Kangbingo ambeti na ndo so ayanga ti kodoro nde nde ayeke dä
1. Ngbanga ti nyen akongregation mingi ayeke na bezoin ti wara ambeti na mbeni yanga ti kodoro nde?
1 Na yâ mingi ti ando, a to nda ti wara na yâ territoire azo so alondo na akodoro nde nde. Mingi ti ala ayeke manda tâ tënë hio na ayeke gbu nda ti ye nzoni mingi tongana a fa ye na ala na yanga ti kodoro ti ala mveni. Aye wa a leke ti mû na azo so asala nzara ti tënë ni, ambeti so aluti na ndo Bible na yanga ti kodoro so ala gbu nda ni nzoni mingi?
2. Salango kusala maboko na maboko wa ayeke kota ye tongana akongregation use wala mingi so ayeke tene ayanga ti kodoro nde nde asala kusala na yâ ti territoire oko?
2 Na ngoi so ayeke kangbi ambeti: Tongana akongregation use wala mingi so ayeke tene ayanga ti kodoro nde nde asala kusala na yâ ti territoire oko, abungbi ti a-ancien ni ayeke sala ande kusala maboko na maboko na asurveillant ti kusala ti zia na sese mbeni kode ti salango ye so kongregation oko oko ayeda na ni. Ye so ayeke mû lege na bungbi ti yanga ti kodoro oko oko ti fa tënë nzoni. Na ngoi so ala yeke fa tënë da na da, a lingbi awafango tënë akangbi pëpe ambeti na yanga ti kodoro ti (a)mbeni kongregation nde. Ye oko, tongana ala yeke fa tënë na alege kue so azi wala na ando so azo mingi ayeke gue dä, ala lingbi ti kangbi ambeti na ayanga ti kodoro nde nde.—Bâ Kusala ti Royaume ti Octobre 1990 ti France (Atënë so i hunda).
3. Na ngoi wa si mbeni kongregation alingbi ti bata ambeti so ayeke na yanga ti kodoro wande?
3 Ngoi so a lingbi a bata ambeti: Nyen la a lingbi ti sala tongana wungo ti azo so ayeke tene yanga ti kodoro wande ayeke kamême mingi na yâ ti mbeni territoire, me so mbeni kongregation ti sala bungbi na yanga ti kodoro ni so ayeke pëpe? Na gbele mara ti aye tongaso, akongregation alingbi ti bata mbeni kete wungo ti ambeti ti kusala, so ayeke dä na yanga ti kodoro ni, tongana atract, abrochure Ahunda na Ndeko ti Nzapa, nga na buku Hingango Ye. Awafango tënë alingbi ti kangbi mbeti ni na ngoi kue so ala tingbi na azo so alingbi ti diko yanga ti kodoro ni so.
4. Na lege wa a lingbi ti wara ambeti ti yanga ti kodoro so kongregation ayeke na ni pëpe?
4 Lege ti hunda ti wara na ambeti: Tongana kongregation abata pëpe ambeti na yanga ti kodoro so mbeni zo so asala nzara ti tënë ni adiko ni, tongana nyen a lingbi ti wara ambeti so? Awafango tënë alingbi ti bâ legeoko na ita so ayeke bâ lege ti ambeti ti hinga ambeti wa ayeke dä na yanga ti kodoro ni. Nga, a lingbi ti hunda ambeti ni so legeoko na komande ti ambeti ti kongregation ti peko.
5. Na mungo mbeti na azo, ye nyen e zia na gbele e?
5 Zia e sala kusala nzoni na ambeti ti aChrétien ti mû maboko na “azo kue,” atâa yanga ti kodoro ti ala, ti ‘hinga tene-biani na ti wara salut.’—1 Tim. 2:3, 4.