Ndu Bê ti Wamandango Ye ti Mo
1 Kozoni ti gue na yayu, Jésus atene na adisciple ti lo ti fa ye na azo ti “bata” aye kue so lo komande. (Mat. 28:19, 20, NW) Tongana mbeni zo aye ti “bata” akomandema ti Christ, a lingbi tene ni andu bê ti lo. (Ps. 119:112) Tongana nyen mo lingbi ti ndu bê ti mbeni zo so mo yeke manda Bible na lo?
2 Sambela ti wara fango lege ti Jéhovah: Salango adisciple ayeke kusala ti Nzapa. A hunda deba nzoni ti lo, pepe akode ti e, ti sala ni nzoni. (Kus. 16:14; 1 aCor. 3:7) Tongaso, a yeke kota ye ti sambela ti wara mungo maboko ti Jéhovah na yâ fango tâ tene na azo.—Es. 50:4.
3 Hinga ye so wamandango ye ni amä na bê dä: Ti hinga ye so azo amä na bê dä na ngbanga ti nyen ala mä na bê na ni alingbi ti sala si e hinga ye so a lingbi e tene ti ndu bê ti ala. Ngbanga ti nyen mbeni wamandango ye aba so fango ye tongaso agboto lo mingi? Ye nyen aga na lo ti yeda so a lingbi ti mä na bê na ni? Mara ti hingango ye tongaso alingbi ti mu maboko na e ti sala tene na bango nda ti ye.—Kus. 17:22, 23.
4 Zia si tene ti mo aduti na lege ni nga alondo na yâ Mbeti ti Nzapa: A lingbi wamandango ye agbu nda ti tâ tene. (Kus. 17:24-31) A lingbi e fa tâ nda ti beku ti e. (1 Pi. 3:15) Ye oko, e sala ni lakue na nzobe nga na be-nze-pepe.
5 Kiri mo kpengba ni na lege ti atapande: Atapande asala ‘gi pepe ti tene wamandango ye ni agbu nda ni me ala ndu nga atene ti bê ti lo. Ala ndu bibe na bê. Giriri, Jésus asala kusala na ni fani mingi. (Marc 4:33, 34) Biani, ti tene a ndu bê, a lingbi tapande ni ague legeoko na tene so mo yeke sala lisoro dä, na a lingbi a ndu fini ti wamandango ye ni.
6 Fa anzoni ye so aga na peko ti yengo dä na tâ tene: Azo aye ti hinga aye ti nzoni so aga na peko ti salango ye alingbi na ye so ala yeke manda. Mu maboko na wamandango ye ti ba ndara ti atene ti Paul na 2 Timothée 3:14-17.
7 Zia bê ti mo anze pepe tongana ambeni zo ayeda pepe na fango ye ti mo. A yeke pepe abê kue si ayeke yeda na tene ni. (Mat. 13:15) Ye oko, ambeni zo aga awamabe. (Kus. 17:32-34) Zia ngangu so mo sala ti ndu bê ti azo na lege ti nzo tene amu maboko na azo mingi ahon ti yeda na ti “bata” ye so Jésus akomande.