Adeba Nzoni Ndali ti Fango Bê ti Kiri Singila Teti Ndoye ti Jéhovah: Mbage 2
1 Na yâ mbage oko na ndo kota tene so e ba na yâ nze so ahon, e gboto lê la ni na ndo alege osio so e lingbi ti fa bê ti kiri singila ti e teti ndoye ti Jéhovah na yâ fango tene. (1 Jean 4:9-11) Ge, e yeke ba ande ambeni lege oku na ndo ni so e lingbi ti fa ni. Fade e yeke wara deba nzoni, tongana e mu mbage ti e kue na ngia na yâ mungo maboko na ambeni zo na lege ti yingo.
2 Fango tene na lege kue so azi: So ayeke mbeni lege so alë lengo ti wara azo so ayeke na nzala ti kobe nga na nzala ti ngu ti mbilimbili na ti zia na ala ambeti so alingbi ti mu maboko. A yeke nzoni ti ‘vo ngoi so alingbi’ na ti fa tene na alege kue so azi, nga na azo kue so e tingbi na ala. (aEph. 5:16) A lingbi peut-être e tomba mbito ti fa tene na lege so, ye oko, tongana e ba na nene ni ndoye ti Nzapa na abezoin ti azo, e yeke fa tene ande na alege kue so azi.—2 Tim. 1:7, 8.
3 Mbeni ita-koli missionnaire awara la ni kota futa teti lo to nda ti sala lisoro na mbeni koli so ayeke ndulu na tele ti lo na yâ mbeni taxi. Koli ni asala nzala ti tene ni. Missionnaire ni asala avizite mingi na lo, nga na pekoni ala to nda ti manda Bible. Koli ni aga na yâ tâ tene na lo gue na li ni mingi juska ti ga mbeni ancien na yâ kongregation!
4 Sungo alettre: E yeke peut-être na lege pepe ti fa tene da na da teti so e yeke na ambeni kpale ti kobela wala angoi so ayeke nzoni pepe. E lingbi ti sû alettre so na yâ ni e fa tene na azo so e hinga ala, ala so aglisa azo so ala ndoye na yâ kui, wala ala so e lingbi pepe ti wara ala na da na yâ territoire. E lingbi ti zia na yâ enveloppe mbeni oko ti atract ti e so alingbi, so ayeke na pendere tokua ti e so aluti na ndo Bible, na so amu wâ na zo so a wara mbeti ni ti kiri tene tongana lo yeke na ambeni hundango tene. Sala kusala na adresi ti mo mveni wala ti Da ti Royaume; zia pepe adresi ti biröo ti filiale.
5 Fango tene na singa-me: So ayeke mbeni nzoni lege ti wara azo so e lingbi pepe ti tingbi na ala na yâ fango tene ti e da na da. Tongana e sala ni na lege ti ndara, na lege ti nzobe, nga na lege ti kode, e lingbi ti wara tâ nzoni kiringo tene. Kusala ti Royaume ti nze ti février ti ngu 2001, alembeti 5 ti si na 6, a mu awango so alingbi ti mu maboko na ndo lege ti wara anzoni ye ti pekoni.
6 Tongana mbeni ita-wali ayeke fa tene la ni na lege ti singa-me, lo hunda na mbeni wali wala lo bi bê la ni mingi na ndo kekereke ti lo na ti sewa ti lo. Wali ni ayeda. Lo fa na gigi so teti so lo hinga pepe ye so lo lingbi ti sala, lo duti gi lo oko na da. Teti so lo ba tâ gingo bê ti ita-wali ni, wali ni ayeda ti tingbi na lo na gala so ayeke ndulu. Na nda ni, wali ni a duti ndulu ti yeda ti manda Bible!
7 Yambango Awande: Tongana e ndoye azo so ayeke ndulu na e, fade e yeke duti ndulu ti ba mbeni wande so aga na bungbi ti e, na e sala si lo ba so e yamba lo nzoni. (aRom. 15:7) Zia lo ba so lo yeke na popo ti ala so abi bê biani na ndo nzoni duti ti lo na lege ti yingo. Tâ gingo bê ti e nga tisango lo ti manda Bible na e, alingbi ti pusu lo ti yeda na mungo maboko ti e.
8 Nzoni tambela ti e: E yeke sepela tâ tene na lege ti nzoni tambela ti e. (Tite 2:10) Tongana azo na ndo sese asala tene nzoni na ndo aTémoin ti Jéhovah, ala yeke mu gonda na Nzapa ti e. (1 Pi. 2:12) Ye so nga alingbi ti mu maboko na ambeni zo ti to nda ti tambela na lege ti fini.
9 Ngbanga ti nyen ti kiri pepe ti ba alege oku so ti fa bê ti kiri singila teti kota ndoye ti Jéhovah na mbage ti e, na ti sala ye alingbi na ni? (1 Jean 4:16) Tongana mo sala tongaso, fade mo yeke ko adeba nzoni mingi.