Bungbingo legeoko ti sepela Jéhovah
1. Li ti tënë ti kota bungbi ni ayeke nyen, na ngbanga ti nyen Jéhovah alingbi ti tene e sepela lo?
1 Jéhovah ayeke na ngangu ahon kue, zo alingbi ti hinga nda ti ndara ti lo pëpe, mbilimbili ti lo alingbi kue na lo yeke tâ ndoye ni mveni. Teti so lo yeke Wasalango ye, Lingu ti fini, na Kota Gbia ti Ndagigi, a yeke gi lo oko si alingbi e voro lo (Ps. 36:10; Apoc. 4:11; 15:3, 4). Fade Kota Bungbi ti District ti ngu so “Mû gloire na Nzapa”, ayeke kpengba lekengo na bê kue ti e ti sepela lo tongana oko tâ Nzapa.—Ps. 86:8-10.
2, 3. Tongana nyen nzoni lekengo ye kozoni ayeke mû lege na e ti wara aye ti nzoni mingi?
2 A hunda nzoni lekengo ye kozoni: A hunda mbeni nzoni lekengo ye kozoni ti wara ye ti nzoni mingi na lege ti kobe ti yingo so Jéhovah abata ni na e (aEph. 5:15, 16). Mo leke aye teti ndo ti lango, futango lege na mungo mbeni ngoi ti hungo tele na place ti kua wala na ekole awe? Mo ku pëpe ti tene lango ni aga ndulu ti sala akota ye so. Tongana mo ngbâ ti ku ti hunda ngoi ti hungo tele, mo lingbi ti manke mbeni mbage ti ngoi ti ngia so. A yeke nzoni e kue e duti dä na abungbi ni oko oko kue.
3 Zia na gbele mo ti si hio na ndo ti kota bungbi ni lango oko oko. Ye so ayeke mû ande lege na mo ti duti nzoni na place ti mo kozoni na hengo bia ti tongo nda ni, na ayeke mû ande lege na mo ti duti ndulu ti wara wango so a yeke fa ni. E hunda na mo ti bata place gi na azo ti sewa ti mo mveni wala na ala so mo na ala aga legeoko.
4. Ngbanga ti nyen a hunda na e oko oko kue ti ga na ye ti tengo ti e na ndo ti kota bungbi ni?
4 A hunda na zo kue ti ga na mbeni ye ti tengo ni ahon ti gue ti vo ye na gigi na ngoi ti hungo tele. Ti gue ti vo aye na mbeni ndo ti kango ye so ayeke ndulu na tele ti ndo ti kota bungbi, wala na tîtï azo so ayeke kä ye na yanga ti lege, alingbi ngoi na ngoi ti ga na akpale ti seni wala ti buba ngoi nga na nginza ti e. Salango kusala maboko na maboko na lekengo ye so ayeke maï dutingo na siriri ti ndo ni, na ayeke mû lege ti wara ngoi mingi ti sala lisoro na amba ti e wamabe (Ps. 133:1-3). Bata na li so a yeda pëpe ti ga na aye so ayeke na verre nga na asämba na ndo ti kota bungbi ni.
5. Tongana nyen e lingbi ti to nda ti leke bê ti e teti kota bungbi so?
5 Mä na manda: Esdras, na sambelango ngangu, aleke lani bê ti lo ti wara tënë ti Nzapa (Esdras 7:10). Lo leke bê ti lo ti wara afango ye ti Jéhovah (aProv. 2:2). E lingbi ti to nda ti leke bê ti e teti kota bungbi ni kozoni ti gue kâ na gbungo li na ndo kota li ti tënë ni nga na salango lisoro na ndo ni na sewa ti e
6. Ye nyen alingbi ti mû maboko na e ti bata lê ti e na ndo kapa ni? (Bâ “Ti mä ndo na ngoi ti akota bungbi”)
6 A lingbi ti wara na yâ ti mbeni kota ndo ti bungbi aye mingi nga atoto ti aye so ayeke gboto lê ti e. A yeke ngangu pëpe ti tene amara ti aye tongaso agboto lê ti e si e mä pëpe wamungo diskur ni. Tongana mara ti ye tongaso asi, a yeke kanga lege na e ti mä akpengba tënë so a yeke tene. Awango so ayeke na gbe ti li ti tënë “Ti mä ndo na ngoi ti akota bungbi” alingbi ti mû maboko na e ti kono ngangu ti batango lê ti e na ndo ye oko.
7, 8. Tongana nyen e lingbi ti fa so e bâ na nene ni ambeni zo?
7 E fa so e bâ azo na nene ni: Aita alingbi ti sala kusala na amasini ti mungo azo na foto nga na a-caméscope. Ye oko, ti gboto lê ti ambeni zo pëpe, a yeke nzoni ti sala ni gi na place so mo duti dä. A lingbi a kanga atéléphone ti maboko ti tene a gboto lê ti ambeni zo pëpe. Zo oko pëpe alingbi ti mû kamba ti masini ti lo ti yôro na yâ dû ti kuran wala ti amasini ti pikango mozoko ti ndo ti kota bungbi ni.
8 E yeke ku kungo biani ngoi ti bungbingo tele legeoko so ti sepela Jéhovah! Zia e sala kue ti mû gloire na lo na guengo na abungbi ni kue, na mango atënë ni nzoni, nga na salango kusala na ye so e manda.—Deut. 31:12.
[Kete tënë na lembeti 3]
Ti mä ndo na ngoi ti akota bungbi
▪ Gbu li na ndo li ti tënë ti adiskur ni
▪ Gi aversê
▪ Sû andulu tënë na mbeti
▪ Bata ambeni tënë nde ti sala kusala na ni
▪ Kiri mo bâ ye so mo manda