Kusala ti Chrétien: Kozo kua ti e
1 E oko oko kue e yeke na amara ti kua nde nde so a lingbi e sala. Ti sala kua ti mû na azo ti sewa ti e ye so atia ala ayeke mbeni ye so Nzapa ahunda (1 Tim. 5:8). Me a lingbi kua so Nzapa ahunda na e ti sala ahon pëpe ndo ti kua ti fango tënë ti Royaume na ti salango adisciple.—Mat. 24:14; 28:19, 20.
2 Jésus azia lani na e tapande ti ‘gingo royaume ti Nzapa kozoni’. (Mat. 6:33; 1 Pi. 2:21). Atâa so lo yeke na ye ti mitele mingi pëpe, lo bi tele ti lo kue na yâ salango ye so bê ti Babâ ti lo aye (Luc 4:43; 9:58; Jean 4:34). Lo sala ngangu ti lo kue ti fa tënë na alege oko oko kue so azi (Luc 23:43; 1 Tim. 6:13). Lo wa adisciple ti lo ti duti na oko kota nzara so na yâ kusala ti kongo le-kobe.—Mat. 9:37, 38.
3 Mungo tapande ti Jésus laso: E lingbi ti mû tapande ti Jésus na salango kue ti duti na aye mingi pëpe na yâ fini ti e, so aluti mingi na ndo kusala ti Chrétien. Tongana e yeke na aye so a lingbi e wara ni na yâ fini ti e, zia e bata wango ti Bible ti kpe ti gi lakue ti wara gbâ ti aye ti sese so (Mat. 6:19, 20; 1 Tim. 6:8). A yeke nzoni mingi ti tene e gi ti fa tënë mingi ahon ti kozo! Tongana e yeke na gbe ti akpale, zia e sala kue, tongana Jésus, ti zia pëpe si agingo bê ti fini amene kota kusala ti e ti fango nzo tënë ti Royaume.—Luc 8:14; 9:59-62.
4 Ambeni zo ayeke na akungba mingi ti yô. Atâa so kue ala zia fango tënë na kozo ndo. Mbeni ita-koli ayeke na kota sewa, lo yeke kota zo na ndo ti kua ti lo, nga lo yeke ancien na yâ kongregation. Lo tene: “Mbi bâ fango tënë tongana kota kusala ti mbi.” Mbeni ita-wali pionnier atene: “Kusala ti pionnier ayeke nzoni mingi ahon mbeni nzoni kua ti nginza.”
5 Atâa dutingo ti e ayeke tongana nyen, zia e mû tapande ti Jésus, na salango si kusala ti fango tënë aduti kota kua ti e.