Zia Hungo Tele na ndo so Alingbi
1 Na yâ angoi ti ngangu so, e kue e yeke na bezoin ti sala ngoi na ngoi mbeni ye nde. Mbeni nzoni wungo ti gbotongo tele ayeke na lege ni. Ye oko, ti mu ngoi mingi na yâ hungo tele, salango ngia, nga na yâ bungbingo tele alingbi ti sala si mbeni zo amu ngoi mingi mbeni pepe na aye ti yingo. A lingbi e zia hungo tele na ndo so alingbi. (Mat. 5:3) E lingbi ti sala ni tongana nyen? Na salango ye alingbi na wango so e wara na aÉphésien 5:15-17, NW.
2 Zia akatikati: Paul asû na mbeti so a lingbi aChrétien ‘abata nzoni’ si ala duti na fini na lege ti ndara. A hunda ti sala ye na lege ni nga ti duti na ngangu ti kanga nzala ti tele ti bata si ngoi ti hungo tele angbâ biani na ndo so alingbi. A yeke nzoni ti bi bê ngangu na lege so e yeke sala kusala na angoi ti e so angbâ senge senge. A lingbi salango ngia aga na aye ti nzoni ahon ti sala si e ba so e buba ngoi ti e senge senge wala ti sala si tele ti e anze. Tongana, na peko ti mbeni kusala so e sala, e ba so a yeke gi senge senge, a mu ngia pepe, na so na mbeni kete mbage, tene ayeke na li ti e, ye so alingbi ti fa so a lingbi e gbian ambeni ye na yâ ngoi so e sala na kusala.
3 Sala ye na lege ni: Paul amu wango na ndo ‘vongo ngoi so alingbi’ teti aye so ayeke kota na yâ fini, na gango pepe “azo so asala ye kirikiri.” A-Chrétien so amu tele ti ala na Nzapa alingbi pepe ti zia si fini ti ala angoro gi na ndo hungo tele. Atä so hungo tele na gbotongo tele alingbi ti kiri ti mu na e ngangu na lege ti mitele, lingu ti warango ngangu na lege ti yingo ayeke ngangu ti Nzapa so asala kusala. (Es. 40:29-31) E wara yingo ti lo na lege ti akusala ti théocratie tongana mandango Bible, guengo na abungbi ti kongregation, mungo mbage na yâ kusala ti fango tene, me pepe na lege ti salango ngia.
4 Zia aye na kozo ndo: Paul afa na aChrétien ti “ngbâ ti gbu nda ti ye so bê ti Jéhovah aye.” Jésus afa so a lingbi akusala ti e aluti gi na ndo Royaume ti Nzapa tongana kozo ye na yâ fini ti e. (Mat. 6:33) A yeke kota ye ti tene e sala kozoni kue aye so ayeke mu ande lege na e ti duti na fini alingbi na mungo tele ti e na Jéhovah. Na pekoni, e lingbi ti zia ngoi ti hungo tele na ndo so alingbi. Tongana e sala ye so, a yeke sala ande ye ti nzoni mingi na ndo ti e, na e yeke wara ngia dä mingi ahon.—Zo-ti-fa-tene 5:12.