Tongana Nyen ti Ga na Azo ti Yeda na Tene Ni
1 Giriri, a hinga bazengele Paul tongana mbeni wakua so aga na zo ti yeda na tene ni. (Kus. 19:26) Même Gbia Agrippa atene la ni na lo: “Na yâ ngoi kete mo yeke gue na mbi ti ga mbeni Chrétien.” (Kus. 26:28, NW) Ye nyen asala si kusala ti Paul aga na azo mingi ti yeda na tene ni? Lo fa nda ti tene tâ na lege ni na yâ Mbeti ti Nzapa, na gbiango atene ti lo ti lingbi na azo so ayeke mä lo.—Kus. 28:23.
2 Na tapande ti Paul, na yâ kusala ti e a lingbi e nga e ga na azo ti yeda na tene ni. Tongana nyen? Na salango kusala na ngangu ti ba nda ti ye na ngoi so e yeke sala tene na e yeke mä azo. (aProv. 16:23) Fade akota ye ota ayeke mu maboko na e ti sala ni.
3 Dengi mê nzoni: Na ngoi so mbeni zo ayeke sala tene, dengi mê ti wara mbeni ye so mo na zo ni alingbi ti sala lisoro dä nzoni. Tongana lo ke mbeni tene, gi ti hinga ye so ayeke na pekoni. Fade a yeke mu maboko na mo ti hinga mbilimbili ye so lo mä na bê dä, ngbanga ti nyen lo mä na bê na ni, na ye so apusu lo ti yeda na ni. (aProv. 18:13) Na kode, sala si lo fa na mo aye so kue.
4 Hunda atene: Tongana mbeni zo afa so lo mä na bê na nzapa ti li ota, mo lingbi ti hunda: “A ninga awe so mo mä na bê na nzapa ti li ota?” Na pekoni hunda: “Mbeni lâ oko mo manda nzoni awe ye so Bible atene na ndo ni?” Mo lingbi ti hunda nga: “Tongana Nzapa ayeke mbage ti mbeni nzapa ti li ota, e lingbi pepe ti ku Bible ti sala tene polele na ndo ni?” Akiringo tene ni ayeke mu ande maboko na mo ti fa nda ti ye na zo ni na ndo ye so Mbeti ti Nzapa atene.
5 Fa nda ti ye nzoni: Mbeni Témoin ahunda na mbeni wali so amä na bê so Jésus ayeke Nzapa: ‘Tongana mo tara ti mu tapande ti fa so azo use alingbi tele, mo lingbi ti sala kusala na songo wa so ayeke na yâ ti sewa?’ Wali ni akiri tene: “Mbi lingbi ti sala kusala na aita use.” Ita ni akiri atene: “Peut-être même angbo so akpa tele biani. Me na fango na e ti ba Nzapa tongana Babâ ni na lo mveni tongana Molenge ni, ye nyen Jésus aye la ni ti tene?” Wali ni agbu nda ni so oko aninga ahon mbeni na so lo yeke na ngangu mingi ahon. (Mat. 20:23; Jean 14:28; 20:17) Kode ti gango na zo ti yeda na tene ni asala si ita ni andu bê nga na bibe ti lo.
6 Biani, a yeke pepe azo kue si ayeke yeda na tâ tene, atä tongana tene ti e ayeke na lege ni nga mbilimbili. Ye oko tongana Paul, zia e duti na wâ na yâ gingo azo ti bê ti mbilimbili na yâ territoire ti e, na gango na ala ti yeda na tokua ti Royaume.—Kus. 19:8.