Tâ beoko ti aChrétien: A yeke wara ni tongana nyen?
1 Ye wa alingbi ti bungbi oko azo ahon kutu omene, so ayeke na yâ akodoro 234 nga so ayeke tene ayanga ti kodoro ndulu na 380? A yeke gi vorongo ti Jéhovah Nzapa (Mi. 2:12; 4:1-3). Na lege ti ye so asi na ala mveni, aTémoin ti Jéhovah ahinga so dutingo beoko ti aChrétien ayeke mbeni tâ ye laso. Tongana ‘kundu oko’ na gbe ti ‘Berger oko’, e leke na bê ti e ti ke bibe ti kangbi ti sese so.—Jean 10:16; aEph. 2:2.
2 Ye so bê ti Nzapa aye, na so alingbi ti lï ngu lâ oko pëpe ayeke ti tene a-ange nga na azo kue aduti beoko na yâ tâ vorongo (Apoc. 5:13). Teti so lo hinga nene ti ye so, Jésus asambela na bê kue teti beoko ti adisciple ti lo (Jean 17:20, 21). Tongana nyen zo oko oko na popo ti e alingbi ti maï beoko ti kongregation ti aChrétien?
3 Tongana nyen a yeke wara beoko?: Tongana Tënë ti Nzapa na yingo ti lo ayeke dä pëpe, aChrétien alingbi pëpe ti duti beoko. Salango ye alingbi na ye so e yeke diko na yâ Bible amû lege na yingo ti Nzapa ti sala kusala nzoni na yâ fini ti e. Ye so amû lege na e ti ‘duti na beoko ti yingo na yâ kamba ti siriri so akanga e oko.’ (aEph. 4:3). A pusu e ti kanga bê na popo ti e na ndoye (aCol. 3:13, 14; 1 Pi. 4:8). Mo yeke maï beoko na gbungo li na ndo Tënë ti Nzapa lâ oko oko?
4 Kusala ti e ti fango tënë na ti salango adisciple abungbi e oko nga. Na ngoi so e yeke fa tënë legeoko na ambeni Chrétien, e yeke “tiri na bê oko teti mabe ti Tene-nzoni”, e yeke ga “afon ala na kusala ti tene-biani.” (aPhil. 1:27; 3 Jean 8). Tongana e sala tongaso, kamba ti ndoye so abungbi e oko na yâ kongregation ayeke kpengba. Ngbanga ti nyen mo tisa pëpe mbeni zo so aninga mo na lo afa tënë pëpe ti sala kusala legeoko na mo na yenga so?
5 So tâ matabisi so e yeke na ni ti duti mbage ti oko tâ sewa ti aita na ndo sese kue laso! (1 Pi. 5:9). Azo saki mingi ayeke bâ na lê ti ala mveni beoko so na ngoi ti a-Assemblée Internationale “Mû gloire na Nzapa”. Zia zo oko oko na popo ti e amû maboko na dutingo beoko ti ngele ngangu so na dikongo Tënë ti Nzapa lâ oko oko, na lekengo na lege ti ndoye akpale so alondo nga na fango nzo tënë na “beoko”.—aRom. 15:6.