“Zia e bungbi ti yä iri ti Lo”
1. Fade e yeke wara lege wa ti yä iri ti Nzapa legeoko na amba ti e, na ye wa e lingbi ti leke ni fadeso?
1 Wasungo psaume ahe bia so: “I sala si iri ti L’Eternel aga kota legeoko tongana mbi sala, na zia e bungbi ti yä iri ti Lo.” (Ps. 34:4). Kota Bungbi ti e ti District “Tambela na Nzapa”, so ayeke ga, ayeke mû ande lege na e ti yä iri ti Jéhovah legeoko na aita ti e ti koli na ti wali ti akongregation mingi. Mo leke aye awe teti ndo ti lango ti mo, teti guengo ti mo ande kâ, nga ti gue na kua pëpe na ngoi ni so? E yeke sala ye na ndara tongana e bâ lege ti aye so kozoni hio.—aProv. 21:5.
2. Ngbanga ti nyen a yeke ye ti nzoni ti leke ti si hio na ndo ti kota bungbi ni?
2 Singo na ndo ti kota bungbi ni: Ambeni ye ayeke dä so a lingbi e bâ lege ni tongana e gue na mbeni kota bungbi. Tongana e londo hio ti gue, fade a yeke mû maboko na e ti hon ndo ti aye so alingbi ti kanga lege na e ti si hio, na fade a yeke mû lege na e ti wara ndo ti duti hio si e mû mbage na bê kue na hengo bia nga na sambela ti tongo nda ni (Ps. 69:31). Akete penze-ngbonga kozo na tongo nda ti bungbi ni, président ni ayeke duti ande na ndo estrade na ngoi so a yeke pika mozoko ti Royaume ti tongo nda ni. A lingbi e kue e duti na ngoi ni so si kapa ni alingbi ti to nda ni na mbeni lege so ane zo.—1 aCor. 14:33, 40.
3. Tongana nyen, na ngoi ti gingo ndo ti duti, e lingbi ti fa so e bi bê na azo?
3 Tënë ti Nzapa awa e ti “sala ye kue na lege ti ndoye.” (1 aCor. 16:14). Tongana ayanga-da ni azi, fade bingo bê na azo ayeke gbanzi e ti kpe loro, ti gbugburu tele wala ti pusu azo ti wara kozo na tanga ti azo kue ando ti duti so anzere na e. A lingbi ti bata ando ti duti gi teti azo so e na ala e ga oko wala so e na ala e lango da oko.—1 aCor. 13:5; aPhil. 2:4.
4. A leke aye wa teti ngoi ti hungo tele, na a yeke ga na ye ti nzoni tongana nyen?
4 Zia mo ga na mbeni ye ti te ahon ti zia ndo ti kota bungbi ni ti gi mbeni kobe ti tengo ni na ngoi ti hungo tele. Fade ye so ayeke mû lege na azo kue ti wara ngia na yâ songo so akpengba zo na ti duti dä tâ gi na tongo nda ti bungbi ti peko ti hungo tele. A lingbi nga ti kanga lege na mo ti te sioni kobe so peut-être azo ni atö ni nzoni pëpe. Tongana lege ayeke dä, a lingbi ti sala kusala na mbeni kete ye ti batango na kobe, so a lingbi ti zia na gbe ti ye ti duti. Na ndo so a sala kota bungbi ni dä, a yeda pëpe na sämba nga na asakpa so akono mingi, nga so a sala na verre.
5. A leke ye wa teti azo so amä ndo nzoni pëpe?
5 Ndali ti nzoni ti azo so amä ndo nzoni pëpe, a yeke leke ambeni mbilimbili ye nga a bata ndo ti duti teti ala.
6. Tongana nyen e lingbi ti leke bê ti e teti fango ye so e yeke wara ande?
6 Mbeni matanga ti yingo ayeke ku e: Gbia Josaphat ayeke lani zo so ‘aleke bê ti lo ti gi Nzapa.’ (2 Chron. 19:3). Tongana nyen e lingbi ti leke bê ti e kozo na kota bungbi ni? A-article so ayeke na peko ti Réveillez-vous! ti 22 mai na ti 8 juin afa kete mbage ti kobe ti yingo so a yeke kangbi ni ande. Ngbanga ti nyen ti mû ngoi pëpe ti gbu li na ndo a-article so, ti kono nzara teti ye so Jéhovah abata teti e? Lekengo bê ti e andu nga hundango na Jéhovah ti mû maboko na e ti hinga nda ti fango ye so e yeke wara ande nga ti sala kusala na ni.—Ps. 25:4, 5.
7. Nzara ti bê ti e ayeke nyen, na ngbanga ti nyen?
7 E kue e yeke ku kungo ti manda ye mingi na yâ Tënë ti Nzapa, na hingango so na lege ni e lingbi ti maï ti wara salut (1 Pi. 2:2). Tongaso, zia e gue na Kota Bungbi ti District “Tambela na Nzapa” na ‘e bungbi ti yä iri ti Jéhovah.’—Ps. 34:4.
[Kete tënë na lembeti 3]
Alege ti yä iri ti Nzapa
◼ Leke ye kozoni
◼ Fa so mo ndoye azo
◼ Leke bê ti mo