Gondango ndo adë bê ti zo
1 Kete molenge-wali ni atï na kota toto na ngoi so lo gue ti lango na tenengo: “Mbi sala ye ti nzoni laso pëpe?” Hundango tënë so adö bê ti mama ni mingi. Atâa so lo bâ so kete molenge ti lo ti wali asala ngangu mingi ti sala ye kue nzoni, mama ni apensé pëpe ti tene kamême mbeni kete tënë ti gonda. Angule ti kete molenge-wali so alingbi ti dabe ti e so e kue, maseka nga na mbakoro, e ye ti wara gondango ndo. Mo yeke dë bê ti ala so ayeke ndulu na mo na gondango ala teti nzoni so ala yeke sala?—aProv. 25:11.
2 Salango ye ti amba ti e Chrétien ayeke mû na e anzoni nda ti tënë mingi ti gonda ala. A-ancien, aserviteur ti mungo maboko nga na apionnier ayeke sala kusala ngangu ti yô akungba ti ala na lege ni (1 Tim. 4:10; 5:17). Ababâ na mama so akpe mbito ti Nzapa ayeke sala ngangu ti ala kue ti bata amolenge ti ala na yâ alege ti Jéhovah (aEph. 6:4). Amaseka Chrétien ayeke tiri ngangu ti ke “yingo ti sese so”. (1 aCor. 2:12; aEph. 2:1-3). Ambeni nde ayeke sala na Jéhovah be-ta-zo atâa so ngu ti ala ahon mingi, ala yeke na akpale ti seni wala ambeni tara nde (2 aCor. 12:7). Mara ti azo so kue alingbi na gondango ndo. E fa na ala so angangu so ala yeke sala alingbi na gonda?
3 Gonda zo ni mveni na fa nda ni na lo: E kue e yeke tâ na ngia mingi na mango gondango ndo so a tene ni na kongregation kue. Ye oko, gondango ndo ayeke dë bê mingi tongana a tene ni na e mveni. Na tapande, na yâ chapitre 16 ti mbeti so lo tokua na aChrétien ti Rome, Paul agonda ambeni zo polele, so na popo ti ala e yeke wara Phoebé, Prisca na Aquilas, Tryphène na Tryphose, Perside (aRom. 16:1-4, 12). Atënë ti lo alingbi biani ti dë bê ti abe-ta-zo so! Mara ti gondango ndo tongaso ayeke dë bê ti aita ti e so e yeke na bezoin ti ala na ayeke sala si e ga ndulu mingi na mba. Mo mû gondango ndo polele na mbeni zo awe ade ti ninga pëpe?—aEph. 4:29.
4 Gondango ndo so alondo na bê: Ti tene a duti biani ye ti dengo bê, a lingbi gondango ndo ni aduti ye so a tene ni na bê kue. Azo alingbi ti hinga wala e yeke sala tënë so alondo na bê wala e yeke ‘gonda azo na handa na menga ti e.’ (aProv. 28:23). Tongana e fa lege na e mveni ti bâ ye ti nzoni so ayeke na mbage ti ambeni zo, a yeke ndu bê ti e na a yeke pusu e ande ti gonda ala. Zia e gbanzi tele ti e pëpe ti mû tâ gondango ndo, na hingango so “tënë so zo atene na tâ l’heure ni, ayeke nzoni mingi!”—aProv. 15:23.