“Sala tënë ti témoin” kue na wâ
1, 2. Ye nyen apika bê ti mo na ndo lege so Paul abâ na fango nzo tënë? Tongana nyen e lingbi ti mû tapande ti lo ti “sala tënë ti témoin” kue?
1 Legeoko tongana Jésus nga na ambeni wakua be-ta-zo mingi ti giriri, bazengele Paul afa nzo tënë na wâ, lo “sala tënë ti témoin” kue atâa dutingo ti lo ayeke tongana nyen. Atâa na ngoi so lo sala kanga ti da, lo “kamata ala kue so aga ti bâ lo, lo fa tënë ti royaume ti Nzapa, na lo fa nda ti tënë ti Seigneur Jésus Christ na mbito pëpe”.—Kus. 28:16-31.
2 E nga e lingbi ti “sala tënë ti témoin” kue na ngoi kue. So andu fango tënë na azo so e wara ala na guengo ni nga na kiringo ni na Kota Bungbi ti District “Mû gloire na Nzapa”, nga na ngoi so e yeke na yâ gbata ni.—Kus. 28:23; Ps. 145:10-13.
3. Tongana nyen e lingbi ti sala si fango tënë ti e na alege kue so azi aga gi tongaso pëpe?
3 Fango tënë na alege kue so azi ayeke nyen? Fango tënë na alege kue so azi ayeke pëpe mbeni ye so asi gi tongaso, so zo aku pëpe, aleke ni pëpe wala abâ ni tongana kete ye. Tongana ti so a yeke lani tâ tënë na ndo ti Paul, mungo gloire na Nzapa na lege ti fango tënë ti e ayeke kota ye na lê ti e. Nga a lingbi fango tënë na ndo kue so ahunda na ngoi ti atambela ti e ti ngu so aduti ye so e leke na bê ti e ti sala. Ye oko, teti so e yeke ga ndulu na azo na ngia me na ngoi ti fango tënë ti kongregation pëpe, a lingbi ti hiri biani kode so: fango tënë na alege kue so azi. Kode so alingbi ti lë anzoni lengo.
4. Nyen la amû maboko na Paul ti fa tënë na da ti lo?
4 Leke tele ti fa tënë: A lingbi Paul agi lani alege kue ti fa tënë na ngoi so lo sala kanga ti da na Rome. Lo tisa amokonzi ti aJuif ti ga na da ti lo (Kus. 28:17). Atâa so mbeni kongregation ti aChrétien ayeke lani na Rome, Paul ahinga so bungbi ti aJuif ti gbata ni ahinga tâ tënë mingi pëpe na ndo mabe ti aChrétien (Kus. 28:22; aRom. 1:7). Lo gbanzi tele ti lo pëpe ti “sala tënë ti témoin” kue na ndo Jésus Christ nga na Royaume ti Nzapa.
5, 6. E lingbi ti fa tënë na alege kue so azi tongana nyen? E lingbi ti leke tele ti e tongana nyen ti fa tënë tongaso nzoni?
5 Gbu li kozo na ndo azo so mo lingbi ti tingbi na ala ande na lege, ala so ahinga ye gi kete na ndo aTémoin ti Jéhovah. Peut-être ala hinga même pëpe so e yeke manda Bible na azo senge senge. Duti ndulu ti fa tënë na azo so mo wara ala na lege ti guengo ti mo, na ndembe so mo yeke luti kete na lege ti te ye, ti mû essence, ti vo ye, wala na ngoi so mo yeke na hôtel, na da ti tengo kobe, na yâ ti bus, na yâ ti taxi, wala na ambeni ndo tongaso. Hinga kozoni kue ye so mo lingbi ti tene ti to nda ti lisoro na ti fa tënë hio. Peut-être angoi kete kozo na ni, mo lingbi ti tara tele ti mo na fango tënë na alege kue so azi na azo ti tele ti da ti mo, afami, azo ti ndo ti kua ti mo, nga na ambeni zo so mo hinga ala.
6 A yeke nzoni mo duti na gbâ ti ambeti ti fa na tënë na alege kue so azi. Ambeti wa? Peut-être tract Mo Ye ti Hinga Ye Mingi Ahon na ndo Bible? Gboto lê na ndo akozo paragraphe oku, so afa anene nda ti tënë ti diko Bible. Fa na zo ni peko ti tract ni so a hunda na zo ti manda Bible senge senge na da ti lo. Tongana mo wara mbeni zo so asala nzara ti tënë ni, mû na lo brochure Ahunda. Na ziango na li kozo ti tingbi na azo so atene mbeni yanga ti kodoro nde, mû na tele ti mo kete brochure Une bonne nouvelle pour toutes les nations. Lembeti 2 ni afa tongana nyen ti fa na tënë. Tongana mo yeke gue na kutukutu, mo lingbi ti mû na tele ti mo ambeni mbeti ti kusala teti azo so asala biani nzara ti tënë ti Royaume.
7, 8. Wango wa na ndo yungo bongo nga na tambela ti e a lingbi e bata na ngoi so e yeke gue na kota bungbi wala e yeke gboto gere ti e?
7 Bâ yungo bongo nga na tambela ti mo: A lingbi e sala kue ti tene tambela, yungo bongo ti e wala lekengo tele ti e pendere asala pëpe si azo abâ e na sioni lê, wala apusu ala ti “ke tënë” ti bungbi ti Jéhovah (Kus. 28:22). So andu pëpe gi kota bungbi, me nga guengo ni kâ, nga na ngoi ti gbotongo gere. Tour ti Ba Ndo ti lango 1 ti août 2002, lembeti 18, paragraphe 14, atene: “A lingbi yungo bongo ti e agboto lê ahon ndo ni pëpe, aduti kirikiri pëpe, azingo pëpe anzara ti mitele na bê ti mbeni zo nde, wala afa na gigi pëpe mbage ti tele so a lingbi a honde ni. Na ndo ni, a lingbi e yü bongo na mbeni lege so afa na gigi so e yeke “bata tënë ti Nzapa.” Ye so amû lege na e ti gbu li kete; a yeke tongaso pëpe? A hunda gi pëpe ti yü bongo nzoni na ngoi ti abungbi [wala akota bungbi], na ti sala ye so ague nde na ni na yâ tanga ti angoi ni. A lingbi yungo bongo ti e afa lakue na gigi so e yeke sala ye na lege ni, na e yeke bata tënë ti Nzapa, teti so e yeke aChrétien na awakua ti Nzapa na ngoi kue.”—1 Tim. 2:9, 10.
8 A yeke nzoni e yü bongo na lege ni nga na nengo tele. Tongana yungo bongo nga na tambela ti e ayeke kirikiri pëpe, afa lakue na gigi mabe ti e na Nzapa, fade kamene ayeke sala e lâ oko pëpe ti fa tënë na alege kue so azi.—1 Pi. 3:15.
9. Ye ti nzoni wa Paul awara na yâ fango tënë ti lo na Rome?
9 Fango tënë na alege kue so azi alë alengo: Na yâ angu use so Paul asala na kanga ti da na Rome, lo bâ anzoni ye ti peko ti fango tënë ti lo. Luc atene so “ambeni amä na bê na tënë so lo tene”. (Kus. 28:24). Paul mveni afa ye ti peko ti kua ti lo ti “sala tënë ti témoin” kue tongana lo sû na mbeti: “Ye so asala mbi asala si Tene-nzoni awu; tongaso aturugu kue ti da ti gbia na ambeni zo kue ahinga ye so akanga mbi ayeke teti Christ. Na bê ti aita mingi awara ngangu na yâ Seigneur ngbanga ti ye so akanga mbi, na ala kpengba mingi ahon ti fa Tënë ti Nzapa na mbito pëpe.”—aPhil. 1:12-14.
10. Ye ti nzoni wa mbeni koli na wali ti lo awara na fango tënë na ngu so ahon?
10 Na ngu so ahon, mbeni koli na wali ti lo, na peko ti mbeni lango ti kota bungbi ti district, afa tënë na alege kue so azi na mbeni wali so asala kua na mbeni ndo ti tengo kobe. Wali so ahunda tënë na ndo badge ti ala. Ala sala tënë na lo na ndo kota bungbi ni nga na ndo beku so ayeke na yâ ti Bible teti kekereke ti azo. Ala mû na lo tract Mo Ye ti Hinga Ye Mingi Ahon na ndo Bible? nga ala fa na lo tongana nyen ti manda Bible na da ti lo senge senge. Wali ni atene ni ye si mbeni zo aga abâ ni, nga lo sû iri ti lo na peko ti tract ni, na lo hunda na koli na wali ni ti leke aye kue ndali ni. Ye ti nzoni wa mo lingbi ti wara na ngu so na salango “tënë ti témoin” kue na wâ?
11. A lingbi e maï alengo wa ti pusu nzo tënë na li ni na ngu so na salango “tënë ti témoin” kue?
11 Pusu nzo tënë na li ni mingi: Bâ tongana nyen Paul ayeke lani na ngia tongana lo mä so amba ti lo Chrétien ayeke mû tapande ti wâ ti lo! Na ngoi so e yeke wara ande nzoni na lege ti kota bungbi ti district ti ngu so, zia e sala ngangu kue ti pusu nzo tënë na li ni na fango na azo, na alege kue so azi, atënë ti mabe ti e so aluti na ndo Bible.
[Kete tënë na lembeti 3]
Ambeti so alingbi na fango tënë na alege kue so azi
■ Mo Ye ti Hinga Ye Mingi Ahon na ndo Bible? (tract)
■ Ye Wa Nzapa Ahunda na E? (brochure)
■ Une bonne nouvelle pour toutes les nations (kete brochure)
■ Ambeni mbeti ti kusala nde
[Kete tënë na lembeti 4]
Girisa ala pëpe!
Azo wa? Azo kue so aga lani na Dango Bê na kui ti Christ wala na diskur so ayeke nde. E tisa ala awe ti gue na kota bungbi ti district ti ngu so? Tongana a wa ala na nzobe, peut-être mingi ti ala yeke gue dä. Nzoni songo nga pendere kapa ti yingo so ayeke ga ande na ala ndulu mingi na Jéhovah nga na bungbi ti lo. Ngbanga ti nyen pëpe ti tisa ala na ti bâ ye ti pekoni? Fa na ala anzene nzene ye kue na ndo alango ti kota bungbi ni, lege ti si na ndo ni, angoi ti tongo nda ti abungbi ni nga ti hunzingo ni, nga kete tënë na ndo programme ni so ayeke na peko ti Réveillez-vous! ti 8 juin 2003.