E sara kusala nzoni na ambeti ti e
1, 2. Azo mingi ayeke bâ ambeti ti e tongana nyen? Na ye so aga na hundango tënë wa?
1 Mbeni koli asû mbeti na kota ndokua ti aTémoin ti Jéhovah, na yâ ni lo tene: “Ngbene ye na ngu 1965 si mbi yeke diko ambeti ti ala. Mbi zia Bible na tere ni, na mbi bâ so ye kue so ayeke na yâ ti ambeti ni ague legeoko na tënë ti yâ ti Bible ni. Mbi ye lakue ti hinga tâ tënë na ndo Nzapa nga na Jésus, na ti tâ tënë ni ambeti ti ala ni nga na Bible amû atâ kiringo tënë ni.” Na yâ ti oko mbeti ni, lo hunda ti tene a manda Bible na lo.
2 Legeoko tongana koli so afa bê ti kiri singila ti lo, azo kutu mingi na ndo lê sese kue akiri singila ndali ti ambeti so “ngbâa be-ta-zo na ti ndara” asigigi na ni (Mat. 24:45, NW ). Ngu oko oko, a yeke sigigi na gbâ ti ambeti ti mû maboko na azo ti nzoni bê ti ‘hinga tene-biani [wala tâ tënë] mbilimbili.’ (1 Tim. 2:4). Tongana nyen e lingbi ti sara kusala nzoni na ambeti ti e?
3. E lingbi ti sara nyen ti kangbi ambeti ti e kue?
3 Mû ambeti alingbi na ni: Tongana angoi ayeke hon, peut-être ambeti so e mû lani, ambeni mingi angbâ na e sara kusala na ni pëpe. Nyen la e lingbi ti sara ti kangbi apendere mbeti ti e kue? A lingbi e sara ye na ndara na ngoi so e gue ti mû ambeti ti fa na tënë. Ahon ti tene e mû gbani gbani, e lingbi ti mû gi oko wala use, na tongana e kangbi ni kue awe e lingbi ti kiri ti mû ambeni. Ye so ayeke sara si gbâ ti ambeti ayeke ngbâ na yanga-da ti e senge pëpe. Legeoko nga, tongana mo yeke na gbâ ti a-Tour ti Ba Ndo nga na Réveillez-vous! so ade mo kangbi ni pëpe, a yeke duti ande peut-être nzoni ti kiri na wungo ti ambeti so mo yeke mû ka na peko.
4. Tongana mbeni kongregation ayeke na ambeti so angbâ gbani, lo lingbi ti sara nyen?
4 Ambeti so angbâ gbani: Tongana kongregation ayeke na ambeni mbeti so angbâ gbani, ita so ayeke bâ lege ti ambeti alingbi ti bâ wala ambeni kongregation ayeke na bezoin ni. Awafango tënë alingbi ti mû angbene mbeti na azo ti sewa ti ala so ayeke Témoin pëpe, na azo so ala yeke manda Bible na ala nga na ambeni zo nde. Peut-être afini zo so aga na yâ ti kongregation aye ti wara angbene mbeti so ti zia ni na yâ ti bibliothèque ti ala.
5. Tongana nyen e lingbi ti fa so e yeke bâ ambeti ti e na nene ni?
5 A sigigi na ambeti so ti mû maboko na azo ti nzoni bê ti manda ye mingi na ndo ti apendere ye so Jéhovah aye ti sara. Na e ye ti sara kusala na ambeti so alingbi na ni. Lani, tongana Jésus amû kobe na azo gbani gbani, lo ro tanga ti kobe so angbâ. E nga kue, e ye ti sara kusala nzoni mingi na apendere mbeti so a yeke sigigi na ni (Jean 6:11-13). Ambeti ti e ayeke na atënë so ayeke mû fini na azo so aye sarango ye ti mbilimbili. Tongana e sara kusala na ni kue pëpe, ka a lingbi ti ndu bê ti ala tongana nyen? Tongaso, a lingbi e sara ye na ndara na ngoi so e ye ti mû ambeti ndali ti fango tënë, nga e sara kusala na ni nzoni si a mû maboko na azo.—aPhil. 4:5.