Adeba Nzoni Ndali ti Fango Bê ti Kiri Singila Teti Ndoye ti Jéhovah: Mbage 1

¹ Bazengele Jean asû la ni na mbeti: “E yeke na ndoye, teti Lo [Jéhovah a] ndoye e kozoni.” (1 Jean 4:19) Tongana e bi bê na ndo aye kue so Jéhovah amu na e, ye apusu e ti fa na gigi kota bê ti kiri singila ti e nga. Jésus azia la ni tapande ni na salango na bê kue tene ti témoin na ndo iri ti Nzapa nga na ti Royaume. (Jean 14:31) A yeke duti nzoni teti e ti ba ambeni lege so e lingbi ti fa na gigi bê ti kiri singila ti e teti ndoye ti Jéhovah nga na adeba nzoni so aga na pekoni.

² Guengo da na da: Jésus a fa la ni na adisciple ti lo tongana nyen ti sala kusala ti fango tene ti Royaume. Afango lege ti lo afa polele so ala yeke gue da na da, na kangbingo nzo tene. (Luc 9:1-6; 10:1-7) A hunda ndoye teti Nzapa nga teti azo so ayeke ndulu na e ti ngbâ ti gue da na da tongana e tingbi na azo so asala nzala ti tene ni pepe nga ala so ake tene ni. Ye oko, na guengo da na da, e mveni e yeke wara ye ti nzoni ngbanga ti so mabe ti e na hingango ye biani na bê ti e ayeke kpengba mingi ahon, nga beku ti e ayeke za ngangu ahon.

³ Teti e yeke sala kusala na gbe ti fango lege ti a-ange, e wara azo mingi so asala nzala ti tâ tene tongana nzala ti kobe na ti ngu. (Apoc. 14:6) Ambeni zo atene ala yeke sambela ti wara mungo maboko na ngoi so mbeni Témoin aga na yanga-da ti ala. Ambeni Témoin use nga na mbeni kete molenge ague la ni da na da na ndo mbeni zoa ti Caraïbes. Tongana akota zo ni ayeda ti kiri na kodoro, kete molenge ni ague na li ni gi lo oko na mbeni yanga-da na lo pika ni. Mbeni maseka wali azi yanga-da ni. Tongana akota zo ni aba tongaso, ala gue asala lisoro na lo. Lo tisa ala ti lï na yâ da ti lo na lo fa so lo londo ti sambela Nzapa ti to aTémoin ti fa Mbeti ti Nzapa na lo!

⁴ Fango tene na lege: Teti so a yeke ngangu na ambeni ndo ti wara azo na yanga-da, fango tene na lege ayeke mbeni kode so alë lengo ti fa tene na azo. Na ndo ni, azo mingi alango na yâ abungbi ti ada so gbagba angoro ni wala ada so abata yanga ni ngangu, ando so e lingbi pepe ti fa tene dä da na da. Ye oko, bê ti kiri singila ti e teti ndoye ti Jéhovah apusu e ti kamata alege oko oko kue, so na popo ni e yeke wara fango tene na lege, ti mu na azo tokua ti Royaume.​—aProv. 1:20, 21.

⁵ Salango afini vizite: Teti so e yeke gi azo so “ahinga ye ti yingo atia ala,” e ye ti sala ngangu kue ti kaï nzala so. (Mat. 5:3) Ye so ahunda e ti kiri ti zia ngu na ndo alê ti tâ tene so e lu awe. (1 aCor. 3:6-8) Mbeni ita-wali na kodoro ti Australie azia mbeni tract na mbeni wali so a ba a tene lo fa na gigi mingi pepe nzala ti tene ni. Ye oko, ita-wali ni atara lakue ti wara lo na da ti lo. Na nda ni, tongana lo wara tele na lo, ita ti e ti wali aba so na peko ti kozo vizite ni, wali ni avo mbeni Bible ti ngele ngangu. Ita-wali ni ato nda ti manda ye na lo!

⁶ Mandango Bible na azo: A lingbi ti duti mbage ti kusala ti e so amu ngia na aga na e ye ti nzoni mingi ahon. So tâ deba nzoni ti mu maboko na azo ti manda ye na ndo Jéhovah, ti ba so ala gbian ye na yâ ti fini ti ala ti nzere na lo, nga, na pekoni, ti duti témoin ti batême ti ala ti Chrétien so ayeke fä ti mungo tele ti ala na Nzapa!​—1 aThes. 2:20; 3 Jean 4.

⁷ Na yâ mbeti ti peko, fade e yeke ba ambeni lege nde so na yâ ni e yeke wara deba nzoni na lege ti fango bê ti kiri singila teti ndoye ti Jéhovah.