Mû maboko na ala so ayeke na yâ “mbilimbili dutingo so a hunda”
1. Azo wa Jéhovah ayeke ga na ala na mbage ti Lo na ngoi ti e?
1 Zo oko oko ayeke na mbeni dutingo so gunda ni alï ngangu na yâ bê ti lo na lege ti fä (Mat. 12:35). Bible asala tënë ti azo so ‘bira ayeke na bê ti ala.’ (Ps. 55:22). Me a yeke wara nga azo so ayeke na yâ “mbilimbili dutingo so a hunda teti fini ti lakue lakue”. (Kusala 13:48, NW ). Na ngoi ti e, Jéhovah ayeke ga na ala so ayeke na yâ mbilimbili dutingo so a hunda na mbage ti Lo (Ag. 2:7). Tongana nyen e lingbi ti mû maboko na ala ti ga awavorongo Jéhovah?
2. Kusala ti e ti salango adisciple andu aye wa?
2 E bi bê ti e lakue ti kiri ti bâ azo ni: Ti tene e yô kungba ti e ti salango adisciple nzoni, a yeke kota ye teti e ti duti na nzoni bango ndo na ndo salango afini vizite (Mat. 28:19, 20). E yeke kiri hio ti gi ti kono nzara ti tënë ni na yâ azo so e wara ala? E yeke kiri mbeni ti bâ ala kue so amû mbeti wala afa na gigi nzara ti ala teti nzo tënë? E ngbâ lakue ti sala ngangu ti mû maboko na ala ti gue na li ni na lege ti yingo? Teti so ye ni andu fini ti azo, a lingbi e gi ti kono nzara ti tënë ni na yâ azo kue so e wara ala.
3. Ye wa a lingbi e sala na peko ti salango lisoro na mbeni zo na fango tënë?
3 Na ngoi so mo ngbâ ti dabe mo na lisoro so mo sala na mbeni zo so asala nzara ti tënë ni, mû mbeni kete ngoi ti sû iri nga na adresse ti lo. Sû kota tënë so ala sala lisoro na ndo ni, aversê ti Bible so ala diko nga na mbeti so mo zia na lo. Na pekoni, leke na bê ti mo ti kiri hio ti bâ zo ni.
4. Tongana nyen e lingbi ti sala afini vizite so alë lengo?
4 Lege ti sala mbeni fini vizite: Tongana mo yeke sala mbeni fini vizite, a yeke nzoni ti sala ye na nzobe na ti fa na gigi biani so mo yeke bi bê na zo ni. Bata si lisoro ni akpengba pëpe na aluti na ndo Bible. Leke mbeni pendere lisoro so aluti na ndo Bible, nga na hunzingo ti lisoro ni, sigigi na mbeni hundango tënë so mo lingbi ti kiri tënë na ni na vizite ti peko. A yeke nzoni ti kpe ti papa senge senge na azo na ndo abango ndo ti ala so ague nde na fango ye ti Bible. Sala ngangu ti leke lisoro ni na ndo aye so mo na zo ni kue amä tele dä.—aCol. 4:6.
5. Ngangu wa mbeni pionnier asala? Na ye ti pekoni ayeke so wa?
5 Ti sala afini vizite, a hunda ti sala ngangu, me anzoni ye ti pekoni ayeke mû ngia na bê. Mbeni pionnier na Japon azia na gbele lo ti wara nze oko oko afini vizite mingi ahon ti kozo. Lo to nda ni lani na sungo na mbeti iri ti azo kue so lo tingbi na ala na fango tënë da na da, nga na pekoni, na yâ ti alango mbasambala, lo kiri ti bâ ala. Lo leke nzoni atënë so lo ye ande ti tene, na lo sala kusala ti lo na ziango bê kue na yâ tokua so lo yeke gue na ni. Na ngoi ti mbeni oko ti afini vizite so, lo wara lege ti to nda ti mbeni mandango Bible na mbeni zo so atene: “Lakue mbi yeke tomba ka amba ti mo. A yeke ti fani oko ni so mbi dengi mê ti mä ala.” Salango ye lakue na ndoye ti pionnier so alë lengo. Na hunzingo ti nze ni, lo yeke na a-étude bale-oko.
6. Ngbanga ti nyen a lingbi e ngbâ lakue ti sala afini vizite?
6 Dutingo ti azo ayeke gbian lakue (1 aCor. 7:31). A hunda ti kiri fani mingi ti wara mbeni zo so asala nzara ti tënë ni na yanga-da ti lo mbeni. Na bingo bê ti e lakue ti sala afini vizite, e lingbi ti mû maboko na ala so ayeke na yâ mbilimbili dutingo so a hunda ti mû lege so ague na fini ti lakue lakue.—Mat. 7:13, 14.
[Kete tënë na lembeti 8]
Lege ti sala afini vizite so alë lengo
■ E fa so e bi bê biani nga na bê kue na ndo azo.
■ E soro mbeni kota tënë ti Bible so andu bê ti zo biani ti sala lisoro na ndo ni.
■ E leke lakue gunda ti vizite ti peko.
■ E ngbâ lakue ti bi bê ti e na zo ni na pekoni so e zia lo.
■ E kiri lango oko wala use na pekoni ti gi ti kono nzara ti tënë ni.
■ E dabe ti e lakue so ye so e zia na gbele e ayeke ti to nda ti mbeni mandango Bible.
■ E sambela ti wara mungo maboko si e duti na mbito pëpe na yâ kusala ni.