Mbeni kpengba bira ti azo ti mbarata so andu mo
1, 2. Tongana nyen gango tâ tënë ti suma ti prophétie so a sala tënë ni na Apocalypse 9:13-19 andu awakua ti Nzapa?
1 “Ange omene ni ahulu trompette ti lo.” Na pekoni, “azo ti mbarata” so wungo ti ala ayeke “[saki] bale-use lege [saki] bale-oko” asigigi, na loro ti ala atoto ngangu. So ayeke asenge turugu pëpe. “Li ti ambarata ni ayeke tongana li ti abamara.” Wâ, guru-wa na soufre asigigi na yanga ti ala, na “damba ti ala ayeke tongana angbo”. Bira ti azo ti mbarata na lege ti fä so afuti ye ngangu mingi (Apoc. 9:13-19). Mo hinga tongana nyen gango tâ tënë ti kpengba suma ti prophétie so andu mo?
2 Tanga ti aChrétien so a sa yingo na ndo ti ala nga na amba ti ala ambeni ngasangbaga, na beoko, ayeke fa na azo afango ngbanga ti Nzapa. Ye ti pekoni ayeke so a fa na lê ti azo kuâ ti Chrétienté na lege ti yingo. Zia e bâ aye use na yâ suma ti prophétie so afa ngbanga ti nyen kusala ti awakua ti Nzapa alë lengo tongaso.
3. A fa lege na mo tongana nyen ti fa tokua ti Nzapa nzoni mingi?
3 A fa lege na a mû ye na ala ti fa tokua ti Nzapa: Na lege ti Ekole ti Kusala ti aChrétien nga na ambeni bungbi ti kongregation, a yeke fa lege na awakua ti Nzapa ti fa tokua ti lo na kode. Na mungo tapande ti Jésus nga na ti adisciple ti lo, ala sigigi ti gi azo so alingbi, na fango tënë na ndo kue so ala lingbi ti wara zo dä (Mat. 10:11; Marc 1:16; Luc 4:15; Kus. 20:18-20). Kode ti fango ye so aluti na ndo Bible alë lengo biani!
4. Ye ti kua wa awafango tënë mingi ayeke na ni ti sala na kusala ti ala?
4 Na yâ kusala ti ala so Nzapa amû na ala, aChrétien ayeke kangbi abible, abuku, abrochure nga na apériodique ngbundangbu mingi. Ambeti so asigigi na ayanga ndulu na 400. A sala tënë na ndo ti aye nde nde na a sala kusala na kode so anzere na mara ti azo nde nde kue. Mo yeke sala kusala nzoni mingi na agbakuru so?
5, 6. Ye wa afa so Jéhovah ayeke mû maboko na azo ti lo?
5 Nzapa afa lege na amû maboko: Suma ti prophétie ni afa nga polele so Nzapa ayeke mû maboko na kusala so bira ti azo ti mbarata na lege ti fä aduti tapande ni (Apoc. 9:13-15). A yeke sala kusala ti fango tënë na ndo lê sese kue, pëpe na lege ti ndara wala ngangu ti zo ti mitele, me na lege ti yingo ti Nzapa (Zach. 4:6). Jéhovah ayeke mû a-ange ti fa lege na kusala so (Apoc. 14:6). Tongaso, na ndo ngangu so aTémoin ti lo na sese ayeke sala, Jéhovah ayeke mû maboko ti ga na azo ti be-ti-molenge na mbage ti lo.—Jean 6:45, 65.
6 Teti a fa lege na ala, a leke ala nzoni ti fa tokua ti Nzapa nga ala yeke sala kua na gbe ti fango lege ti a-ange, zo ti luti na gbele ngangu ti azo ti Jéhovah ayeke pëpe. Zia e ngbâ lakue ti sala mbage ti e na yâ gango tâ tënë ti kpengba suma ti prophétie so.