‘Tënë so zo atene na l’heure ni ayeke nzoni mingi!’

NA NGOI ti mbeni Kota Bungbi ti Lango Oko ti aTémoin ti Jéhovah, Kim asara kue ti mä tënë nzoni na ti mû note. Na oko ngoi ni, lo sara ngangu ti tene molenge ti lo ti wali ti ngu use na ndambo aduti kpô. Na nda ti kapa ni, mbeni ita-wali so aduti banc oko na Kim agonda lo na koli ti lo teti so ala bâ lege ti molenge ni na ngoi ti bungbi ni. Gondango ndo so andu bê ti Kim ngangu; laso, ngu mingi na pekoni, Kim atene: “Tongana mbi bâ so mbi nze mingi na ngoi ti abungbi, mbi yeke dabe ti mbi na tënë ti ita-wali so. Anzoni tënë so lani lo tene na mbi angbâ ti pusu mbi ti fa lege lakue na molenge ti e ti wali.” Biani, tënë so a tene na tâ ngoi ni alingbi ti mû ngangu na zo. Bible atene: “Tënë so zo atene na tâ l’heure ni, ayeke nzoni mingi!”​—aProverbe 15:23.

Ye oko, a lingbi ti duti ngangu na ambeni zo na popo ti e ti gonda amba ti ala. Ngoi na ngoi, ti bâ tere ti e so e lingbi pëpe alingbi ti sara si a duti ngangu na e ti gonda mbeni zo. Mbeni ita-koli atene: “Ti mbi, gondango ndo ayeke tongana ti so mo luti na ndo mbeni sese so awoko. Mingi tongana mbi gonda zo, mingi mbi yeke bâ so nengo ti mbi akiri na peko.” Aye tongana kamene, bango tere ti mo so mo ne pëpe wala mbeto ti tene azo amä yâ ti gondango ndo ti mo ni pëpe alingbi nga ti kanga lege na e ti gonda mbeni zo. Na ndo ni, tongana a gonda e pëpe wala mingi pëpe na ngoi so e yeke kono, a lingbi ti duti ngangu na e ti gonda amba ti e.

Ye oko, ti hinga so gondango ndo alingbi ti sara nzoni na zo so amû ni nga na zo a gonda lo alingbi ti pusu e ti sara kue ti gonda zo na tâ ngoi ni (aProverbe 3:27). Tongaso, aye ti nzoni wa ayeke ga na peko ti gondango zo? Zia e bâ ambeni.

Anzoni ye ti pekoni

Gondango zo na tâ ngoi ni alingbi ti zi mbeto na yâ ti lo. Mbeni ita-wali so iri lo ayeke Elaine atene: “Tongana azo agonda mbi, mbi bâ so ala zia bê ti ala kue na mbi.” Biani, ti gonda mbeni zo so ayeke na mbeto alingbi ti mû na lo ngangu ti tiri na akpale, na ti wara ngia na pekoni. A yeke mbilimbili amaseka si ayeke wara nzoni na lege ti gondango ndo so alingbi. Mbeni maseka so asioni pensé asara si bê ti lo anze atene: “Mbi yeke sara ngangu lakue ti nzere na Jéhovah, me ngoi na ngoi mbi bâ so atâa nyen la mbi sara, a yeke nzoni kue pëpe. Tongana mbeni zo agonda mbi, bê ti mbi anzere ngangu.” Mato ti Mbeti ti Nzapa so ayeke tâ tënë: “Tënë so zo atene so alingbi na lege ni, a yeke legeoko tongana ye ti lor na ndo ye ti argent.”​—aProverbe 25:11.

Gondango zo alingbi ti pusu lo ti sara ye na ti kpengba lo. Mbeni wafango tënë ti ngoi kue atene: “Gondango ndo apusu mbi ti sara kua ngangu na ti leke kode ti fango tënë ti mbi si aga nzoni ahon ti kozo.” Mbeni mama ti amolenge use atene so tongana azo ti kongregation agonda amolenge ti lo teti kiringo tënë ti ala na abungbi, a yeke pusu ala ti kiri tënë mingi ahon ti kozo. Biani, gondango ndo alingbi ti pusu amaseka ti gue na li ni na lege ti yingo. Ti tâ tënë ni, e kue e ye ti tene a fa na e biani so a bâ e na nene ni. Sese so akpale ahon ndo ni alingbi ti sara si e woko na bê ti e anze kue. Mbeni ancien atene: “Ngoi na ngoi tongana bê ti mbi anze, gondango ndo ayeke tongana kiringo tënë na asambela ti mbi.” Elaine nga atene: “Na ambeni ngoi, mbi bâ so Jéhovah afa so lo yeda na mbi na lege ti atënë so aita atene na mbi.”

Tongana amba ti e agonda e, a fa so e yeke nduru na mba. Tâ gondango ndo afa so e yeke bi bê na mba na asara si ndoye, nzoni duti na tënë ti yekiango zo aduti na popo ti e. A yeke fa biani so e ye amba ti e aChrétien na e bâ ala na nene ni. Josie, so ayeke mama, atene: “Kozo, mbi yeke na yâ ti sewa so azo ni asara nzapa nde nde na a lingbi mbi gbu lani tâ tënë ngangu. Na ngoi ni so, gondango ndo ti aita biazo na lege ti yingo akpengba mbi ti kiri na peko pëpe.” Biani, “e oko oko kue ayeke amembre ti ambeni.”​—aEphésien 4:25.

Ti duti na nzara ti gonda zo amû maboko na e ti bâ nzoye so ayeke na yâ amba ti e. E yeke bâ gi anzoni sarango ye ti amba ti e, me awokongo ti ala pëpe. Mbeni ancien so iri ti lo ayeke David atene: “Ti duti nduru ti kiri singila teti aye so amba ti e asara ayeke mû ande maboko na e ti gonda ala fani mingi.” Ti dabe ti e na lege so Jéhovah na Molenge ti lo ayeke nduru ti tene nzoni tënë ti azo so ayeke awasiokpari ayeke pusu ande e ti sara tongaso na amba ti e.​—Matthieu 25:21-23; 1 aCorinthien 4:5.

Azo so alingbi na ni

Teti so lo yeke Wasarango ye, Jéhovah Nzapa ayeke kozo zo ti lingbi na gonda na popo ti azo so alingbi na ni (Apocalypse 4:11). Atâa so Jéhovah ayeke pëpe na bezoin ti tene e sara si lo bâ tere ti lo so lo lingbi wala ti pusu lo ti sara ye, tongana e gonda kota ti lo na nzobe ti lo, lo yeke ga nduru na e na e yeke lë songo na lo. Gondango Nzapa amû maboko na e nga ti bâ na lege ni nga na tâ be-ti-molenge aye so e mveni e sara na ti bâ Jéhovah tongana lo so asara si aye so e sara aga nzoni (Jérémie 9:23, 24). Jéhovah amû na azo kue so alingbi lege ti wara fini ti lakue lakue, na so ayeke mbeni tënë nde so alingbi ti pusu zo ti sepela lo (Apocalypse 21:3, 4). Gbia David ayeke lani na nzara ti “sepela iri ti Nzapa” na ti ‘sara si iri ti Lo aga kota, na lege ti mungo merci’. (Psaume 69:31). Zia si nzara ti bê ti e aduti nga tongaso!

Amba ti e so e na ala e yeke voro Nzapa legeoko alingbi na tâ gondango ndo. Tongana e gonda ala, e sara ye alingbi na ndia ti Nzapa so ahunda ti “bi bê ti e na ambeni zo na popo ti e ti wa ala si ala ndoye azo, na ala sara kusala nzoni”. (aHébreu 10:24). Zo so azia na e tapande na ndo tënë so ayeke bazengele Paul. Lo sû mbeti na kongregation ti Rome, lo tene: “Kozoni, mbi mû merci na Nzapa ti mbi teti i kue na lege ti Jésus Christ, teti tënë ti mabe ti i awu na sese kue.” (aRomain 1:8). Bazengele Jean nga agonda ita ti lo ti yingo Gaïus teti pendere tapande ti lo ti “tambela na lege ti tene-biani.”​—3 Jean 1-4.

Laso, tongana mbeni mba ti e Chrétien ayeke sara ye nzoni tongana ti so Christ asara ândö, lo sara mbeni nzoni devoir wala lo kiri tënë so alondo tâ na bê ti lo na bungbi, so a yeke mbeni lege so azi na e ti gonda lo. Wala tongana mbeni molenge ayeke sara kue ti wara aversê so a fa na ngoi ti abungbi, e lingbi ti gonda lo. Elaine, so e sara tënë ti lo fade, atene: “Akode ti e ti sara ye ayeke nde nde. Na gingo ti bâ ye so mbeni zo asara, e yeke fa singila ti e teti akode nde nde so ayeke na popo ti azo ti Nzapa.”

Na yâ sewa

Ka ti gonda azo ti sewa ti e ayeke tongana nyen? A hunda ngoi, ti sara ngangu na ti bi bê na ndoye na mbeni koli nga na wali ti lo ti mû maboko na sewa ti ala na lege ti yingo, na lege ti bibe nga na lege ti mitele. Koli na wali ayeke biani na bezoin ti gonda mba nga ti tene amolenge ti ala agonda ala (aEphésien 5:33). Na tapande, na ndo wali so alingbi, Mbeti ti Nzapa atene: “Amolenge ti lo alondo, ala di iri ti lo, wali so ayeke na ngia, na koli ti lo nga asepela lo.”​—aProverbe 31:10, 28.

Amolenge nga alingbi na gonda. Mawa ni ayeke so, ambeni babâ na mama ayeke nduru ti fa na amolenge ye so ala yeke ku na mbage ti ala, me a yeke ngangu na ala ti gonda amolenge ni teti ngangu so ala sara ti kpe zo na ti mä yanga (Luc 3:22). Tongana a gonda amolenge hio na ngoi so ala de kete, a yeke sara si ala bâ so a ye ala nga a bata ala nzoni.

Biani, a hunda ti sara ngangu ti gonda amba ti e, me e yeke wara aye ti nzoni na sarango ni. Ti tâ tënë ni, tongana e yeke sara kue ti gonda azo so alingbi na ni, fade ngia ti e ayeke duti kota mingi.​—Kusala 20:35.

Gonda azo na yeda na ti ala na nzoni bibe

Ye oko, gondango ndo alingbi ti duti tara teti ambeni zo (aProverbe 27:21). Na tapande, a lingbi ti sara si azo so ayeke na bibe ti baba apensé so ala yeke kota ahon amba ti ala (aProverbe 16:18). Ni la, a yeke nzoni ti sara ye na hange. Wango so bazengele Paul amû lani alingbi biani, lo tene: “Mbi tene na i oko oko kue, i bi bê ti i pëpe ti tene i yeke kota; me i bi bê ti i na lege ni, alingbi na mabe so Nzapa amû na azo oko oko kue.” (aRomain 12:3). Ti mû maboko na azo ti kpe gbanda so ayeke ti bi bê na ala mveni ahon ndo ni, lege ti ndara ayeke ti gboto lê na ndo hingango ye wala pendere ti azo ni pëpe. Nde na so, a yeke nzoni e gonda anzoni ye so ala sara.

Tongana e gonda azo na e yeda na gondango ndo ti ala na nzoni bibe, a lingbi ti sara nzoni na e. Ye so alingbi ti pusu e ti bâ so a yeke Jéhovah si ayeke na gunda ti anzoye kue so e sara. Gondango ndo alingbi nga ti pusu e ti sara ye lakue nzoni.

Agondango ndo so alondo na bê na so alingbi biani ayeke mbeni nzoni matabisi so e kue e lingbi ti mû. Tongana e gonda mbeni zo nzoni, peut-être a yeke sara nzoni mingi na lo ahon ti so e pensé fade.

[Encadré/Foto na lembeti 18]

Mbeni lettre so andu bê ti lo

Mbeni surveillant so ayeke gue na ndo nde nde angbâ ti dabe ti lo na mbeni ngoi so lo na wali ti lo akiri na yanga-da na peko ti fango tënë na mbeni lango so dê asara lani mingi. Lo tene: “Dê asara lani wali ti mbi nga bê ti lo anze, na lo tene na mbi so lo lingbi pëpe ti ngbâ ti sara kusala ni. Lo tene: ‘A yeke duti fade nzoni mingi tongana e sara kusala ti ngoi kue na yâ ti mbeni kongregation, e duti place oko nga e mveni e manda Mbeti ti Nzapa na azo.’ Mbi tene mbi yeke mû desizion fadeso pëpe, teti mbi tene na bê mbi so zia e hunzi tanga ti yenga ni awe na fade mbi yeke bâ tënë so lo yeke tene ande. Tongana lo ngbâ ti hunda ti tene e zia kua ti circonscription ni, fade mbi yeke yeda. Gi na oko lango ni, e luti na da ti tokuango alettre na e wara mbeni lettre so biröo atokua tâ gi na wali ti mbi. Na yâ ti lettre ni, a gonda lo mingi teti ngangu so lo yeke sara na yâ kusala ti fango tënë nga na kangango bê ti lo, teti a yeke ngangu mingi ti changé gbogbo lakue yenga na yenga. Gondango ndo ni andu lo ngangu tongaso lo kiri lo zi yanga lâ oko pëpe na ndo ziango kua ti circonscription ni. Nde na so, fani mingi lo wa mbi ti ngbâ na yâ kusala ni na ngoi so mbi pensé ti zia ni.” Ala ngbâ lani na yâ kusala ti circonscription ni ahon ngu 40.

[Foto na lembeti 17]

Zo wa alingbi na gonda na yâ kongregation ti mo?

[Foto na lembeti 19]

Amolenge aye si a bi bê na ala na ndoye na a gonda ala