Fini ye so aleke teti abibliothèque ti Da ti Royaume
A sala angu mingi awe, akongregation na ndo sese kue awara aye ti nzoni na lege ti bibliothèque ti Da ti Royaume ti ala, so ngbele iri ni ayeke bibliothèque ti Ekole ti Kusala ti aChrétien. Giriri, a bâ so a yeke nzoni kongregation oko oko aduti na bibliothèque ti lo mveni. Ye oko, akongregation mingi ayeke sala bungbi fadeso na yâ Da ti Royaume oko, so na popo ni ambeni mingi ayeke ti ayanga ti kodoro nde. Ni la, a bâ so a yeke nzoni ti wara bibliothèque oko, so a leke ni nzoni, na so a lingbi ti wara afini mbeti dä, teti akongregation so atene yanga ti kodoro oko, na yâ Da ti Royaume oko oko. Na yâ Da ti Royaume so ayeke na ando ti bungbi ni mingi, a yeke nzoni ndo oko oko aduti na mbeni bibliothèque teti yanga ti kodoro oko oko so a yeke sala bungbi na yâ ni.
Lekengo ye tongaso ayeke mû ande place na a yeke hunda nginza mingi pëpe. Na ndo ni, ti bungbi abibliothèque ti akongregation use wala mingi ti tene aga gi oko ayeke sala si fade bibliothèque ni akiri aga nzoni mingi. Tongana a yeke bungbi abibliothèque so, a lingbi ti bata atanga ti abuku so angbâ, na ti sala kusala na ni mbeni lâ na ngoi so a leke afini Da ti Royaume. Tongana Da ti Royaume ayeke na mbeni ordinateur na CD-ROM ti Watchtower Library, ambeni ita ayeke bâ ande so gbakuru so ayeke mû maboko mingi.
Fade mbeni ita oko, mbilimbili mbeni oko ti asurveillant ti Ekole ti Kusala ti aChrétien ayeke bâ ndo na ndo bibliothèque oko oko ti Da ti Royaume. Yeke yeke, a yeke nzoni lo zia ambeni mbeti na ndo ni ti tene alingbi kue. Lo yeke sû mbeti pendere na ndo ni oko oko ti fa so a yeke ti bibliothèque ti Da ti Royaume. Kamême fani oko na yâ ti ngu oko, a yeke nzoni lo bâ wala ambeti so ayeke na yâ bibliothèque ni agirisa pëpe, na ti hinga biani so ambeti ni angbâ nzoni. A yeke sigigi pëpe na ambeti so ayeke na yâ bibliothèque ti Da ti Royaume.
Azo kue so ayeke na yâ ti kongregation angbâ lakue ti bâ na nene ni mingi bibliothèque ti Da ti Royaume. Zia e mveni e fa so e bâ na nene ni lekengo ye so na batango ambeti ni nzoni, nga na salango kusala na ni ti gi ‘tâ hingango ye ti Nzapa.’—aProv. 2:5.