Fa tokua ti Royaume
1 “A yeke ngbanga ti Mbi ti fa Tene-nzoni ti royaume ti Nzapa . . . teti A to Mbi teti tënë so.” (Luc 4:43). Na lege ti atënë so, Jésus afa kota tënë so lo ga ti sala tënë na ndo ni: Royaume ti Nzapa. Tokua so e yeke fa laso aluti nga na ndo Royaume, tongana ti so a sala tënë ni na Matthieu 24:14: “Fade a fa Tene-nzoni so ti royaume na sese so kue teti tënë ti témoin na amara kue; na tongaso fade nda ni aga.” A yeke nzoni azo amä atâ tënë wa na ndo Royaume?
2 Royaume ti Nzapa akomande fadeso na yayu, nga na yâ ngoi kete, lo yeke ga ande ti lungula akomandema kue ti azo. A tomba Zabolo na yayu awe, na sioni bungbi ti aye ti fadeso aga ndulu ti hunzi (Apoc. 12:10, 12). Fade a yeke futi biaku biaku sioni sese ti Satan. Ye oko, fade Royaume ti Nzapa ayeke yengi pëpe. Lo yeke ngbâ ande teti lakue lakue.—Dan. 2:44; aHéb. 12:28.
3 Fade Royaume ayeke kaï atâ nzara kue ti azo kue so amä yanga. Fade lo yeke lungula pasi so bira, fango zo, salango ngangu na zo, na yere aga na ni (Ps. 46:9, 10; 72:12-14). Fade zo kue alingbi ti wara kobe so asi singo (Ps. 72:16; Es. 25:6). Akobela na akpale ti tele so abuba ayeke ga ande gi ngbele ye (Es. 33:24; 35:5, 6). Tongana azo ayeke gue na li ni ti ga nzoni-kue, fade sese ayeke ga mbeni paradis, na fade azo ayeke duti be-oko.—Es. 11:6-9.
4 Lege so e yeke duti na fini fadeso afa so e ye ti duti na gbe ti Royaume ti Nzapa. A lingbi tokua ti Royaume asala ngangu na ndo fini ti e kue, so a ndu aye so e zia na gbele e ti sala, na aye so e zia na kozo ndo. Na tapande, atâa so e yeke na kungba ti mû ye teti azo ti sewa ti e, e lingbi pëpe ti zia lege na agingo bê teti aye ti mitele ti kanga ndo ti aye ti Royaume (Mat. 13:22; 1 Tim. 5:8). Nde na so, a lingbi e bata wango ti Jésus so: “Me i gi royaume ti Nzapa na mbilimbili ti Lo kozoni, na fade A mû ye so kue [aye ti mitele so zo ayeke na bezoin ni] na i nga.”—Mat. 6:33.
5 Kota ye ni ayeke ti tene azo amä tokua ti Royaume, na asala ye alingbi na ni, na ndembe so ngoi angbâ. Zia e mû maboko na ala ti sala tongaso na ‘gingo ti sala si ala yeda na tënë ti royaume ti Nzapa.’—Kus. 19:8.