Mabe ti e apusu e na anzo kusala
1 Mabe apusu lani Noé, Moïse, na Rahab ti sala mbeni ye. Noé aleke arche. Moïse ake ti wara anzoni ye ti fini na yangbo ti Pharaon ti kete ngoi. Rahab ahonde awakala, na pekoni lo mä wango-tene ti ala, si lo sö fini ti sewa ti lo (aHéb. 11:7, 24-26, 31). Anzo kusala wa mabe ti e apusu e ti sala laso?
2 Fango tënë: Mabe apusu e ti sala tënë na ndo kpengba Nzapa ti e, nga na ndo aye so lo leke ti tene e wara ngia teti lakue lakue (2 aCor. 4:13). Na ambeni ngoi, e yeke na mbito ti fa tënë. Me tongana e ‘zia Jéhovah na gbele e lakue,’ e yeke wara ngangu na mbito ti e akaï (Ps. 16:8). Na pekoni, mabe ti e apusu e ti fa nzo tënë na afami ti e, avoizin, akamarade ti place ti kua, ti ekole, na ambeni zo nde nga so e wara ala tongana lege azi na e.—aRom. 1:14-16.
3 Ti bungbi legeoko na aita: Guengo lakue na bungbi ayeke mbeni nzo kusala so mabe apusu zo ti sala. Tongana nyen? Ti ga lakue na bungbi afa so e mä na bê biani so Jésus ayeke na popo ti e na lege ti yingo vulu ti Nzapa na ngoi ti abungbi ti e ti Chrétien (Mat. 18:20). A fa nga na gigi so e yeke na nzala ti ‘mä ye so yingo atene na akongregation.’ (Apoc. 3:6). E yeke bâ na nene ni wango so e wara, teti lê ti e ti mabe abâ so a yeke Kota Wafango ye, Jéhovah, si ayeke fa ye na e.—Es. 30:20.
4 Aye so e soro ti sala: Kpengba mabe na aye so lê abâ pëpe ayeke pusu e ti zia aye ti yingo na kozo ndo na yâ fini ti e (aHéb. 11:1). Fani mingi ye so ahunda na zo ti zia lege ti ambeni ye ti mitele. Na tapande, mbeni ancien ake ti sala mbeni kua ti nginza so alingbi ti mû na lo mosoro mingi teti a yeke hunda ande na lo ti manke abungbi, ti zia sewa ti lo ti gue na yongoro ndo, na a yeke kanga lege na kusala ti lo ti pionnier. Legeoko nga, a lingbi e zia bê kue na beku so Mbeti ti Nzapa amû na e, so atene fade Jéhovah amû ye na ala so ‘agi royaume na mbilimbili ti Lo kozoni’.—Mat. 6:33.
5 Azo ayeke bâ ngangu so mabe ayeke sala na ndo fini ti e. Biani, a hinga mabe ti e na ndo sese kue (aRom. 1:8). Ni la, zia e kue e fa na gigi na lege ti anzo kusala, so mabe ti e ayeke na fini.—Jacq. 2:26.