Ekole ti Kusala ti aChrétien teti ngu 2004
1 Jéhovah ayeke leke asenge zo ti hunzi kusala so ayeke kota teti sese kue. Mbeni oko ti alege so lo yeke sala ni ayeke fango lege so a yeke mû yenga oko oko na Ekole ti Kusala ti aChrétien. Mo yeke mû mbage ti mo dä kue alingbi na dutingo ti mo? Na janvier 2004, a yeke to nda ti sala kusala na ambeni kete lekengo ye ti mû maboko na a-élève ti wara aye ti nzoni mingi na lege ti alekengo ye so.
2 Gbiango use wamungo wango na peko ti tele: Aita so ayeke mû diskur ti wango nga na angbongboro tënë ti Bible ayeke bâ na nene ni mingi awango so use wamungo wango ni ayeke mû. Na yâ akongregation so ayeke wara kamême dä gbâ ti a-ancien so ayeke na akode so alingbi, lege ayeke dä ti gbian kusala ti use wamungo wango ngu oko oko. Na lege so, a lingbi ti kangbi yâ ti kusala ni; me ahon so, a-ancien na aserviteur ti mungo maboko so alingbi, so ayeke mû diskur ti wango na angbongboro tënë ti Bible, ayeke wara ande ye ti nzoni na lege ti hingango ye ti awamungo wango nde nde so.
3 Lekengo kapa ti lisoro ti dango bê: Tongana kongregation ti mo ayeke na kota bungbi ti circonscription na yâ yenga ti mbeni lisoro ti dango bê, na ngoi ni so, a lingbi a kiri na dango bê ni (nga na tanga ti kapa ti yenga ni) na yenga so ayeke ga na peko ti kota bungbi ni, na a lingbi a mû aye so ayeke na yâ kapa ti yenga so aga na peko ti kota bungbi ni a kiri na ni na yenga ti kota bungbi ni. Ye oko, a hunda pëpe ti gbian aye kue na popo ti ayenga use so tongana lisoro ti dango bê na vizite ti surveillant ti circonscription atï na ngoi oko. Bia, kode ti salango tënë na angbongboro tënë ti Bible ayeke tambela tongana ti so kapa ni afa. Nde na so, a lingbi ti mû diskur ti wango (so a yeke mû ka ni na peko ti kode ti salango tënë) ti yenga ti peko ti kiri na ni na yâ yenga ni so. Na peko ti angbongboro tënë ti Bible, fade a yeke sala Bungbi ti Kusala teti apenze-ngbonga 30. A lingbi ti kangbi yâ ni na ambage ota, so mbage oko oko ayeke na apenze-ngbonga 10, wala na ambage use so mbage oko oko ayeke na apenze-ngbonga 15. (Akete tënë ayeke dä pëpe). Na peko ti bia, a yeke mû ande apenze-ngbonga 30 na surveillant ti circonscription. Na yenga ti peko, Ekole ti Kusala ti aChrétien ayeke to nda ni na kode ti salango tënë na angbongboro tënë ti Bible tongana ti so kapa ni afa, na pekoni a yeke lisoro ti dango bê.
4 Gbu alege oko oko kue so azi na mo ti wara aye ti nzoni teti maïngo ti mo na lege ti yingo. Tongana mo wara ye ti nzoni na lege ti ye so mo manda na Ekole ti Kusala ti aChrétien, mo yeke mû wâ na kongregation ti mo, mo yeke mû mbage na yâ gango tâ tënë ti aprophétie ti Bible na mo yeke mû gonda na Lingu ti pendere tokua so alingbi e fa ni.—Es. 32:3, 4; Apoc. 9:19.