Zia e bata ndo ti vorongo ti e nzoni

1. Nda ti Da ti Royaume ayeke nyen?

¹ Na ndo sese kue a yeke wara akongregation ti aTémoin ti Jéhovah so wungo ni ahon 94 000. Mingi ti akongregation ayeke bungbi ti manda Bible nga ti sala songo ti Chrétien na yâ Da ti Royaume, so ayeke ndo ti vorongo so ayeke na sioni oko pëpe.

2. Ngbanga ti nyen a yeke kota ye ti tene a bata Da ti Royaume si aduti na saleté pëpe nga nzoni na lê ti azo?

² Kapa ti lekengo ndo lakue: Kusala ti lekengo Da ti Royaume si aduti na saleté pëpe ayeke kota mbage ti kusala ti e ti nzoni-kue. Na lembeti 61, buku Notre Ministère atene: “A lingbi aita abâ tongana mbeni matabisi gi pëpe lege so azi na ala ti mû maboko na Da ti Royaume ni na lege ti nginza, me mungo tele ti ala mveni na nzobe na yâ akusala so alingbi ti sala si Da ti Royaume ni angbâ nzoni, aduti na saleté pëpe, nga nzoni na lê ti zo. Na yâ ni nga na gigi ni, a lingbi Da ti Royaume aduti mbeni ye so amû gonda na iri ti bungbi ti Jéhovah.” Teti so na yâ ti yenga oko oko a yeke sala kusala mingi na Da ti Royaume, a hunda ti leke ni si aduti na saleté pëpe nga a bata ni nzoni. Mingi ni a yeke (a)kongregation so ayeke bungbi na yâ Da ti Royaume ni si ayeke bâ lege ti atënë so. Legeoko tongana ti angoi so asû na Bible, laso a lingbi awakua ti Jéhovah amû tele ti ala na bê kue “ti leke” ndo ti vorongo ti e.​—2 Chron. 34:10.

3. Tongana nyen a yeke leke programme ti lekengo ndo na Da ti Royaume, nga azo wa alingbi ti mû mbage ti ala na kusala so?

³ A lingbi a zia na tableau ti ambeti programme ti lekengo ndo na Da ti Royaume yenga oko oko. A lingbi agroupe ti mandango buku kue achangé tele na yâ lekengo da ni yenga oko oko, na mungo peko ti molongo ti akusala so a fa ti sala. A yeke kota ye ti tene azo kue so ye akanga lege na ala pëpe amû mbage, yenga oko oko, na matabisi ti lekengo Da ti Royaume si aduti na saleté pëpe nga nzoni na lê ti azo. Amolenge alingbi ti mû mbage ti ala na kusala so, na gbe ti bango ndo ti ababâ na mama. Na lege so, ababâ na mama ayeke fa na ala ti bâ na nene ni matabisi so. Tongana akongregation mingi ayeke sala kusala na mbeni Da ti Royaume, a yeke ge si nzoni salango kusala maboko na maboko ayeke kota ye ti tene kota mbage ti kusala ti e ti vorongo so aduti pëpe gi na ndo ti go ti ambeni zo.

4. Ti tene kongregation ahinga ye wa si alingbi ti sala na ngoi ti lekengo ndo na Da ti Royaume a lingbi a sala nyen?

⁴ Tongana lege ayeke dä, a lingbi ti zia na ndo so ayeke bata agbakuru ti kusala ni dä mbeti so molongo ti akusala so a fa ti sala ayeke na ndo ni. A lingbi a wara na yâ molongo so akusala ti sala yenga oko oko, so andu balengo ndo, sukulango afenêtre, tukungo azende, sukulango yâ ti da ni. Ambeni kusala ayeke dä so alingbi ti sala ni lakue lakue pëpe: akusala tongana zingo poussière nzoni na ndo ti aye ti duti nga ti sukula nzoni arideau nga na a-ampoule ti wâ wala alampe. A lingbi abata savon, omo nga na ambeni ye ti sukulango na yâ ti da ni na mbeni ndo so amolenge alingbi ti si dä pëpe, nga a sala mbeti polele na tele ni. Nga a lingbi a fa na ndulu tënë tongana nyen ti sala kusala na aye ni so.

5. Na lege wa kpengo ti tene azo awara akpale na Da ti Royaume ayeke kota ye, nga aye wa alingbi a bâ ni ngoi na ngoi? (Bâ encadré ti lembeti 4).

⁵ Ti tene azo awara kpale pëpe na Da ti Royaume ayeke kota ye mingi (Deut. 22:8). Na ndo tënë so, encadré so ayeke na lembeti 4 afa ambeni molongo ti aye so ayeke kota ye ti bâ ni ngoi na ngoi si alingbi ti kanga lege na andao.

6. A yeke bâ lege ti kusala ti batango Da ti Royaume tongana nyen?

⁶ E bata Da ti Royaume ni nzoni: Bungbi ti a-ancien ayeke na kungba ti bâ ndo na ndo batango Da ti Royaume ni. Mingi ni, a yeke soro mbeni ancien wala serviteur ti mungo maboko ti bâ lege ti kusala ni. Lo yeke leke akusala ti lâ oko oko ti Da ti Royaume ni, na bango si a bata ni na saleté pëpe, nzoni, nga si aye ti kusala ni aduti dä lakue. A yeke kota ye ti tene mbeni ye so alingbi ti sala sioni na zo aduti pëpe na yâ ti da ni wala na ando so angoro ni. Tongana akongregation use wala mingi si ayeke sala kusala na yâ ti Da ti Royaume oko, abungbi ti a-ancien ayeke leke mbeni komite ti kusala so ayeke bâ lege ti da ni nga na aye ti da ni. Komite ni ayeke sala kusala na gbe ti abungbi ti a-ancien.

7. (a) Ye wa a yeke sala ni ngu oko oko si a bata Da ti Royaume ni nzoni? (b) Aye wa a hunda ti bi lê dä ngoi na ngoi? (Bâ encadré ti lembeti 5).

⁷ Ngu oko oko a yeke bâ nzoni anzene nzene ye ti Da ti Royaume ni. A-ancien ayeke na kungba ti leke si a bâ mbilimbili lege ti ambeni ye so ahunda ti bi lê dä. A lingbi ti tisa awafango tënë ti mû maboko na yâ aye so a hunda ti leke ni. A lingbi azo kue aduti ndulu ti leke même anzene nzene ye so abuba nga ti bâ lege ti aye so a hunda ti bi lê dä. Na ngoi ti vizite ti ala, asurveillant so ague na ndo nde nde alingbi ti gboto lê ti a-ancien na ndo kusala ti batango Da ti Royaume so a lingbi abâ lege ni hio.

8. Na ngoi wa a-ancien alingbi ti bâ Biröo ti Lekengo aDa ti Royaume ti filiale ti kodoro ni?

⁸ Tongana a-ancien abâ so ala yeke na bezoin ti mbeni wango wala mbeni mungo maboko si ala bata na Da ti Royaume ni, ala lingbi ti bâ Biröo ti Lekengo aDa ti Royaume ti filiale ti kodoro ni. A lingbi ti sala ye so gi tongana ahunda kota gbiango ye wala kota lekengo ye na tele ti Da ti Royaume ni. A yeke aye tongana sonorisation, peinture, li ti da ni, nga na ambeni ye. Kongregation alingbi ti bâ lege ti aye so andu akete lekengo ye nga na agbiango ye. Ye oko, a-ancien alingbi lakue ti hunda ambeni tënë na biröo so asala tënë ni na nduzu ge.

9. Kode wa a lingbi a mû pekoni tongana a hunda ti mû na kua mbeni wakode-kua?

⁹ E sala kusala na ndara na anginza ti kongregation: Mingi ni ayeke azo so amû ala mveni na nzobe si ayeke sala kusala na tele ti Da ti Royaume ni nga na ando so angoro ni. Angangu so ala sala ti gbanzi ye na tele ti ala ayeke pendere fä ti ndoye nga na kota mungo maboko na yâ kiringo na peko wungo ti nginza so a lingbi fade ti sala na kusala. Tongana a hunda ti mû na kua mbeni wakode-kua ti bâ lege ti ambeni kusala, tongana fango akete kete nyama tongana angungu, kua ti kpakango keke wala kua ti maçon, a-ancien ayeke gi zo so ahunda nginza mingi pëpe. Kozoni kue ala yeke sû na mbeti anzene nzene kusala so ayeke sala ande nga na agbakuru so ayeke vo ande ni. A yeke mû mbeti ni na azo nde nde so alingbi ti sala kua ni wala ti kä agbakuru ni so, si ala kue afa ngele so alingbi na oko molongo ti aye so ahunda na ala. Tongana ala wara awe ngele so azo ni afa na ndo mbeti, a-ancien alingbi ti soro zo so ahunda nginza mingi pëpe. A lingbi a sala ye alingbi na kode so atâa tongana mbeni ita si ahunda ti sala kusala ni, wala ti kä agbakuru so a hunda na mbeni mbilimbili ngele.

10. A yeke sala nyen ti bata si a sala kusala na lege ni na anginza ti kongregation?

¹⁰ Tongana akongregation mingi asala kusala na Da ti Royaume ni, komite ti batango Da ti Royaume ayeke bata mbeni nginza nde, nga nze oko oko lo yeke mû na abungbi ti a-ancien oko oko atondo so asû na mbeti na ndo ti nginza so, na lege so a-ancien ayeke hinga lege so a sala kusala na anginza ni. A-ancien ayeke na kungba ti bâ si a sala kusala na lege ni na anginza ti kongregation.

11. A lingbi a sala nyen tongana a hunda kota gbiango ye wala ti kiri ti leke da ni?

¹¹ Ti sala akota gbiango ye nga ti kiri ti leke da ni: Tongana komite ti batango Da ti Royaume abâ so ambeni kota ye ayeke dä so andu tambelango ti Da ti Royaume ni wala batango ni, komite ni ayeke sala tënë ti ye ni na abungbi ti a-ancien ti wara fango lege. Tongana a bâ so a hunda mbeni kota gbiango ye na tele ti da ni wala ti kiri ti leke ni, wala a hunda ti wara mungo maboko so alondo na gigi ti akongregation so ayeke sala bungbi na Da ti Royaume so, a-ancien ayeke sala tënë ni na Biröo ti Lekengo aDa ti Royaume ti filiale ti kodoro ni. Aita ti biröo so alingbi, na so ahinga kusala ni nzoni, ayeke mû awango ti mû maboko nga ala yeke bâ ndo na ndo tambelango ti kusala ni. Tongana a hunda ti futa nginza mingi, a yeke nzoni a wara tâ wungo ti nginza ni nga a leke mbeni mungo yanga teti kongregation ti yeda na ni​—Bâ Kusala ti Royaume ti avril 1994 teti Cameroun, Atënë so i hunda.

¹² E bâ biani na nene ni mingi matabisi ti e ti bungbi legeoko na yâ Da ti Royaume! E ye lâ oko pëpe ti bâ abungbi ti e tongana ye senge. E kue e lingbi ti sala si abungbi ti e atambela nzoni si akpengba e, na mungo mbage ti e kue ti bâ lege ti Da ti Royaume ti e. Ye so ayeke mû gonda na vorongo so ayeke nzoni kue nga ayekia iri ti Jéhovah. Zia e leke na bê ti bata ndo ti vorongo ti e nzoni.

12. Na lege wa e lingbi ti fa bê ti kiri singila ti e teti matabisi ti guengo na abungbi na Da ti Royaume?

[Encadré na lembeti 4]

Aye so a lingbi a bâ

◻ A lingbi ayanga-da nga na a-escalier aduti nzoni, wâ aza dä nzoni nga zo alingbi ti wara kpale ti hon dä pëpe.

◻ A lingbi ndo so ayeke bata agbakuru dä nga na akabine aduti na saleté pëpe, na lege ni, nga azia aye so amû wâ hio, aye ti zo mveni nga na azende dä pëpe.

◻ A lingbi a bâ na a lungula lakue asaleté na li ti da ni nga na ambeni ye nde.

◻ A lingbi lumière aza na ndo so azo ayeke tambela dä nga na ndo so akutukutu aluti dä. Zia si ambeni ye so asala si zo alingbi ti tï aduti dä pëpe.

◻ A lingbi a bâ nga a bata nzoni aye ti wâ ti dada nga na amasini ti tokuango pupu.

◻ Tongana li ti da ni ayuru, a lingbi a leke ni hio si ambeni ye abuba pëpe.

◻ A lingbi a kanga yanga-da tongana zo ayeke dä pëpe.

[Encadré na lembeti 5]

Bango lege ti da ni nga na aye ti da ni

◻ Na gigi: Tele ti li ti da ni, peinture ni, afenêtre ni nga na pancarte so azia na yanga ti lege ayeke nzoni?

◻ Aye so angoro da ni: A bata aye so angoro da ni nzoni? Ndo so azo ayeke tambela dä, gbagba ni nga na ndo so akutukutu aluti dä ayeke nzoni?

◻ Yâ ni: Sese ni, arideau, angende, aye ti wâ ti dada nga na aye ti ngu, peinture ti tele ti mur na ti abanc ayeke nzoni? Ando so ayeke bata ambeti nga na aye ti sonorisation dä ayeke na lege ni?

◻ Agbakuru: Lumière, aye ti sonorisation nga na amasini ti tokuango pupu ayeke tambela nzoni?

◻ Aye ti kabine: A yeke na saleté pëpe nga nzoni?

◻ Ambeti ti kongregation: A yeke futa nga a yeke bata a-facture ti wâ nga na ti ngu nzoni?