Kasete vidéo so a lingbi zo agbu li ti lo dä nzoni

“Kasete vidéo so apusu zo biani ti gbu li!”

“Kasete vidéo so apika bê ti mbi mingi!”

“Kasete vidéo so andu bê ti mbi ngangu!”

¹ A yeke ye so asi na mo ti kozoni na peko ti so mo bâ kasete vidéo Les jeunes s’interrogent. . . Comment se faire de vrais amis? Lani, mbeni ita-koli so ade maseka awara ambeni kpale ndali ti akamarade so lo yeke na ni. Ala sara si nzara ti tâ tënë asigigi na yâ ti lo nga yâ ti songo ti lo na Jéhovah abuba. Me tongana a sigigi na kasete vidéo so, lo sû tënë so, lo tene: “Lakue tongana mbi yeke bâ kasete so, ngu ti lê ti mbi ayeke yuru. Mbi kiri singila na Jéhovah ndali ti so lo mû maboko na mbi na tâ ngoi ni.” Kasete vidéo so asara si lo gbian fini ti lo nga lo wara anzoni kamarade. Lo kiri lo tene: “Ala so asara kasete so, e bâ biani so ala hinga ye nzoni mingi na ndo ti aye so ayeke si na amaseka.” Ababâ na mama nga na amaseka, ala lingbi ti kiri ti bâ kasete so na ngoi ti mandango ye ti sewa ti peko? Zia si limon ni aluti na ndo ti ambage oko oko, na ala sara lisoro polele na ndo ti ahundango tënë so ge.

² Akozo tënë ni: Tâ kamarade ayeke zo wa?​—aProv. 18:24.

³ Aye so akanga lege na zo ti sara kamarade: Tongana mo bâ so mo yeke gi mo oko, mo lingbi ti hon ndo ni tongana nyen? (aPhil. 2:4). Ngbanga ti nyen a lingbi mo duti nduru ti gbian asarango ye ti mo si a ga nzoni? Zo wa alingbi ti mû maboko na mo ti sara ni? Nyen la alingbi ti mû lege na mo ti sara kamarade mingi? Mo lingbi ti wara ala na ndo wa?​—2 aCor. 6:13.

⁴ Sarango kamarade na Nzapa: Mo lingbi ti lë kota songo na Jéhovah tongana nyen? Nzoni ti nyen la mo yeke wara dä? (Ps. 34:9). Zo wa la alingbi ti mû maboko na mo ti kpengba songo ti mo na Jéhovah?

⁵ Asioni kamarade: Ala yeke azo wa? (1 aCor. 15:33). Tongana nyen asioni kamarade alingbi ti gue na zo ti tï na lege ti yingo? Tondo so Bible afa na ndo Dina atene nyen na mo?​—Gen. 34:1, 2, 7, 19.

⁶ Mbeni ye so asi na ngoi ti e: So Tara abâ tere ti lo lo yeke gi lo oko, a sara nyen na ndo ti lo? Tongana nyen lo gi ti fa so ti sara kamarade na azo ti gigi ayeke sioni pëpe? Kpale wa ala zia lo na lê ni? Ngbanga ti nyen babâ na mama ti lo abâ kpale ti lo ni pëpe? Me ala sara nyen ti tene lo kiri lo duti na nzoni songo na Jéhovah? Nyen la mbeni ita-wali pionnier asara ti fa so lo yeke mbeni nzoni kamarade ndali ti Tara? Ngbanga ti nyen a lingbi aChrétien asara ye tongana ti so aProverbe 13:20 nga na Jérémie 17:9 ahunda? Kpengba ye wa Tara amanda ni?

⁷ Ti hunzi na ni: Mo manda nyen na bango kasete vidéo so? Mo lingbi ti sara kusala na ni tongana nyen ti mû maboko na azo?​—Ps. 71:17.