Sepela Jéhovah na fango tënë na alege kue so azi
1 Awakua be-ta-zo ti Jéhovah ayeke gi alege kue ti sepela lo lâ na lâ (Ps. 96:2, 3; aHéb. 13:15). E lingbi ti sala ni na fango tënë na alege kue so azi. Azo mingi so avoro Jéhovah laso akiri singila ngbanga ti so mbeni zo afa tënë ti Royaume na ala na alege kue so azi.
2 Fani mingi, ti fa tënë na mbeni zo na alege kue so azi ayeke sala si ambeni zo nde awara lege ti mä tënë ti Royaume. Na tapande, lisoro ti Jésus na mbeni wali ti Samarie na tele ti dungu ti Jacob apusu azo mingi ti sala nzara ti nzo tënë (Jean 4:6-30, 39-42). Na ndembe so Paul na Silas ayeke lani na da ti kanga na kodoro ti Philippes, ala fa tënë na wabatango da ti kanga ni. Lo na azo ti da ti lo kue ayeda na tâ tënë.—Kus. 16:25-34.
3 Alege so azi: Mo lingbi ti fa tënë na alege kue so azi tongana nyen? Ambeni asala na ngoi ti vongo ye, na yâ ti bus wala taxi, wala na ndembe so ala yeke ku ti bâ docteur. Ambeni nde awara lege ti fa tënë na ngoi ti hungo tele na kua wala na ekole. Ti zia gi mbeni oko ti ambeti ti e dandara alingbi ti pusu ambeni zo ti hunda tënë na ndo mabe ti e.—1 Pi. 3:15.
4 Lege ti to nda ni: Mbeni kete molenge-wali ti ngu mbasambala, so ayeke na kamene mingi, amä na bungbi tongana nyen a yeke kota ye teti azo kue ti fa tënë. Tongaso, na ndembe so lo na mama ti lo ayeke gue ti vo ye, lo zia abrochure use na bozo ti lo. Na ngoi so mama ti lo angbâ ti futa aye ni, molenge-wali so amû brochure oko na mbeni wali, so ayeda na ni na bê kue. Tongana a hunda na lo tongana nyen lo wara ngangu ti ga ndulu na wali so, lo kiri tënë: “Mbi tene na bê ti mbi: ‘Oko, use, ota, mo gue.’ Na mbi gue!”
5 Ti fa tënë na alege kue so azi, a yeke nzoni e kue e duti na mara ti bibe tongana ti kete molenge-wali so. Nyen la alingbi ti mû maboko na e? Sambela ti wara ngangu ti sala tënë (1 aThes. 2:2). Leke ti hunda mbeni tënë so agbu bê ti azo, so mo lingbi ti to nda ti lisoro na ni. Nga, mä na bê so fade Jéhovah ayeke hiri deba nzoni na ndo angangu so mo sala.—Luc 12:11, 12.
6 Fango tënë na azo so e yeke wara ala lâ oko oko na alege kue so azi ayeke sepela Jéhovah, na ayeke mû ngia na e. A lingbi ti ga na mbeni zo ti mû lege ti fini ti lakue lakue.