Aye so a leke ti tene e wara ando ti voro Jéhovah dä

A MÛ yanga na atâ wavorongo Jéhovah ti bungbi oko ti tene a fa ye na ala nga ti tene ala kpengba terê na popo ti ala (aHéb. 10:23-25). Kozo ndo so azo ti Israël, awakua ti Nzapa so lo soro ala, avoro lo dä giriri ayeke “tabernacle” so a iri ni nga “tente ti bungbi”. (Ex. 39:32, 40). Na pekoni Salomon, molenge ti David, aleke mbeni da, wala temple, ndali ti gloire ti Nzapa (1 aGbia 9:3). Na peko ti so a futi temple ni lani na ngu 607 kozo na ngoi ti e, aJuif ayeke bungbi ti voro Nzapa na yâ ti ambeni da so ala iri ni synagogue. A si na mbeni ngoi, a kiri a leke temple ni si akiri aga ndo so a yeke voro Nzapa dä na lege ni. Jésus afa ye lani na yâ ti asynagogue nga na yâ ti temple (Luc 4:16; Jean 18:20). Jésus asara même bungbi na ndö ti mbeni hoto.—Mat. 5:1—7:29.

² Na peko ti kuâ ti Jésus, aChrétien asara abungbi na ambeni ndo so zo kue alingbi ti ga dä. Ala sara nga abungbi na yâ ti ada ti aita ti fa Mbeti ti Nzapa nga ti bungbi oko na amba ti ala awamabe (Kus. 19:8, 9; aRom. 16:3, 5; aCol. 4:15; Phm. 2). Na ambeni ngoi, a lingbi akozo Chrétien ni abungbi na hondengo ni ti tene ala sara abungbi, si azo so asara aye ti ngangu na ala ahinga ni ape. Biani, awakua be-ta-zo ti Nzapa so asara na lo giriri aye lani tâ na bê ti ala kue ti bungbi na ando so a yeke voro Nzapa dä ti tene ‘Jéhovah afa ye’ na ala.—És. 54:13.

³ Laso nga kue, aChrétien angbâ ti sara abungbi na da ti aita nga na ando so zo kue alingbi ti ga dä. Mingi ni, abungbi so a yeke sara na da ti aita ayeke abungbi ti fango tënë. Aita so ayeda ti tene a sara abungbi so na ndo ti ala abâ ni tongana mbeni pasa. Aita mingi atene so ala wara aye ti nzoni mingi na lege ti yingo na ziango da ti ala ti tene a sara abungbi dä.

DA TI ROYAUME

⁴ Kozo ndo so aTémoin ti Jéhovah ayeke sara bungbi ti ala dä ayeke Da ti Royaume. Mingi ni, a yeke vo mbeni ndo ti tene a leke mbeni fini Da ti Royaume dä, wala a yeke leke gï peko ti mbeni ngbene da. Na ambeni ndo ni, acongrégation gbani la ayeke sara bungbi na yâ ti Da ti Royaume oko, tongana a bâ so sarango tongaso la ayeke nzoni wala ayeke mû lege ti tene a buba nginza kirikiri ape. Ti ambeni ndo ni, a yeke nzoni ti tene a loué gï mbeni da louengo. Tongana a yeke mbeni fini Da ti Royaume wala a yeke mbeni ngbene da so a kiri a leke aye mingi na terê ni, a yeke nzoni a leke mbeni kapa ti mungo da ni na Jéhovah. Me tongana a yeke mbeni ngbene Da ti Royaume so a leke gï ambeni kete ye na terê ni, a hunda pëpe ti sara mbeni kapa ti kiri ti mû da ni na Jéhovah.

⁵ A yeke nzoni Da ti Royaume aduti mbeni da so a leke ni gï ti gboto lê ti azo senge senge ape. Lege so a leke na aDa ti Royaume na ambeni ndo alingbi ti duti nde na ti so a leke na ambeni ndo nde; ye oko, a leke ala kue gï ti lingbi na kusala so a yeke sara na ni (Kus. 17:24). Ni la, ti lingbi na kodro oko oko, a yeke nzoni Da ti Royaume ni aduti mbeni nzoni ndo so ayo mingi ape na aita so asara abungbi dä.

⁶ A yeke na acongrégation kue ti aTémoin ti Jéhovah so ayeke sara bungbi na mbeni Da ti Royaume ti mû nginza ti bâ lege ti da ni. A yeke hon pëpe na mbeni sembe na popo ti azo ti tene ala zia pata dä, nga a yeke iri nginza na maboko ti azo ape. A zia mbeni boîte ti offrande na Da ti Royaume ni, tongaso si ala so aga na abungbi alingbi ti bi offrande dä si a sara kua na ni ti vo na aye so a hunda teti da ni. Azo so ayeke bi offrande na yâ ti aboîte ni so ayeke sara ni na bê ti ala wani, a yeke gbu ala gbungo na ngangu pëpe.—2 aCor. 9:7.

⁷ Aita kue na yâ ti congrégation abâ so a yeke mbeni pasa ti mû mbeni pata ti tene a bâ na lege ti Da ti Royaume nga ti mû mbage na kua ti lekengo yâ ni nga na gigi ni ti tene angbâ nzoni. A yeke mbeni ancien wala mbeni wakua ti mungo maboko la si ayeke leke ka kapa ti kua ni so. Mingi ni, a yeke leke kapa ti lekengo yâ ti Da ti Royaume nga na gigi ni na lege ti agroupe ti fango tënë, na surveillant ti groupe ni wala adjoint ti lo la ayeke mû li ni dä. A yeke nzoni yâ ti Da ti Royaume nga na gigi ni amû gonda na Jéhovah nga na bungbi ti lo.

⁸ Na ando so congrégation use wala ahon ni si ayeke sara bungbi na Da ti Royaume, a-ancien ti acongrégation ni ayeke zia na sese Komite ti maintenance ti Da ti Royaume ni so ayeke bâ lege ti da ni nga na ndo ni. Abungbi ti a-ancien ti acongrégation ni ayeke soro mbeni ita-koli ti duti coordinateur ti komite ni. Na gbe ti fango lege ti abungbi ti a-ancien ni, komite so ayeke leke aye ti tene a bata da ni nzoni si aduti saleté ape nga lo yeke bâ si aye abuba na terê ti da ni ape nga si aye ti kua ni aduti dä lakue. Ye so ahunda ti tene acongrégation ni kue asara kua maboko na maboko na popo ti ala.

⁹ Tongana acongrégation mingi la ayeke sara bungbi na yâ ti Da ti Royaume oko, a lingbi peut-être ti bâ wala acongrégation ni alingbi ti changé angbonga ti abungbi ti ala ngu oko oko. A yeke a-ancien ti acongrégation ni la si ayeke bungbi ti bâ tënë ni, na a yeke nzoni ala sara ni na bibe ti mango terê nga na ti yengo terê ti aita (aPhil. 2:2-4; 1 Pi. 3:8). A lingbi congrégation oko la amû adesizion na place ti ambeni ape. Tongana surveillant ti circonscription ayeke sara vizite na mbeni oko ti acongrégation ni so ayeke sara bungbi na Da ti Royaume ni, tanga ti acongrégation ni ayeke changé angbonga ti bungbi ti ala ti yenga ni so, tongana bezoin ni ayeke dä.

¹⁰ A lingbi ti mû adiskur ti mariage nga na ti lungo kuâ na Da ti Royaume, tongana Komite ti service ti congrégation ni ayeda. Tongana a-ancien ti Komite ni awara demande so a hunda ti sara aye so e fa ge na yâ ti Da ti Royaume ni, ala yeke bâ tënë ni nzoni na ala yeke mû desizion alingbi na ye so filiale afa.

¹¹ Ti ala so a yeda na ala ti sara aye ni so na Da ti Royaume, a lingbi ala duti na nzoni sarango ye so a ku na mbage ti atâ Chrétien. A lingbi mbeni ye so a sara na Da ti Royaume ason bê ti aita ti congrégation pëpe wala abi zonga pëpe na ndö ti iri ti Jéhovah nga na ndö ti nzoni iri ti congrégation (aPhil. 2:14, 15). Filiale alingbi ti yeda ti tene a sara ambeni ye so andu aye ti yingo na Da ti Royaume, na tapande Ekole ti kusala ti Royaume nga na Ekole ti aPionnier.

¹² A lingbi aita ti congrégation amû nengo lakue na ndo so ala yeke sara bungbi dä. A lingbi yungo bongo ti aita ni, lekengo terê ti ala pendere nga na sarango ye ti terê ti ala afa na gigi so ala bâ vorongo Jéhovah na nene ni (Zo-ti. 5:1; 1 Tim. 2:9, 10). Tongana e sara ye alingbi na awango so a mû ge, e yeke fa so e bâ na nene ni abungbi ti e.

¹³ A yeke kota ye mingi ti tene a bâ si aye atambela na lege ni na ngoi ti abungbi. Ni la, a yeke nzoni amolenge aduti place oko na ababâ na amama ti ala. A lingbi ti hunda na ababâ na amama so ayeke na akete molenge ti duti na mbeni place so, tongana ala doit ti sigi na amolenge ni ti tene ala gboto mê ti ala wala ti bâ lege ti ala, ala lingbi ti gboto lê ti azo ape.

¹⁴ A yeke hunda na ambeni ita-koli so alingbi ti tene ala sara kua ti yambango azo na ngoi ti abungbi na Da ti Royaume. A lingbi lê ti ala akpengba, ala hinga ti yamba azo na ngia nga ti sara ye na ndara. Kua ti ala ayeke nga ti yamba afini zo na ti sara si ala bâ terê ti ala tongana awande ape. Nga, tongana bungbi ato nda ni, ala yeke mû maboko na azo so aga na peko ti tene ala wara place, na ala yeke diko azo so aga ti hinga wungo ti ala. Ala yeke bâ ndo na ndö ti ziango chauffage wala ventilateur ti yâ ti da ni. Tongana a hunda ti sara ni, aita so ayeke yamba azo ayeke dabe ti ababâ na amama ti bâ ndo nzoni na ndö ti amolenge ti ala, tongaso si ala kpe loro kirikiri pëpe na Da ti Royaume kozo na tongo nda ti abungbi wala na pekoni wala ti sara ngia na ndö ti strade ape. Tongana mbeni molenge asara ye kirikiri na ngoi ti bungbi, mbeni ita so ayeke yamba azo alingbi ti hunda yeke na babâ wala mama ti molenge ni ti sigi na lo, tongaso si azo so aga alingbi ti mä tënë nzoni. Kua so aita ti yambango azo ayeke sara ayeke mû lege na azo kue so aga ti wara ye ti nzoni na lege ti abungbi ni. A yeke duti nzoni tongana a-ancien nga na awakua ti mungo maboko la asara kua ti yambango azo.

KAPA TI LEKENGO ADA TI ROYAUME

¹⁵ Na ngoi ti akozo Chrétien lani, ambeni Chrétien ayeke na mosoro mingi ahon amba ti ala, ni la bazengele Paul atene: “Ti tene ye ni alingbi terê, mbi ye si ye so ala yeke na ni ahon ndö ni akanga fadeso lê ti ye so amanke azo so, nga ye so azo so ayeke na ni ahon ndö ni akanga lê ti ye so amanke ala, si ye ni alingbi terê.” (2 aCor. 8:14). Laso, a yeke sara nga si aye ti e “alingbi terê.” A-offrande so aita ayeke bi na yâ ti dunia kue, a yeke mû mbeni ti leke na afini Da ti Royaume nga ti kiri ti leke na peko ti ambeni ngbene ni. So aita ti e ti dunia mobimba ayeke mû maboko tongaso so, a nzere mingi na bungbi ti Jéhovah nga na acongrégation so awara aye ti nzoni na lege ti a-offrande so.

¹⁶ Ti lingbi na ando ni, bureau ti filiale la ayeke fa na acongrégation aDa ti Royaume so ala yeke sara bungbi dä. Filiale nga la ayeke fa ngoi nga na ndo so a lingbi ti leke ambeni fini Da ti Royaume dä nga ti tene a kiri a leke peko ti ambeni ngbene da ni. Tongana mbeni kpale asi, a yeke leke aye ti tene a kiri a leke aye so abuba na terê ti aDa ti Royaume ni, nga na ambeni ngoi, ti leke ada ti aita.

¹⁷ Filiale ayeke soro ambeni ita ti mû maboko na yâ ti kua ti vongo aterrain, ti sarango aplan ti da, ti sarango ambeti so ayeke zi lege na ala ti leke ada, ti mû maboko na lekengo ada nga ti bâ lege ni nzoni. Teti so na yâ ti akodro mingi bezoin ti aDa ti Royaume ayeke dä mingi, a yeke na bezoin ti gbâ ti avolontaire. A wa awafango tënë kue so awara batême awe na so alingbi ti sara kua ni so, nga so ayeke na nzara ti mû maboko, ti sû demande ni na ti mû ni na Komite ti service ti congrégation ti ala. Même awafango tënë so ade ti wara batême ape alingbi ti mû maboko na kua ti lekengo Da ti Royaume ti ala wala ti leke peko ti ngbene ni.

ADA TI ASSEMBLÉE

¹⁸ Mingi ni, akozo Chrétien ayeke sara lani abungbi ti ala na yâ ti akete groupe. Me na ambeni ngoi, a yeke “gbâ ti azo” la si ayeke bungbi (Kus. 11:26). Legeoko nga laso, awakua ti Jéhovah mingi mingi ayeke bungbi terê ti sara akota bungbi ti lango oko nga na ati lango ota. Mingi ni ka, e yeke loué ambeni ndo si e sara akota bungbi dä wala, tongana mbeni nzoni ndo ti loué ni ayeke dä ape, e yeke sara ni na mbeni ndo so e vo ni wala e leke ni ti voro Nzapa dä, so a iri ni Da ti Assemblée.

¹⁹ Na ambeni ngoi, a yeke vo mbeni da, a leke peko ni na aga mbeni Da ti Assemblée. Me mingi ni, a yeke vo mbeni terrain na a leke fini da na ndö ni. Konongo ti yâ ti aDa ti Assemblée ayeke nde nde alingbi na bezoin ti ndo ni. Filiale la ayeke mû desizion ti vo wala ti leke da ni gï tongana a gbu li nzoni na ndö ti wungo ti nginza so a hunda ti leke na ni nga fani oke la a yeke sara akota bungbi na yâ ni ngu oko oko.

²⁰ Filiale ayeke soro ambeni ita-koli ti bâ ndo na ndö ti Da ti Assemblée nga ti bata ni si aye ni kue angbâ nzoni. A leke nga ti tene, lakue, fani use na yâ ti ngu oko, acongrégation ti acirconscription ni aga asukula yâ ti Da ti Assemblée ni nga ti bâ lege ti ambeni ye ti terê ni si abuba ape. Tongana aita aga asara kua ni na bê ti ala wani ala yeke wara aye ti nzoni dä mingi. Ni la, a wa acongrégation ti mû mbage ti ala na bê ti ala kue si aye so a leke so atambela nzoni.—Ps. 110:3; Mal. 1:10.

²¹ Na ambeni ngoi, a lingbi ti sara nga kua na aDa ti Assemblée ndali ti ambeni ye so bungbi ti Jéhovah aleke, na tapande a-ekole ti mandango Bible nga na ambeni bungbi so a leke ni gï ndali ti asurveillant ti circonscription. Legeoko tongana ti Da ti Royaume, Da ti Assemblée ayeke mbeni ndo so a mû na Jéhovah ti tene a voro lo dä. Ni la, tongana e yeke sara bungbi na Da ti Assemblée, a lingbi sarango ye ti terê ti e, yungo bongo ti e nga na lekengo terê ti e afa so e mû nengo na Jéhovah tongana ti so e yeke sara ka na ngoi so e bungbi na Da ti Royaume ti voro lo.

²² Gbâ ti afini zo ayeke ga na yâ ti bungbi ti Jéhovah na hunzingo ti lâ ti nda ni so. Ye so afa biani so tufa ti Jéhovah ayeke na ndö ti bungbi ti lo (És. 60:8, 10, 11, 22). Tongaso, e ye ti mû maboko na aye so a leke ni ti tene e wara anzoni ndo ti sara abungbi dä nga e ye ti bata ni nzoni. Tongana e sara tongaso, e yeke fa so e bâ na nene ni ada so ayeke mû maboko na e ti wa terê na popo ti e na ti sara tongaso mingi ahon ti kozo, teti e bâ so lâ ti Jéhovah aga nduru.