Mo yeke sala ngangu kue ti diko na ti sû mbeti?

¹ Tongana zo aye ti wara tâ hingango ye na ndo Nzapa nga na ndo aye so lo leke ti sala, a hunda na lo ti manda ye mingi. Azo mingi abâ so ti hinga ti diko na ti sû mbeti ayeke mbeni kelele so alingbi ande ti zi lege na zo ti mû mbage ti lo nzoni ahon na yâ vorongo Jéhovah Nzapa (Apoc. 1:3). Fadeso mingi ti azo ahinga ti diko na ti sû mbeti na lege ti a-ekole so a leke na yâ mingi ti akongregation ti e. Tongana brochure I sala ngangu kue ti diko na ti sû mbeti (ay-Sg) ayeke dä, ni la si a yeke sala na kusala ti mû maboko na a-élève ni. Aye mingi afa biani so brochure so amû lege na zo ti manda ti diko na ti sû mbeti na yâ mbeni kete ngoi.​—1 Tim. 4:13; Mat. 24:45.

² Lege ti leke na ekole ti mandango mbeti: Bâ kete tënë so e lingbi ti wara na yâ brochure ni na ndo lege ti leke ekole ti manda mbeti: “Legeoko tongana ti Ekole ti Kusala ti Théocratie, awafango tënë so awara batême awe na ala so ade ti wara batême pëpe alingbi ti zia iri ti ala na a-ekole ti mandango mbeti. Tongana a-ancien abâ so a yeke nzoni ti leke ekole ti diko na ti sû mbeti ni oko wala mingi ahon, a lingbi ala zia na ndo ni mbeni zo so alingbi ti mû li ni . . . Tongana lege ayeke dä, a lingbi a duti aita-koli si ayö kungba ti fango ye so. Ye oko, tongana mbeni ita-koli so alingbi ti mû li ni ayeke dä pëpe, lege ayeke dä ti hunda na mbeni ita-wali so alingbi, ti sala ni . . . A-ancien alingbi ti hunda na mbeni ita-wali ti mû li ni na yâ mbeni ekole so gi aita-wali si ayeke dä wala na yâ ti mbeni so abungbi gi amolenge-koli na amolenge-wali so ade ti wara batême pëpe. Teti so ita-wali ni amû place ti mbeni ita-koli na yâ fango ye, a lingbi lo kanga mbeni ye na li ti lo. Na ndo kue so lege ti sala ni ayeke dä, a yeke duti nzoni mingi tongana a-ekole ni alingbi tambela fani use wala ota na yâ ti yenga oko, tongaso si awamandango mbeti ni alingbi ti gue na li ni hio. Na popo ti amandango ye use, fade amû mbeni kua ti sala na kodoro na wamandango mbeti ni, so fade wafango ye ni ayeke bâ ni kozo na tongo nda ti mandango ye ti peko. A lingbi amanda mbeti ni na mbeni ngoi so alingbi teti mingi ti azo ni. Ambeni ayeke kangbi yâ ti ekole ni na akete kete bungbi na ala yeke fa mbeti dä kozoni na mandango buku ti kongregation. Ambeni nde ayeke kangbi yâ ti a-ekole ni na ala fa mbeti na ngoi ti Ekole ti Kusala ti Théocratie. A yeke bungbi ti a-ancien na yâ ti kongregation si ayeke fa ngoi nga na ndo ti a-ekole ti mandango mbeti ni.”

³ Jéhovah Nzapa so ayeke Wasalango e, acréé e na pendere ngangu so e yeke na ni ti diko na ti sû mbeti. Ye oko, tongana mbeni zo asala ngangu pëpe, lo lingbi nga pëpe ti wara akode so. Tongana mbeni zo amanda ti diko na ti sû mbeti, kota matabisi wa lo yeke wara na pekoni? A yeke ti so lo lingbi ti mû Bible na ti sala ye alingbi na wango-tene so ti Nzapa: ‘A lingbi mo diko ye na yâ ni na kete go lâ na bï’.​—Jos. 1:8.