Sala kusala na ngoi ti mo na ndara
1 Nzara so e yeke na ni ti nzere na Jéhovah apusu e ti leke fini ti e si aluti gi na ndo ti aye ti yingo. Tënë ti lo awa e ti “gi royaume” kozoni, na ti “hinga ye so ayeke nzoni ahon”. (Mat. 6:33; aPhil. 1:10). Tongana nyen si e lingbi ti vo ngoi ngbanga ti aye ti yingo na ti zia akusala so ayeke kota ye pëpe na place ti ala?—aEph. 5:15-17.
2 Zia akusala ti Royaume na kozo ndo: Leke mbeni nzoni kapa si asenge kusala abuba ngoi ti mo kue pëpe. Na tongo nda ti nze oko oko, ambeni zo ayeke zia na yâ calendrier ti ala mbeni kapa teti kusala ti fango tënë. Na pekoni, ala zia pëpe si ambeni kusala nde akanga lege na kapa so ala leke. E lingbi nga ti leke mbeni kapa teti abungbi, ti manda ye e mveni na ti gue na akota bungbi ti e. Aita mingi aleke mbeni kapa ti lango oko oko so ato nda ni wala ahunzi na dikongo Bible. Leke mbeni mbilimbili ngoi teti kpengba kusala oko oko na zia si ambeni senge ye akanga lege na ye so mo leke pëpe.—Zo-ti. 3:1; 1 aCor. 14:40.
3 Gbanzi tele ti sala ambeni ye: Na yâ ti ambeni kodoro, a lingbi ti wara aye ti awanguru, aye ti ngia, aye so aleke ngbanga ti angoi ti wungo tele, aye so azo aye ka tënë ni mingi wala ambeni ye nde nde so azo ayeke tomba pekoni. Ambeni zo ayeke mû ngoi mingi ti bâ gi limon wala ti sala ngia na ordinateur. Ye oko, tongana e mû ngoi ti e mingi ti sala gi ngia wala ti gi ti wara afini ye so sese ti laso ayeke sigigi na ni, e yeke wara ye ti vundu na pekoni (1 Jean 2:15-17). Tongaso, Bible awa e ti sala ye ahon ndo ni pëpe na aye ti sese so (1 aCor. 7:31). Tongana mo yeda na wango ti ndara so, mo yeke fa na Jéhovah so vorongo lo aga na kozo ndo na yâ fini ti mo.—Mat. 6:19-21.
4 Ngoi so angbâ na sese ti laso ayeke mingi pëpe. Ala so azia aye ti Royaume na kozo ndo ayeke wara ngia nga na nzobe ti Nzapa (aProv. 8:32-35; Jacq. 1:25). Tongaso, zia e sala kusala na ndara na ye ti e ti ngele ngangu, so ayeke ngoi ti e.