Amaseka: I leke mbeni nzo gere teti kekereke ti i
1. Ngbanga ti nyen a yeke kota ye teti amaseka Chrétien ti wara kpengba mabe?
1 Nyen la ayeke na kozo ndo na yâ bibe ti mo? Bê ti mo ayeke na ndo ti nyen? Akozo bibe ti mo ayeke ngoro na tele ti aye ti laso, wala ala yeke na ndo gigi ti kekereke nga na aye so Nzapa amû zendo ni? (Mat. 6:24, 31-33; Luc 8:14). Ti sala ye alingbi na azendo ti Nzapa, a yeke kota ye ti duti na kpengba mabe, tongana ti so a lingbi ti bâ ni na lege ti tapande ti Abraham na Moïse (aHéb. 11:8-10, 24-26). Tongana nyen mo lingbi ti wara mara ti mabe tongaso na ti leke “nzo gere teti [kekereke, NW ]”?—1 Tim. 6:19.
2. E manda nyen na lege ti tapande ti Gbia Josias?
2 Gi Jéhovah: Tongana mo yeke mû mbage lakue na kusala ti yingo legeoko na sewa ti mo, so ayeke nzoni. Me tene na bê ti mo pëpe so mara ti salango ye lakue tongaso ayeke sala si kpengba mabe aga gi tongaso na bê ti lo. Ti wara “tâ hingango ye ti Nzapa”, a lingbi mo mveni mo gi Jéhovah (aProv. 2:3-5, NW; 1 Chron. 28:9). Maseka Gbia Josias asala tongaso. Atâa so lo kono na mbeni ndo so aye ti yingo ayeke dä pëpe, “lo komanse ti gi Nzapa ti kotara ti lo David” tongana lo yeke na ngu 15.—2 Chron. 34:3.
3. Tongana nyen laso amaseka Chrétien alingbi ti gi Jéhovah?
3 Tongana nyen mo lingbi ti gi Jéhovah? Na gingo nzoni nda ti ye so mo mä na bê dä, nga na ‘hingango mo mveni’ so ye ni ayeke biani tâ ye (aRom. 12:2). Na tapande, mo lingbi ti fa nda ti ye so Bible atene na ndo mênë, wala ti fa polele so Royaume ti Nzapa ato nda ti komande na yayu na ngu 1914? Warango “tâ hingango ye ti tâ tënë” ayeke mbeni kota mbage ti lekengo mbeni nzo gere teti kekereke.—1 Tim. 2:3, 4, NW.
4. Tongana nyen awafango tënë so ade ti wara batême pëpe alingbi ti sala si a bâ guengo na li ni ti ala?
4 Aye ti nzoni aga na peko ti so Josias agi Nzapa. Kozoni si lo wara ngu 20, lo sala kusala na mbito pëpe ti lungula vorongo ti wataka na yâ kodoro ni (2 Chron. 34:3-7). Legeoko nga, guengo na li ni ti mo na lege ti yingo ayeke sigigi ande polele na lege ti akusala ti mo (1 Tim. 4:15). Tongana mo yeke wafango tënë so ade ti wara batême pëpe, tara ti leke si kode ti fango tënë ti mo aga nzoni ahon ti kozo. Ngbâ gi na kusala ti kangbingo mbeti pëpe. Zia na gbele mo ti sala kusala na Bible, ti fa nda ti tënë na azo, nga ti kiri ti kono nzara ti azo so mo wara ala (aRom. 12:7). Ye so ayeke mû maboko na mo ti gue na li ni na lege ti yingo.
5. Alege wa azi na aChrétien so awara batême awe ti kono yâ ti kusala ti ala?
5 Mû na Jéhovah ye ti mo ti nzoni-kue: Na ngoi so mo fa mungo tele ti mo na Nzapa na lege ti batême, mo ga mbeni zo so a hiri lo ti ga wakua ti Nzapa (2 aCor. 3:5, 6). Ye so azi lege na mo ti sala na Jéhovah na ngoi kue. So andu nga akusala ti pionnier, ti Béthelite, ti missionnaire, nga na ti lekengo aDa ti Royaume na kodoro wande. Na ndo ni, mo lingbi ti kono yâ ti kusala ti mo na mandango mbeni yanga ti kodoro nde, wala ti gue ti sala kusala na ndo so a hunda awakua dä mingi.
6. Tongana nyen e kue e lingbi ti leke mbeni nzo gere teti kekereke?
6 Biani, a yeke azo kue pëpe si alingbi ti mû mbage na amatabisi ti kusala so, me e oko oko kue e lingbi ti mû na Jéhovah ye ti e ti nzoni-kue (Mat. 22:37). Atâa dutingo ti mo ayeke tongana nyen, zia si salango na Jéhovah aduti ye so mo zia na gbele mo na yâ fini ti mo (Ps. 16:5). Na salango tongaso, fade mo yeke leke mbeni nzo gere teti kekereke.