kangbi ni. Awafango tënë alingbi nga ti sara kua na angbene périodique na ngoi so ala yeke gue na territoire isolé.

4. A yeke nzoni mokonzi ti sewa oko oko asara nyen ti mû maboko na azo kue ti da ti lo ti sara kusala nzoni na apériodique ti e?

⁴ Gi ti hinga abezoin ti sewa ti mo: Mingi ni apériodique ayeke dü gbani ngbanga ti so commande ti e alingbi na tâ bezoin ti e pëpe. Mo lingbi ti hinga tâ bezoin ti mo tongana nyen? A yeke nzoni mokonzi ti sewa oko oko agi ti hinga mbilimbili wungo ti apériodique so zo oko oko so ayeke na yâ ti da ti lo ayeke sara na kua. A yeke nzoni zo oko oko ayeke na Tour ti Ba Ndo na Réveillez-vous! oko teti lo wani ndali ti abungbi na mandango ye ti lo. Na pekoni, a lingbi zo oko agi ti hinga wungo ti apériodique so ala yeke na bezoin ni ti fa na tënë. A yeke nzoni mokonzi ti sewa abâ wungo ti apériodique so zo oko oko akangbi na yâ ti ambeni nze so ahon. Na sarango tongaso, mo lingbi ti bâ so a hunda na mo ti leke kete commande ti azo ti da ti mo ti tene alingbi na bezoin ti ala.

5. Tongana nyen e yeke fa so e bâ apériodique ti e na nene ni?

⁵ E ye ti tene apériodique ti e asara ye so a leke ala ndali ni, so ti tene, ti mû maboko na azo so ayeke na tâ nzara ti manda ye na ndo ti apendere ye so Jéhovah aleke ti sara. Ambeti ti e ayeke na atënë so ayeke mû fini na azo so aye sarango ye ti mbilimbili. Me tongana ala ngbâ na yâ ti bozo ti e wala na ndo ti étagère ti e, ala lingbi ti ndu bê ti azo tongana nyen? Tongaso, a lingbi e sara ye na lege ni na ngoi so e ye ti mû ambeti ndali ti fango tënë, nga e sara kusala na ni na ndara si a mû maboko na azo.​—aPhil. 4:5.