Akiringo Tene na Ahundango Tene ti I

◼ Ngbanga ti nyen a yeke nzoni ti tene azo agi aversê ti Bible tongana wamungo diskur ni ahunda na ala?

Ti hinga aversê so ayeke tisa ande azo ti ba ni, a lingbi ahinga kota li ti tene ni nga tongana diskur ni ayeke gi nda ti versê oko na oko ti mbeni mbage ti Tene ti Nzapa.

Na ambeni mbage, dikongo aversê so ayeke mu lege ti zia gunda ti atene so ayeke fa na ndo Bible. (Kus. 17:11) A mu nga lege ti kpengba mabe ti azo kue so ayeke mä tene ni na fango nda ti atene ni na lege ti aversê ti Bible. Na mungo peko ti dikongo mbeni kpengba versê, ala yeke ba ala mveni ye so Bible atene biani, na a yeke pika bê ti ala mingi. Na mbeni mbage, a yeke nzoni ti sû na mbeti akota tene ni na ti dengi mê na fango peko ti tene ni.

Plan so Société amu ayeke peut-être na aversê mingi, me a mu ni teti wamungo diskur ni lo mveni, si a lingbi mu maboko na lo na yâ lekengo diskur ti lo. A mu na lo ambeni tene nde na ndo ni, a mu maboko na lo ti gbu nda ti akpengba-ndia ti Bible so ayeke na gbe ni na ti gbu nda ti fango peko ti tene ni. Wamungo diskur ni ayeke soro aversê so ayeke kota teti diskur ni na ayeke hunda na awamango diskur ni ti mu peko ti dikongo ni nga na fango nda ni. A lingbi ti fa wala ti diko peko ti ambeni versê so akpengba mbeni fango tene, me a hunda pepe na azo ti diko ni na yâ Bible ti ala.

Fade wamungo diskur ni ayeke diko aversê ni na yâ ti Bible, na pepe na lege ti mbeti so lo pika na ordinateur. Tongana lo tisa azo ti diko legeoko na lo, fade lo fa polele iri ti buku ni, chapitre ni, nga na aversê ni. Na ngoi so azo ayeke gi versê ni, lo lingbi ti hunda mbeni tene wala lo fa ndulu nda ni so afa versê so. Ti fa fani mingi buku, chapitre, na versê ni ayeke mu ande maboko na azo ni ti dabe na ni. Ye oko, a yeke nzoni ti fa pepe lembeti ni, teti ayeke nde nde alingbi na aBible so azo ni asala na kusala. Na mungo peko ti dikongo aversê tongana atisa ala ti sala tongaso, azo so ayeke mä tene ni ayeke wara ye ti nzoni na lege ti ngangu ti Tene ti Nzapa, na ngoi so a yeke fa nda ni na ndembe ti diskur.​—aHéb. 4:12.