Afini vizite azi lege na amandango Bible
1. Ngbanga ti nyen salango afini vizite ayeke kota ye mingi?
1 Jésus amû yanga na adisciple ti lo, pëpe gi ti fa tënë, me ti ‘sala si azo aga adisciple . . . , ti fa ye na ala’. (Mat. 28:19, 20). Mbeni wafango tënë ayeke fa peko ti ye, me wafango ye ayeke sala mingi ahon so. Lo yeke mû asango, lo yeke fa nda ti ye, na lo yeke sigigi na aye so amû ngangu na atënë ni. Mbeni lege ti fa ye na ambeni zo ayeke ti sala afini vizite na ala so asala nzara ti tâ tënë na bibe ti to nda ti manda Bible na ala.
2. Azo wa a yeke nzoni e sala vizite na ala?
2 Mo yeke sala afini vizite ni na azo wa? Duti ndulu ti sala vizite na ala kue so amû ambeti ti e wala ala so afa na gigi kete nzara ti nzo tënë so e yeke fa. Tongana mo wara mbeni zo so asala nzara ti tâ tënë na ngoi ti fango tënë na ando so azo mingi ayeke dä, tara ti hinga ndo so zo ni alango dä, wala numéro ti téléphone ti lo, na lege so a lingbi ti sala si nzara ni amaï. Duti na beku ti to nda ti mandango Bible. Ngbâ lakue ti gi ala so ayeke yeda ande na mungo maboko ti manda Bible, peut-être fade mo yeke wara ala.—Mat. 10:11.
3, 4. Ti sala avizite so alë lengo, andu nyen?
3 Fa so mo bi bê na ndo zo ni: Lekengo tele teti mbeni fini vizite so alë lengo ato nda ni na kozo vizite ni. Awafango tënë so awara nzoni lengo na yâ kusala ni ayeke sû na mbeti ye so anzere na bê ti azo so ala wara, na ala yeke sala kua na ni teti alisoro ti peko. Ambeni abâ so a yeke ga na aye ti nzoni ti zia mbeni hundango tënë na hunzingo ti lisoro ni ti kiri ti zingo nzara ti zo ni na vizite ti peko. Bingo bê ti e na azo so asala nzara ti tâ tënë ayeke pusu e ti bi bê na ndo ala, même na pekoni so e zia ala, na a yeke pusu e ti kiri ti bâ ala fade fade. Tongana lege ayeke dä, tara ti kiri na ngoi so nzara ni angbâ wâ na bê ti ala, peut-être même na peko ti lango oko wala use.
4 Na ngoi ti salango mbeni fini vizite, gi ti to nda ni na ndo ndangba lisoro so mo na zo ni asala lani. Zia na gbele mo ti diko kamême mbeni versê oko so alingbi ti kpengba zo na ngoi kue so mo ga, na duti ndulu ti mä ndo. Gi ti hinga zo ni nzoni ahon ti kozo. Tongaso, na avizite ti peko, fa atâ tënë ti Mbeti ti Nzapa so andu tâ bê ti lo mveni.
5. Kode wa, so akpengba pëpe, a lingbi ti sala kusala na ni ti to nda ti amandango Bible?
5 Duti na bibe ti manda Bible: Sala afini vizite na ziango na gbele mo ti to nda ti manda Bible. A lingbi ti sala ni tongana nyen? Fa so mo ye ti kangbi mbeni tënë so anzere mingi. Zi na mbeni paragraphe ti buku Hingango Ye wala brochure Ahunda so mo bâ a yeke nzere ande na zo ni. Diko paragraphe ni, bâ hundango tënë ni, na sala lisoro na ndo mbeni versê oko wala use so a fa tënë ti yâ ni pëpe. A lingbi ti sala ni teti apenze-ngbonga oku ti si na bale-oko tâ na yanga-da ti zo ni mveni. Hunzi ni na hundango mbeni tënë ti peko na sala kue ti kiri ti sala lisoro na ndo ni na mbeni ngoi.
6. Tongana nyen e lingbi ti fa na gigi so e gbu nda ti nene ti salango afini vizite?
6 Ti kiri ti bâ azo kue so asala nzara ti tâ tënë ayeke mbeni kota mbage ti kusala ti e. Ni la, leke mbeni ngoi na yâ kapa ti mo ti yenga oko oko ti sala afini vizite. Salango tongaso ayeke sala ande si kusala ti mo akiri amaï na ayeke ga na tâ ngia.