Kusala so adë bê
1 Tokua so ayeke na yâ Bible adë bê ti azo kue so ayeda nga asala ye alingbi na ni na yâ fini ti ala (Ps. 19:8, 9). A mû maboko na ala ti zi tele ti ala na gbe ti afango ye ti wataka, asalango ye so aga na sioni nga amû na ala tâ beku teti gigi ti kekereke. Ye oko, a yeke gi pëpe ala so awara nzo tënë ni si ayeke wara ye ti nzoni dä. Ala kue so akangbi legeoko na ambeni zo atâ tënë ti Bible so adë bê awara nga dengo bê ala mveni.—aPr. 11:25.
2 Fango tënë amû ngangu na ala: Jésus atene lani so ala so aye ti yô joug ti lo na lege ti fä na dutingo adisciple ti lo, so a ndu nga kusala ti fango tënë nga na salango adisciple, ayeke “wara lege ti hu âme ti [ala].” (Mat. 11:29) Lo mveni lo bâ lani so fango tënë ayeke mû ngangu na zo. A yeke tongana kobe teti lo (Jean 4:34). Na ngoi so lo tokua adisciple 70 kozoni ti fa tënë, ala yeke na ngia tongana ala bâ so Jéhovah amû maboko na ala na yâ angangu so ala sala.—Luc 10:17.
3 Legeoko nga laso, aChrétien mingi ayeke wara ngangu na mungo mbage ti ala na kusala ti fango tënë. Mbeni ita-wali atene: “Fango tënë adë bê ngbanga ti so asala si fini ti mbi aluti na ndo mbeni ye oko na ayeke na nda ni. Akpale ti mbi mveni nga aye so asala ngangu na ndo bibe ti zo ti lâ oko oko aga aye so mbi bi bê dä mingi pëpe tongana mbi yeke na fango tënë.” Mbeni wafango tënë nde so ayeke na wâ atene: “Fango tënë . . . asala si Jéhovah aga tâ zo na lê ti mbi lâ na lâ, na amû na mbi siriri na mbeni ngia ti bê so mbi lingbi pëpe ti wara ni na lege ti ambeni ye nde.” So matabisi si e yeke na ni ti duti “afon Nzapa na kusala”!—1 aCor. 3:9.
4 Joug ti Christ ayeke nzoni: Atâa so a wa aChrétien ti “gi lege ngangu,” Jésus ahunda ye pëpe na e ahon ti so e lingbi ti mû (Luc 13:24). Biani, lo tisa e na ndoye ti ‘ga na gbe ti joug ti lo legeoko na lo.’ (Mat. 11:29, NW, kete tënë na gbe ni). Ala so ayeke tiri na ambeni kpale alingbi ti hinga biani so kusala ti ala so ala yeke sala na âme ti ala kue, atâa akatikati ti ala, anzere biani na Nzapa.—Marc 14:6-8; aCol. 3:23.
5 So ye ti dengo bê ti sala na mbeni Nzapa so abâ na nene ni aye kue so e yeke sala teti iri ti lo! (aHéb. 6:10). Zia e sala ngangu lakue ti mû na lo ye ti nzoni kue so e lingbi ti mû.