‘Mä Tene na Manda Ye Mingi Ahon’
1 Buku ti aProverbe asala tene ti ndara tongana mbeni go so adekongo: “I mä, fade mbi fa na i kota tene, na fade mbi lungula yanga ti mbi ti fa ye so ayeke na lege ni. Wango na tâ ndara ayeke ti mbi. . . . I mä mbi; ngia ayeke na ala so abata lege ti mbi. Teti zo so awara mbi awara fini, na lo wara nzobe ti L’Eternel.” (aProv. 8:6, 14, 32, 35) Atene so afa na mbeni pendere lege fango ye so ayeke ku e na Kota Bungbi ti District “Awafango Tene ti Nzapa.”
2 A gi nda ti aye so atia bungbi ti aita na ndo sese kue, na a leke programme ti kota bungbi ni ti kanga ndo ti aye so. Fango ye na lege ti yingo nga anzoni wango so ayeke mu ande maboko na e, tongana e sala ye alingbi na ni, ti duti na ngia, ti bata mbeni nzoni songo na Jéhovah, na ti ngbâ na ndo lege so ague na fini ti lakue lakue. Biani, e yeke na nzoni nda ti tene ti ‘mä tene na ti manda ye mingi ahon.’—aProv. 1:5, NW.
3 Kozoni na bungbi ni: Ti wara ye mingi ahon na lege ti ye so a yeke fa, a lingbi e duti na place ti e na e leke bibe ti e nzoni tongana bungbi ni ato nda ni. Ye so ahunda ti leke tele nzoni. Kota ye ni ayeke ti to nda ni hio. Lango hio na bï kozoni. Londo na kota ndapelele na ndade ni ti mu lege na zo oko oko kue ti sewa ti mo ti wara ngoi ti leke tele hio na ti te mbeni ye. Si hio na ndo ti kota bungbi ni si mo lingbi ti wara mbeni ndo ti duti na ti ba lege ti ambeni ye so a lingbi mo sala kozoni si bungbi ato nda ni. Fade bungbi ni ayeke to nda ni na 7:50 lâ oko oko.
4 Teti so kozo nda ti bungbingo ti e ayeke ti sepela Jéhovah “na yâ bungbi ti azo,” fade a yeke to nda ti ambage oko oko ti bungbi ni na lege so amu gonda na Nzapa ti e. (Ps. 26:12) Teti ye so, a wa azo kue ti duti na ndo ti ala kozoni si a fa bia ti tongo nda ni. Ye so ague oko na wango ti Mbeti ti Nzapa: “A lingbi i sala ye kue mbilimbili na lege ni.” (1 aCor. 14:40) Ye so aye ti tene nyen teti e oko oko kue? Tongana mo ba président ni aduti na ndo estrade na ngoi so mozoko ato nda ni, duti na place ti mo hio. Fade ye so ayeke mu lege na mo ti he na bê kue bia so azi li ti ambage oko oko ti bungbi ni, na yango lego ti mo ti he bia ti sepela Jéhovah.—Ps. 149:1.
5 Na ngoi ti bungbi ni: Ezra “aleke bê ti lo ti gi nda ti ndia ti Jéhovah na ti bata ni.” (Esdras 7:10, NW) Tongana nyen e lingbi ti leke bê ti e ti wara fango ye so alondo na Jéhovah? Na ngoi so mo yeke ba li ti atene ti ambage nde nde so a fa molongo ni na yâ ti mbeti-kapa, hunda tele ti mo, ‘Ye nyen Jéhovah ayeke fa na mbi na lege ti programme so? Tongana nyen mbi lingbi ti sala kusala na sango so teti nzoni ti mbi mveni na ti sewa ti mbi?’ (Es. 30:21; aEph. 5:17) Ngbâ ti hunda atene so na ngoi kue ti kota bungbi ni kue. Sû na mbeti atene so mo leke ti sala kusala na ni. Na hunzingo ti ambage ti bungbi ni na yâ alango ni kue, mu ngoi ti sala lisoro na ndo ni na ambeni zo. Fade ye so ayeke mu maboko na mo ti bata na ti sala ye alingbi na tene ni.
6 Ti bata lê na ndo ti bungbi ni teti angbonga mingi kue alingbi ti duti mbeni kpale. Ye nyen alingbi ti mu maboko na e ti luti na gbele nzala ti tene bibe ti e afono na ndo aye nde nde? Wara ye ti nzoni na lege ti ngangu so lê ayeke na ni. Mingi ni, ye so e bata lê dä akomande bibe ti e. (Mat. 6:22) Tongaso, luti ngangu na gbele kota nzala ti bi lê ti mo na ndo kete totongo ti ye wala ye kue so ayeke tambela. Bata lê ti mo na ndo wamungo diskur ni. Tongana lo diko mbeni versê, diko ni na yâ Bible ti mo legeoko na lo, na bata lakue Bible ti mo na zingo ni tongana lo yeke fa nda ti versê ni.
7 Fade ndoye ti Chrétien ayeke pusu e ti buba pepe nzoni dutingo ti azo na ngoi so programme ni ayeke gue na li ni. (1 aCor. 13:5) So ayeke “ngoi ti duti kpö” na ti dengi mê. (Zo-ti-fa-tene 3:7, NW) Tongaso, sala tene senge pepe na gue na mbeni ndo senge pepe. Leke tele ti mo kozoni ti tene mo gue na kabine mingi pepe. Tongana mo yeke na mbeni kota kobela pepe, te ye pepe juska ngoi so a mu ndali ni asi. A lingbi azo so ayeke na asinga-me na tele ti ala wala a-caméra asala kusala na ni pepe ti kanga lege na azo ti mä tene. A lingbi ababâ na mama aleke ti tene sewa ni kue, so na popo ni a wara apendere, aduti na ndo oko si ala lingbi ti ba ndo nzoni na ndo amolenge ti ala.—aProv. 29:15.
8 Na ngu so ahon, mbeni ancien so ayeke gue na akota bungbi teti angu mingi atene: “Mbi ba so kota bungbi ni ayeke nde mingi ndali ti mbeni ye oko. Ndulu na azo kue so aga nga na akete molenge ayeke sû ye na mbeti. Tele ti mbi anzere ti ba ni. Ala sala la ni kusala nzoni na aBible tongana awamungo diskur ni atisa ala ti zi ni na ndo ti ambeni versê.” Biani, mara ti dengingo mê nzoni tongaso ayeke mbeni ye ti gonda. A ga pepe gi na aye ti nzoni na e nga na afon e aita so aga, me ahon ye kue, a mu gonda na Kota Wafango Ye ti e, Jéhovah Nzapa.—Es. 30:20.