Yungo bongo na lekengo tele na lege ni

¹ Tondo na yâ mbeni mbeti-sango atene: “Akoli ni kue, même amolenge-koli, ayü cravate. Awali ni kue, amaseka-wali, na akete molenge-wali kue ayü robe wala jupe. A yeke wara pëpe mbeni zo so ayü jean wala mbeni chemise kirikiri sân cravate pëpe. Zo kue ge ayeke na ngia.” Azo wa si a yeke sala tënë ti ala? Mbeni bungbi ti azo ti poroso? Azo so ague na ngia ti awanguru? Azo so ague na pikango mozoko ti rock? Oko Pëpe! A yeke sala tënë ti aita-koli na aita-wali so abungbi place oko na ngoi ti mbeni kota bungbi ti district ti ngu so ahon.

² Na gbata so na yâ ni a sala nga mbeni kota bungbi dä, mbeni wasungo tondo teti mbeni mbeti-sango asala tënë so na ndo ti aTémoin so ague mingi mingi kâ: “Akoli ni kue ayeke propre, na ala yü costume na cravate. Awali ni ayü abongo so alingbi, na ala yeke pendere na yâ ni.” Mbeni use zo ni, so ayeke kâ ti sala sinziri atene: “I yeke azo so aduti kpô, azo so ayekia azo, i yeke propre, na aye ti i kue ayeke na lege ni. Ye so mbi bâ anzere. Atâa so sese so asi singo na zende, i yeke sala ngangu kue ti zi azende!” So tâ pendere tënë na ndo ti e! E yeke kiri singila pëpe teti so a sala nzoni tënë ti bungbi ti e kue ti aita? Biani, na lege ti lekengo tele nzoni, zo oko oko kue amû maboko ti tene a sala nzoni tënë ti e.

³ Na ndo sese kue, azo ahinga so e yeke nde na lege ti lekengo tele ti e (Mal. 3:18). Ngbanga ti nyen? Ngbanga ti so e yeke mä gbotongo mê so ahunda ti ‘yü bongo so alingbi, na kota bê pëpe, na ndara ti bata tele ti e mveni, me e yü kusala nzoni so alingbi na e so atene e yeke bata tënë ti Nzapa.’​—1 Tim. 2:9, 10.

⁴ Yungo bongo na lekengo tele ti mo afa nyen? Bongo so e yeke yü nga lege so e yeke yü na ni afa ye mingi na ndo e mveni: aye so e mä na bê dä, bango ndo ti e, nga na abibe ti e. Lege so e soro ti yü na bongo afa mara ti zo wa e yeke, nga dutingo ti e. A lingbi e yeda lâ oko pëpe na sioni bibe nga na asioni salango ye, so azo ayeke maï ni na ndo sese kue laso. Ye so e ye ayeke pëpe ti bâ wala abongo ti e alingbi mbilimbili na mode ti ngoi ni, me ti bâ wala alingbi biani na zo so atene lo yeke wakua ti Nzapa (aRom. 12:2). A hon ti soro mbeni kode ti yungo bongo wala ti lekengo tele so afa na gigi bibe ti salango gi ye so bê ti zo mveni aye wala so afa mbeni zo tongana zo so andoye pitan, e ye ti fa so e yeke “mû gloire na Nzapa” biani.​—1 Pi. 2:12.

⁵ Ngoi na ngoi, mbeni zo so aga fini fini, so ayeke na kode mingi pëpe, wala so awoko na lege ti yingo alingbi ti yeda na ye so sese ayeke fa na ndo yungo bongo na lekengo tele. Lo yeke yeda na ni sân ti bâ kozoni ye so salango aye tongaso alingbi ti ga na ni na ndo Jéhovah nga na bungbi ti Lo. E kue e gi ti bâ gbe ti bê ti e mveni, ti bâ wala bibe ti sese so ayeke sala ngangu na ndo e. E lingbi ti hunda na mbeni ita-koli wala ita-wali so azo ayekia lo, so ayeke biazo na lege ti yingo, ti fa tënë ti bê ti lo na ndo lege ti yungo bongo na ti lekengo tele ti e. Na pekoni, a lingbi e gi nda ti awango so lo mû na e nzoni.

⁶ Ambeni ita ayeke ndulu ti yeda so tongana ala gue na kota bungbi, a lingbi ala sala hange na lege ti yungo bongo ti ala. Ye oko, na pekoni, na ambeni ngoi nde na akapa ti bungbi ni, ala yeke yü abongo so akpa pëpe. Bata akpengba-ndia ti nzoni ahon na ndo yungo bongo so alingbi na aChrétien (2 aCor. 6:3, 4). Na ndo kue so azo alingbi ti bâ e dä, abadge ti e, yungo bongo ti e, nga na lekengo tele ti e afa e tongana aTémoin ti Jéhovah. Ni la, a lingbi yungo bongo ti e aduti nzoni na alingbi, na fango na gigi so e yeke “ti sese so pëpe”.​—Jean 15:19.

⁷ Zia e sala ye kue so e lingbi ti sala na ngoi ti Kota Bungbi ti District “Awakua ti Royaume so ayeke na wâ” ti fa so e yeke ‘azo ti nzoni-kue teti L’Eternel Nzapa ti [e]’. Fade anzoni ye ti pekoni ayeke ‘sepela, amû gloire, na ayâ iri’ ti Jéhovah.​—Deut. 26:19.

[Encadré na lembeti 6]

Lege ti mû gloire na Jéhovah:

■ Yü bongo na lege so alingbi na wakua ti Nzapa.

■ Ke yungo bongo so afa na gigi bibe ti sese so.

■ Yü bongo ti kirikiri pëpe. Tongana mo yü nzoni, a yeke fa na gigi so mo yeke na ndara.