Ndara ti Nzapa ayeke kota mingi
1 Ambeni zo apensé so a lingbi aTémoin ti Jéhovah abata angangu ti ala kozoni kue ti mû maboko na yâ aye so a leke ti kaï kete akpale so azo ayeke luti na gbele ni laso. Mara ti azo tongaso ahinga pëpe nene ti kusala ti e ti fango Bible na azo. A gue oko na ye so bazengele Paul asû lani na mbeti: “Teti tënë ti keke ti [pasi] ayeke tënë ti buba na lê ti ala so ayeke kui; me a yeke ngangu ti Nzapa na lê ti e so ayeke wara salut.” (1 aCor. 1:18). Biani, e hinga so kusala ti fango tënë ayeke kusala so ayeke kota ahon tanga ti akusala kue so a yeke sala laso na ndo sese.
2 Mbeni nzoni fini fadeso: Angangu so azo asala ti leke na akpale ti ala aga na aye mingi pëpe. Andia so azo alu akanga lege pëpe na guengo na li ni ti kengo-ndia. Ambele ti siriri nga na bungbi ti aturugu ti batango siriri asala pëpe si bira ahunzi. Akapa ti kusala so nda ni ayeke ti bâ lege ti nzoni duti ti azo asala pëpe si nzinga ahunzi (Ps. 146:3, 4; Jér. 8:9). Nde na so, tokua ti Royaume asala si fini ti azo kutu mingi agbian, na a mû maboko na ala ti yü zo-ti-fini so ayeke nzoni na lê ti Nzapa (aRom. 12:2; aCol. 3:9, 10). Na salango tongaso, ala wara mbeni fini so ayeke nzoni mingi fadeso.—1 Tim. 4:8.
3 Mbeni pendere gigi teti kekereke: Na ndo mungo maboko na e ti hon ndo ti akpale ti gigi ti laso, ndara ti Nzapa amû maboko na e ti leke ye nzoni teti gigi ti kekereke (Ps. 119:105). A yeke bata e nde na asenge senge ngangu so azo ayeke sala ti leke aye ti fadeso (Zo-ti. 1:15; aRom. 8:20). So bê ti kiri singila si e yeke na ni so e yeke buba fini ti e pëpe na yâ tombango peko ti ye so ayeke tâ ye pëpe! Nde na so, e yeke zia si angangu ti e aluti na ndo zendo ti Jéhovah ti “ayayu ti fini na sese ti fini” so mbilimbili ayeke duti ande na yâ ni. Na ngoi so lâ ti fango ngbanga ti Jéhovah asi, a yeke duti ande polele so ala so azia bê ti ala na ndo ndara ti Nzapa asoro ye tâ na lege ni.—2 Pi. 3:10-13; Ps. 37:34.
4 Na lê ti azo so ayôro tele ti ala ngangu na yâ “ndara ti sese so”, ndara ti Nzapa alingbi ti duti ye so ayeke mû maboko na zo laso pëpe. Me, ti tâ tënë ni, a yeke tâ gi oko nzoni lege ti mû pekoni (1 aCor. 1:21; 2:6-8). Tongaso, zia e ngbâ ti fa na ndo sese kue tokua so alondo na Nzapa, so gi Lo oko ayeke na ndara.—aRom. 16:27.