Ye wa mo zia na kozo ndo?
1 Abungbi ti alege ti vorongo mingi agboto lê na ndo akusala ti mungo maboko na azo ti mawa tongana lekengo a-ekole na ahôpital. Nde na so, aTémoin ti Jéhovah, atâa so ala girisa pëpe “ti sala nzoni na ti mû ye na azo”, azia mungo maboko na azo na lege ti yingo na kozo ndo.—aHéb. 13:16.
2 Tapande ti kozo siècle: Jésus asala lani anzo kusala mingi na ngoi so lo yeke na ndo sese. Ye oko, kozo kusala ti lo ayeke lani ti fa tâ tënë (Luc 4:43; Jean 18:37; Kus. 10:38). Lo mû yanga na adisciple ti lo ti ‘gue ti sala si azo na popo ti amara kue aga adisciple, ti fa ye na ala’. (Mat. 28:19, 20). Lo fa nga so ala so amä na bê na lo alingbi ande ti sala kusala mingi ahon ti so lo sala lani (Jean 14:12). Jésus azia na kozo ndo kusala ti fango tënë ngbanga ti so lo yeke mû maboko na azo ti manda lege ti salut.—Jean 17:3.
3 Bazengele Paul abâ lani kusala ti lo ti fango tënë tongana mbeni ‘ye so a lingbi lo sala’, mbeni ye so ahunda, so lo lingbi pëpe ti girisa ni (1 aCor. 9:16, 17). Lo yeke ndulu ti dö ambeni ye na yâ fini ti lo ti zia, ti hon ndo ti tara, wala ti bâ pasi si lo sala kusala ti lo (Kus. 20:22-24). Bazengele Pierre na amba ti lo afa lani mara ti bibe tongaso. Atâa so a kanga ala na apika ala, “ala zia pëpe ti fa nda ti tënë, na ti fa Tene-nzoni ti Jésus, Lo so ayeke Christ.”—Kusala 5:40-42.
4 Ka ti e ni ayeke tongana nyen? E yeke zia na kozo ndo kusala ti fango tënë ti Royaume na ti salango adisciple? Na tapande ti Jésus, bê ti e ayeke biani na ndo ala so “ye nde nde agi ala, na ala kangbi kirikiri tongana angasangbaga so ayeke na berger pëpe”? (Mat. 9:36). Aye so ayeke si laso na ndo sese kue nga na aprophétie ti Bible afa dandara so sioni sese so ayeke gue na hunzingo ni! Ti bata na li nene ti kusala ti fango tënë ayeke pusu ande e ti ngbâ lakue ti fa tënë na wâ.
5 Bâ dutingo ti mo: Atâa so fani mingi dutingo ti zo mveni ayeke changé, ngoi na ngoi a yeke nzoni e bâ wala e lingbi ti gbian ambeni ye ti mû mbage ti e mingi na kusala ti fango tënë. Mbeni ita-wali amû lani kusala ti pionnier na yâ ti angu 1950, 1960, na 1970. Me lo bâ so a yeke nzoni ti kaï kusala ni ngbanga ti songo tele ti lo. Me, tongana ngoi ayeke hon, seni ti lo akiri aga nzoni. Aninga pëpe, lo kiri lo bâ dutingo ti lo na lo mû desizion ti kiri ti mû kua ti pionnier. So ngia si lo yeke na ni ti sala Ekole teti aPionnier tongana lo yeke na ngu 90! Ka ti mo? Mo ga ndulu ti gue na retraite awe wala ti hunzi ekole ti mo? Tongana ye achangé na yâ fini ti mo, ayeke mû lege ande na mo ti mû kua ti pionnier?
6 Tongana Jésus abâ lani so Marthe ‘agi bê ti lo mingi na kusala ti ya ti da’, na lege ti nzobe, lo wa lo so lo lingbi ti wara adeba nzoni tongana lo yeke na aye kete na yâ fini (Luc 10:40-42). Mo lingbi ti gi ti duti pëpe na aye mingi mingi ti sala na yâ fini ti mo? A hunda biani ti tene koli na wali ni use kue asala kua ti nginza? Tongana a changé ambeni ye, gi nginza ti kua oko alingbi ti bata sewa ni? Aita mingi awara aye ti nzoni na lege ti yingo na lekengo aye so amû lege na ala ti fa tënë mingi.
7 Zia e oko oko kue e mû tapande so Jésus na abazengele azia! Kite a yeke pëpe so e yeke wara ande deba nzoni ti Jéhovah teti ngangu so e yeke sala na bê ti e kue, ti mû mbage na yâ kpengba kusala ti fango nzo tënë ti Royaume.—Luc 9:57-62.