Gi ti ga na azo ti yeda na ye so mo yeke fa
1 Azo so ayeke anzoni wafango tënë, tongana bazengele Paul, ahinga so “ti sara kusala na lege ni na tënë so ayeke tâ tënë” andu gi senge fango aversê ti Bible pëpe (2 Tim. 2:15). Na ngoi so e yeke sara kusala na Bible ti fa ye na azo, e lingbi ti sara tongana nyen ti “gi ti ga na ala ti yeda” na tënë ni?—Kus. 28:23.
2 E zia Bible si asara tënë na place ti e: Kozoni, gboto lê ti zo ni na ndo ti Bible si lo bâ so ndara so ayeke na yâ ni alondo na Nzapa si lo ne ni. So e zia bê ti e kue na Mbeti ti Nzapa alingbi ti pusu zo ni ti dengi mê ti mä versê so e yeke diko na lo (aHéb. 4:12). Mo lingbi ti tene: “Mbi bâ so pensé ti Nzapa amû maboko na mbi mingi na ndo ti tënë so. Bâ tënë so Bible atene.” Tongana lege ayeke dä, diko gi Bible ti fa tënë so a tene.
3 Use ni, fa nda ti versê so mo diko so. Ti azo mingi, a yeke ngangu na ala ti mä yâ ti mbeni versê so e diko ni na ala kpa. Ni la, tongana e zi nda ni na ala, ala yeke bâ kamba so atingbi tënë ti e ni na versê ni (Luc 24:26, 27). Gboto lê na ndo ti angbongboro tënë ti yâ ti versê ni. Hunda tënë na lo ti bâ wala lo gbu ndani.—aProv. 20:5; Kus. 8:30.
4 Pika patara na ndo ti Bible: Ota ni, sara kue ti tene zo ni azia li ti lo na ndo ti tënë ni si a ndu bê ti lo. Mû maboko na lo ti bâ tongana nyen la versê ni andu lo wani. Pikango patara na ndo ti Mbeti ti Nzapa alingbi ti ga na mbeni zo ti changé bango ndo ti lo (Kus. 17:2-4; 19:8). Na tapande, na peko ti so e diko Kusala 2:21, e lingbi ti fa tongana nyen ti hinga iri ti mbeni zo ayeke kozo ye so a lingbi e sara ti lë songo na lo. Na pekoni, mo lingbi ti hunda lo: “Mo pensé so ti hinga iri ti Nzapa alingbi ti sara ye mingi na ndo ti sambela ti mo?” Ti tingbi versê ni tongaso na fini ti zo ni wani ayeke sara si lo bâ nzoni ti versê ni. Ti fa ye na yâ ti Bible na mbeni lege so aga na zo ti yeda na ni ayeke pusu azo ti nzoni bê ti voro Jéhovah, tâ Nzapa so ayeke na fini.—Jér. 10:10.
[Ahundango tënë ti manda na ye]
1. Ti sara kusala nzoni na Bible na fango tënë ahunda ti sara nyen?
2. E lingbi ti sara nyen ti tene azo abâ Bible na nene ni ahon ti kozo?
3. E lingbi ti sara nyen ti tene zo ni amä yâ ti versê so e diko ni na lo so?
4. Tanga ti ye so a lingbi e sara ti ga na zo ti yeda na ye so e yeke fa ayeke nyen?