Zia E Kue E Yekia Jéhovah na Molenge ti Lo
Lege so Azo Kue so Aga na Matanga ti Kui ti Jésus na lango 8 ti nze ti Avril Alingbi ti Wara Ye ti Nzoni Ahon Dä
1 Laso, azo wa si a yekia ala mingi? A yeke ala so azo ti sese aba aye so ala sala na nene ni. Ye oko, teti azo mingi, a glisa hio aye so ala sala. Me ti akusala so asala biani nzoni na azo kue ayeke tongana nyen? Fade e yeke bi bê ti e mingi na ndo kota kusala so ahon atanga ni kue tongana e yeke bata matanga ti Kobe ti Lakui ti Seigneur na peko ti lindango ti lâ na lango 8 ti nze ti avril ngu 2001.
2 Zo wa alingbi na yango-iri ti kota ahon? Bible akiri tene dä: “Mo lingbi, Jéhovah, . . . ti wara gloire na yango-iri na ngangu, teti mo sala ye kue.” (Apoc. 4:11, NW) Teti so lo yeke Wasalango ye, Jéhovah ayeke Kota Gbia ti ndagigi. Fade lingbingo ti lo na yango-iri ayeke hunzi lâ oko pepe.—1 Tim. 1:17.
3 Jésus Christ, Molenge ti Nzapa, asala akpengba ye so fade ayeke ga na adeba nzoni ti lakue lakue na azo. Lo manda tapande ti Babâ ti lo mbilimbili. (Jean 5:19) Mango yanga ti lo so ayeke mbilimbili-kue na salango na Nzapa na be-biani asala si lo ‘lingbi ti wara ngangu, na mosoro, na ndara, na ndo ti ngangu, na yango-iri, na gloire, na tene nzoni.’ (Apoc. 5:12) Babâ ti lo ayekia lo na ziango lo na ndo mbata ti Gbia. (Ps. 2:6-8) Ti e, e yeke wara ande lege ti yekia Babâ nga na Molenge ni na ngoi so e yeke sala matanga ti Kobe ti Lakui ti Seigneur na lango 8 ti nze ti avril ngu 2001.
4 Ye ti vundu ni ayeke so, azo mingi pepe na yâ mbaï amu na Jéhovah nga na Molenge ti lo yekiango ndo so alingbi na ala. Ngoi na ngoi, même azo ti Nzapa giriri, azo ti Israël, asala na Jéhovah gi senge tongaso. So tâ salango kpengba-li na gbele Nzapa. (Mal. 1:6) Tâ yekiango ndo ahunda mango yanga na be-biani so aluti na ndo ti ndoye nga na ndo bango na nene ni ye kue so Jéhovah na Molenge ti lo asala teti e. Mungo mara ti yango-iri na yekiango ndo tongaso aye ti tene so e fa kota kpengo mbito ti Nzapa, na yengo dä na Jéhovah nga na Jésus na yâ ye kue so e sala. Kongrégation ti aChrétien asala ngangu ti fa na ti mu maboko na azo ti sala tongaso nga.
5 Mbeni kota ngoi ti fa yekiango ndo: Batango Matanga ti Dango Bê ayeke kota bungbi so azo ti Jéhovah ayeke sala ngu oko oko. A lingbi zo kue so aye ti sala na Jéhovah na ti yekia lo aga na bungbi ni. (Luc 22:19) E yeke ku ti tene na ndo ti aTémoin kutu 6 so ayeke fa tene, azo so asala nzala ti tene ni ayeke ga ande ti kono wungo ti azo ahon kutu 14 na matanga ni. So tâ pendere ngoi ti yekia Babâ ti e ti yayu! Atä so Matanga ni aluti mingi na ndo Jésus, yango-iri nga na yekiango ndo so a fa teti ye kue so lo sala amu gloire na Babâ, so ato lo.—Jean 5:23.
6 E lingbi ti sala nyen ti tene kota ngoi so atambela nzoni? E lingbi ti mu maboko na afini zo so asala nzala ti tâ tene ti wara ye ti nzoni mingi dä. Wa ala ti ga na Matanga ni, nga na ndo so a hunda ti sala ni, hunda na nzobe ti mu maboko na ala ti ga na ndo ni. Fa nda ti diskur ni na ala. Fa ala na ambeni ita. Ye so ala ba na amä alingbi ti pusu ala ti gi ti bungbi legeoko na e na yâ yekiango Jéhovah.
7 Ba tongana kete ye pepe ye so programme ni alingbi ti sala na ndo ti ala. Mbeni wamandango mbeti na da senda-gi asala tene so: “Mbi gue na Matanga ti Kobe ti Seigneur fani mingi na yâ Église ti mbi, me ti so ayeke nde mingi. Mbi ba so a yeke mbilimbili ye so Bible atene, na mbi bi bê ti mbi so ala yeke na tâ tene.” Lo to nda ti ga na abungbi lakue na a ninga pepe lo wara batême.
8 Mu maboko na afini zo ti gue na li ni: Gi ti hinga afini zo kue so aga na Matanga ti Dango Bê ni, na sala vizite na ala ngoi kete na pekoni ti dabe na apendere ye so ala manda na ala ba. Fa na ala so ambeni bungbi ayeke nga dä, na ndo so ala lingbi ti kono hingango ye ti ala na ndo Bible. Ti kiri ti ba chapitre 17 ti buku Hingango Ye, “Wara Nzoni Dutingo na Popo ti Mara ti Nzapa,” ayeke fa ande na ala kota molongo ti aye ti yingo so kongrégation amu, so ala lingbi ti wara hio. Leke ti tene ala ba kasete vidéo Sewa ti aita ti e kue (Angl.) wala tongana a yeke dä pepe, mu mbeni nde tongana Unis grâce à l’enseignement divin, si ala lingbi ba beoko, ngia, na wâ ti azo ti Jéhovah na lê ti ala mveni!
9 A yeke kota ye ti tene azo so asala nzala ti tâ tene amanda tongana nyen ala mveni alingbi ti yekia na ti kpe mbito ti Jéhovah. Fa so sambela so alondo na bê anzere na Jéhovah na ayeke mbeni lingu ti warango ngangu na lege ti yingo so ayeke kaï lâ oko pepe. (1 Jean 5:14) Na salango kusala na aye ti manda 8 ti si na 12 na yâ brochure Ahunda, fa mara ti tambela so ayekia Jéhovah. Na salango lisoro na ndo ye so ayeke na yâ brochure A-Témoin ti Jéhovah, alembeti 30-1, wa afini zo ti bi bê na ndo lege ti yekia Jéhovah na mungo mbage na yâ kusala ti fango tene (Tongana a yeke dä pepe, i lingbi ti sala kusala na brochure Unis pour faire la volonté de Dieu, lembeti 14-5).
10 Bango na nene ni sadaka ti Jésus nga na matabisi so e yeke na ni ti sala kusala tongana adisciple ti lo ayekia Babâ ni na a ga na adeba nzoni mingi na ambeni zo. Jésus amu zendo so: “Tongana mbeni zo asala na Mbi, fade Babâ ayä iri ti lo.”—Jean 12:26.