E Dengi Mê na Atene ti Yanga ti Nzapa
1 A lingbi pepe ti zia bê biani na atene kue so azo atene. Me tongana a yeke Nzapa si asala tene, e yeke na anda ti ye mingi ti mä. (Deut. 28:1, 2) Ye ti ngia ayeke so ambeni wakuasu asû na gbele yingo ti Nzapa ‘atene ti yanga ti Nzapa’ teti nzoni ti e. (aRom. 3:2) Kota bungbi ti e ti district so ayeke ga ayeke mu ande na e apendere ngoi ti mä atene so; a yeke diko ni nga a yeke sala tene na ndo ni. Tongana nyen ti dengi mê nzoni na ni?
2 E si hio na ndapelele oko oko: Gbu li na ndo bibe ti azo ti Israël tongana a tisa ala ti gue ti tingbi na Jéhovah na hoto ti Sinaï ti mä Ndia ti lo! (Ex. 19:10, 11, 16-19) Tongana a yeke na mara ti oko bibe tongaso si e ye ti wara wango-tene ti Jéhovah na kota bungbi ti district, fade e yeke leke tele ti e ti si hio na ndapelele oko oko. E lingbi pepe ti mä atene ti programme ni kue tongana e si na peko; nga na mbage, fade e yeke gboto lê ti azo na gingo ando ti duti.
3 Ambeni ayeke ga hio, me ye oko, tongana kota bungbi ni ato nda ni, ala de aduti pepe. Ngbanga ti nyen? Ngbanga ti so ala yeke ku ti tene président ahunda azo ti he bia si ala ko nda ti lisoro ti ala na akamarade ti ala na ti gue na place ti ala. A lingbi e ba so président ni ayeke duti na ndo ti estrade apenze-ngbonga mingi kozoni na bia ti tongo nda ti bungbi oko oko na ngoi so a yeke pika ambeni bia ti Royaume. A yeke fä teti e ti kiri ti duti na aplace ti e! Na lege so, e yeke duti ndulu ande ti bungbi oko na yâ sepelango so a mu na Jéhovah tongana a hunda ti he bia.
4 E mä tene na sewa: Tongana a yeke diko la ni atene ti Nzapa na bungbi ti azo ti Israël, alingbi asewa adengi mê na amanda ye, legeoko na “amolenge.” (Deut. 31:12) Na ngoi ti akota bungbi ti e, a lingbi ‘a zia amolenge senge’ pepe. (aProv. 29:15) Ababâ na mama, i bata si azo ti sewa ti i aduti na ndo oko, nga na ala so akono kete. Ambeni babâ na mama ayeke ku gi bia ti tongo nda ni ti gue na akete molenge ti ala na kabine. Me a yeke biani pepe nzoni lege ti fa na ala nene ti abia na asambela na yâ vorongo ti e. Tongana lege ayeke dä, a yeke nzoni ahon ti gue na kabine kozoni na tongo nda ti abungbi ni!
5 A yeke duti ande ngangu mingi pepe na e ti mä tene tongana e wo tele ti e nzoni na bï oko oko na tongana e kpe ti te akobe so ane na lango ni so. E zia bê ti e kue na ndo atene ti awamungo diskur. E zia li ti e akpe na ndo aye nde pepe. E ba na yâ Bible ti e aversê so a yeke diko. E mu gi anote ndulu. Na ngoi ti adiskur oko oko, e gbu li na ndo atene ti wamungo diskur ni nga tongana nyen e lingbi ti sala kusala na ni. Na nda ti lango oko oko, e sala lisoro na sewa na ndo programme ni. Atene wa anzere na zo oko oko? Tongana nyen sewa ti e alingbi ti sala kusala nzoni na awango so amu?
6 E fa yekiango ndo ti e teti Tene ti Nzapa: Akota bungbi ayeke anzoni ngoi ti sala lisoro na akamarade so akpengba zo. Na singo hio, fade e yeke wara ngoi ti sala lisoro kozoni na tongo nda ti programme. Ye oko, a yeke si so ambeni zo ayeke sala lisoro na ngoi so bungbi ayeke tambela, na ala tene na bê ti ala mveni, me a yeke na lege ni pepe, so salango tongaso ayeke gboto lê ti azo mingi pepe na yâ mbeni kota da. Me abungbi so ayeke tambela na yâ ando so akono mingi ayeke nga ngoi ti mä tene, legeoko tongana e yeke gue na abungbi na da ti Royaume. Na ngoi so bungbi ayeke tambela, a lingbi e gi ti gboto lê ti ambeni zo pepe na salango kusala na akete téléphone so ayeke na tele ti e, caméra wala ye ti mungo na foto.
7 Na ngoi so Moïse ayeke wara la ni Ndia ti Jéhovah, “lo te kobe pepe, na lo nyon ngu pepe.” (Ex. 34:28) Legeoko nga, a yeke duti na lege ni pepe ti te na ti nyon ye na ngoi so abungbi ayeke tambela. Gi tongana tene ti seni ahunda ni, tongaso pepe e ku “ngoi so adiko awe” ti sala ni.—Zo-ti. 3:1, NW.
8 Na ambeni kota bungbi, e ngbâ ti wara akpale teti so aita koli na aita ti wali mingi nga na amolenge ayeke tambela senge senge na popo ti azo na ngoi so abungbi ayeke tambela. Fade a yeke mu yanga na azo ti yambango zo ti tisa azo tongaso ti gue na yâ ti da. A lingbi azo so amu tele ti ala ti sala akusala nde nde akiri aduti na aplace ti ala tongana kusala ti ala ahunzi. Gi tongana a tisa ala ti sala mbeni nene kusala na ngoi so abungbi ayeke tambela, tongaso pepe a lingbi ala duti na place ti ala na yâ ti da ti mä tene. A lingbi ala ngbâ pepe na ando ti kusala wala ti gue ti sala lisoro na ambeni wakua na ngoi so bungbi ayeke tambela.
9 E ye lâ oko pepe ti ga azo so ‘mê ti ala amä ndo nzoni pepe’ tongana e yeke dengi mê na Tene ti Nzapa. (aHéb. 5:11) Tongaso, zia e leke bê ti e ti fa na gigi yekiango ndo so alingbi na dengingo mê nzoni na aye so ayeke fa na ndo atene ti yanga ti Jéhovah na ngoi ti kota bungbi ti e ti district so ayeke ga.