Leke Tele ti Manda Prophétie ti Isaïe!
1 “Awavorongo lo be-ta-zo alingbi ti hinga na bê kue so Jéhovah . . . ayeke zia pepe sese ti Satan aninga lango oko ahon ye so fango ngbanga ti mbilimbili ahunda.” So tâ tene ti mu wâ na zo! A gboto tene so na ndo wa? Prophetie ti Isaïe, Lumière Teti Azo Kue I. Prophétie ti Isaïe amu na e mbeni nda ti tene ti sala mara ti tene ti nda ni tongaso na bê kue? Biani! Na yâ buku ti Bible so, a gboto lê mingi nga polele na ndo kota li ti tene ti salut. (Es. 25:9) A yeke ngbanga ni si a yeke kpengba ande e mingi ti manda mbage ti Tene ti Nzapa so na Mandango Buku ti Kongregation. Fade e yeke ga ti wara ngia dä yenga oko oko? Ngbanga ti nyen a lingbi e sala ni?
2 Na Isaïe 30:20 (NW), a hiri Jéhovah “Kota Wafango ye” ti e. A lingbi Chrétien oko oko kue adengi mê nzoni tongana Jéhovah afa ye na e na lege ti Tene ti lo nga na lege ti ambeti so aluti na ndo ti Bible, so “ngba ti be-ta-zo na ti ndara” amu. (Mat. 24:45, NW; Es. 48:17, 18) A yeke ye so buku Prophétie ti Isaïe I asala biani. Tongana nyen mo lingbi ti wara ye ti nzoni mingi ahon na lege ti mandango ni?
3 Leke tele ti mu mbage na ni: Bata ngoi mingi yenga oko oko ti leke tele teti mandango buku ni. Diko aparagraphe oko oko kue so a hunda ti leke ni. Gbu li na ndo ti ahundango tene oko oko kue so ayeke na yâ ni. Sû akiringo tene ni na yâ buku ti mo. Aversê so a gboto na yâ ti Esaïe ayeke ala so gere ni avuko mingi. Diko ni nzoni. A du ti ambeni versê nde so a fa ti diko ni, gi nda ni ti ba tongana nyen ala ndu tene ni. Gbu li na ndo ye so mo yeke manda. Na pekoni kangbi aye so mo wara na lege ti lekengo tele ti mo na bungbi ti mandango buku ti mo.
4 A lingbi ita so amu li ni na yâ mandango buku amu maboko na azo kue so aga ti sala nzoni kusala na Bible na ti yekia ye ti nzoni so ayeke na yâ ti buku so a yeke manda. Tongana a hunda na mo ti kiri tene kozoni, mu mbeni kiringo tene so akpengba pepe na so ayeke polele. Tongana mbeni zo asala ni awe, mo lingbi ti fa ambeni ye nde so andu tene so a sala lisoro dä. Peut-être mo lingbi ti fa tongana nyen versê so ayeke na gunda ni ague legeoko na kota li ti tene ni. Tara ti kiri tene na lege ti atene ti mo mveni, na wara ngia na yâ mungo mbage na lisoro ni.
5 Zia e gi legeoko na bê kue nda ti tokua ti ngele ngangu so ayeke na yâ buku ti Isaïe. Fade a yeke mu ngangu na e ti duti na fini lâ oko oko na kungo na ngia salut ti Jéhovah!—Es. 30:18.