Anzoni Salango Ye: Mbeni Fä ti Azo ti Nzapa

¹ Laso a yeke ngangu ti ba anzoni salango ye. Ngbanga ti nyen a yeke tongaso? Azo ayeke sala ye na loro mingi na a sala si ala bi bê mingi pepe na ndo ti salango ye na nzobe so ayeke kota ye, tongana ti tene “Mbi gbu gere ti mo,” “Singila,” wala “Pardon.” Tene ti Nzapa asala tene kozoni ti bubango ti asalango ye na lâ ti nda ni tongana lo tene so azo ayeke ga ‘azo so andoye tele ti ala mveni, azo ti fandara, azo so akiri singila pepe, azo so andoye asongo ti ala pepe, azo so akanga nzala ti tele pepe, azo so andoye nzoye pepe, azo ti kpengba-li.’ (2 Tim. 3:1-4, NW) Alengo so kue adü asioni salango ye. Teti ala yeke azo ti Nzapa, a lingbi aChrétien asala hange si ala yeda pepe na asalango ye ti azo ti sese so ayekia zo pepe.

² Asalango ye ayeke nyen? A lingbi ti fa peko ti anzoni salango ye tongana hingango nzoni atene ti bê ti azo, ngangu ti duti na azo na siriri. Ambage ti anzoni salango ye ayeke yekiango zo, nzobe, fango na gigi ndara nga bingo bê na azo. Ndoye so mbeni zo ayeke na ni na mbage ti Nzapa na ti zo so ayeke ndulu na lo ayeke na gunda ti alengo so. (Luc 10:27) Ala hunda ye mingi pepe, me ala yeke na ngele ngangu mingi ti sala si songo ti e na azo akiri akpengba ahon.

³ Jésus Christ azia nzoni tapande ni. Lo sala ye lakue alingbi na Ndia ti Lor: “Ye so i ye azo asala na i, i sala tongaso na ala nga.” (Luc 6:31) Bê ti e apika pepe na bango lege so Jésus asala ye na bingo bê kue nga na ndoye na mbage ti adisciple ti lo? (Mat. 11:28-30) Anzoni salango ye ti lo alondo pepe na yâ ti andia so a sû na yâ ti abuku so afa anzoni salango ye wa a lingbi a sala. Ala londo na yâ bê so ayeke mbilimbili na nzoni. A lingbi e gi ti manda pendere tapande ti lo.

⁴ Lawa a lingbi aChrétien asala ye nzoni? Gi na ambeni ngoi so ayeke nde, tongana a yeke ti tene azo asala nzoni tene ti ala? A yeke na bezoin ti ala gi tongana ala yeke tara ti sala ngangu na ndo ti ambeni zo? Oko pepe! A lingbi e fa na gigi anzoni salango ye na ngoi kue. Na alege wa mbilimbili a lingbi ye so andu e na yâ asongo ti e na mbeni zo na yâ ti kongregation?

⁵ Na Da ti Royaume: Da ti Royaume ayeke ndo so e voro Nzapa dä. Jéhovah Nzapa la atisa e na ndo so. So ti tene, e yeke agene. (Ps. 15:1) E yeke agene so amu nzoni tapande tongana e ga na Da ti Royaume? E yeke bi bê ti e na lege ni na ndo yungo bongo nga na salango kua-li ti e? Biani a lingbi e kpe lekengo tele so ayeke gi tongaso wala so ahon ndo ni. Atä ala gue na akota bungbi wala na abungbi ti e ti kongregation ti yenga oko oko, a hinga azo ti Jéhovah na lekengo tele ti ala so alingbi na azo so atene avoro Nzapa. (1 Tim. 2:9, 10) Tongaso e fa tâ bingo bê nga yekiango ndo teti Zo ti yayu so atisa e nga teti ambeni gene so lo tisa ala.

⁶ Mbeni lege nde ti fa anzoni salango ye so andu abungbi ayeke gango na l’heure. A lingbi a yeda so a yeke lakue kete ye pepe. Ambeni zo alingbi ti lango na yongoro ndo wala ayeke peut-être na kota sewa ti tene azo ni aleke tele. Ye oko, a ba so na yâ ti ambeni kongregation awafango tene 25 na ndo ti ala 100 ayeke ga ka lakue na peko ti bia nga na sambela ti tongo nda ni. A yeke mbeni kota kpale. A yeke nzoni ti dabe so asalango ye ague oko na hingango atene ti bê ti azo. Jéhovah, Zo ti be-nzoni so atisa e, aleke amatanga ti yingo so teti nzoni ti e. E yeke fa bê ti kiri singila ti e nga bingo bê na atene ti bê ti lo na gango na l’heure. Nga, gango hio pepe na abungbi ayeke gboto lê ti azo nga afa so e yekia pepe azo so aga kozoni na e.

⁷ Tongana e bungbi oko, e yeke ba afini zo na popo ti e? Ti yamba ala ayeke mbeni mbage ti nzoni salango ye. (Mat. 5:47; aRom. 15:7) Mbeni barango ndo na nzobe nga na ngia, akete kete ye, me ala sala ye mingi na ndo lege so a yeke hinga na e tongana atâ Chrétien. (Jean 13:35) Na pekoni so lo ga na Da ti Royaume ti kozo ngoi ni, mbeni koli atene: “Gi na yâ lango oko mbi tingbi na azo so ayeke na tâ ndoye, so ayeke awande biani, so ade mbi tingbi lâ oko pepe na yâ église so mbi kono dä. A yeke la ni polele so mbi wara tâ tene.” Ye ti pekoni ayeke so lo gbian fini ti lo, nga nze mbasambala na pekoni lo wara batême. Biani, anzoni salango ye alingbi ti sala aye mingi!

⁸ Tongana e sala ye nzoni na mbage ti awande so e tingbi na ala, a lingbi e sala ye ti nzoni ‘ahon kue na aita ti e awamabe’ pepe? (aGal. 6:10) Kpengba-ndia so alingbi biani: ‘A lingbi mo yekia lê ti mbakoro zo.’ (Lév. 19:32) A lingbi e kanga lê lâ oko pepe na ndo ti azo tongaso na ngoi ti abungbingo tele ti e.

⁹ Dengingo mê nzoni: Na ngoi ti abungbi ti kongregation, awakua Chrétien ti Nzapa ayeke sala tene ti mu ambeni matabisi ti yingo ti kpengba e. (aRom. 1:11) A yeke duti biani nzoni salango ye pepe na mbage ti e tongana e lango na nduzu, e te bajoka na salango si a so mê ti azo, e sala tene lakue na mbeni zo so aduti na tele ti e, e gue lakue senge senge na kabine, e diko ambeni mbeti so andu bungbi ni pepe, wala e bi bê na ambeni ye nde na ngoi ti bungbi. A lingbi a-ancien aduti atapande na yâ ye so. Anzoni salango ye ti Chrétien ayeke pusu e ti fa tâ yekiango ndo na mbage ti zo so amu diskur nga na mbage ti tokua so lo mu, so aluti na ndo ti Bible, na dengingo mê ti e kue na lo.

¹⁰ Na ndo ni, teti so e yekia wamungo diskur ni nga azo so aga, a lingbi e kanga asinga-me so a yö ni yongo si abuba pepe nzoni tambela ti bungbi ni.

¹¹ Asalango ye nga amolenge: A lingbi ababâ na mama aba lakue lege ti tambela ti amolenge ti ala. Tongana mbeni kete molenge ato nda ti toto wala aduti kpo pepe na ngoi ti bungbi, na ye so asala si azo aduti nzoni pepe, a yeke nzoni ti sigigi na molenge ni hio na ti kaï lo. Ngoi na ngoi ye so alingbi ti duti ngangu, me i dabe ti i, ye so afa so i bi bê ti i na atene ti bê ti azo. Mingi ni ababâ na mama so ayeke na akete molenge so ayeke duti kpo pepe asoro ti duti na peko si ala buba mingi pepe nzoni dutingo ti azo teti so a lingbi ti hunda na ala ti londo na ngoi so bungbi ni ayeke tambela. Biani, tanga ti azo ni alingbi ti fa tâ bingo bê na asewa na ziango ando ti duti so ayeke na peko teti asewa ni, tongana ala ye.

¹² A lingbi ababâ na mama aba nga tambela ti amolenge ti ala kozoni nga na peko ti abungbi. A lingbi amolenge amu loro pepe na yâ Da ti Royaume, teti ye so alingbi ti ga na andao. Ti mu loro na tele ti Da ti Royaume alingbi nga ti duti sioni, mbilimbili na lakui na ngoi so a yeke ngangu ti ba aye nzoni. Salango lisoro na kota go na gigi alingbi ti buba nzoni duti ti avoizin na ti mu mbeni sioni bango ndo na ndo ti vorongo ti e. Ababâ na mama so asala ngangu mingi ti ba ndo na ndo ti amolenge ti ala na yâ Da ti Royaume nga na gigi ni alingbi na gonda teti ye so asala si dutingo ti e na yâ beoko anzere mingi ahon.​—Ps. 133:1.

¹³ Na ndo ti mandango buku: E yekia mingi bibe ti yambango azo ti aita ti e so azi ayanga da ti ala teti abungbi ti kongregation. Tongana e gue na mandango buku, a lingbi e fa yekiango ndo nga nengo ndo teti da ti ala. Kozoni ti tene e lï na yâ ti da ni, a lingbi e mbô gere ti e si e sala pepe saleté na yâ da ni wala na ndo ti atapis. A lingbi ababâ na mama aba ndo nzoni na ndo ti amolenge ti ala, na batango si ala ngbâ gi na mbage ti da so a mu teti mandango buku ni. Atä so bungbi ni alingbi ti duti gi kete na azo aduti nzoni, a lingbi e sala ye ti bê ti e pepe na yâ ada ti ambeni zo. Tongana mbeni molenge aye ti gue na kabine, a lingbi babâ wala mama ti lo ague legeoko na lo. Na ndo ni, teti so mandango buku ayeke mbeni bungbi ti kongregation, a lingbi e yü bongo tongana ti so e yeke yü ka tongana e gue na Da ti Royaume.

¹⁴ Anzoni salango ye ayeke kota ye: Ti sala ye alingbi na anzoni salango ye ti Chrétien asala pepe gi nzo tene na ndo ti kusala ti e me amaï nga anzoni songo na popo ti azo. (2 aCor. 6:3, 4, 6) Teti e yeke awavorongo Nzapa so ayeke na ngia, a lingbi e ba so a yeke ngangu pepe na e ti he ngia, ti duti nzoni na azo, na même ti sala akete ye ti nzoni so amu ngia na ala. Akota lengo so ti nzoni salango ye ayeke sala si fini ti e tongana azo ti Nzapa aga pendere mingi ahon.