Kobe ti yingo tâ na ngoi ni
1. Tongana nyen Ezéch. 36:29 ayeke ga tâ tënë laso?
1 Seigneur Jéhovah atene: “Fade Mbi hiri le-kobe, na Mbi sala si le-kobe ni awu; fade Mbi zia boma aya na ndo i mbeni pëpe.” (Ezéch. 36:29). Atënë ti prophétie so alingbi na azo ti Nzapa laso. Na lege ti fä, Jéhovah asala si le-kobe so amû ngangu na fini asigigi mingi teti azo ti lo. Kobe ti yingo so a mû tâ na ngoi ni na akota bungbi ti e ti district afa ye so na gigi biani.
2. Tongana nyen Jéhovah amû akota bungbi ti district ti kangbi kobe ti yingo tâ na ngoi ni?
2 Na kota bungbi so a sala na Columbus, Ohio, na ngu 1931, Jéhovah afa lege na awakua ti lo ti yô mbeni fini iri: aTémoin ti Jéhovah (Es. 43:10-12). Na ngu 1935, a fa tâ nda ti azo mingi so asi singo ti Apocalypse 7:9-17. Na ngu 1942, Ita Knorr amû diskur “Siriri: A lingbi ti ninga?” Diskur so atingo wâ na gbe ti kusala ti fango tënë na ndo sese kue nga asala si a leke Ekole ti Galaad ti Mandango Bible ti Société Watchtower. Atâa so ambeni kota bungbi ni angbâ mbilimbili na yâ li ti azo, kota bungbi oko oko ayeke mbeni table ti apendere kobe ti yingo so a kangbi tâ na ngoi ni.—Ps. 23:5; Mat. 24:45.
3. A lingbi e sala ye wa ti wara ye ti nzoni na lege ti kobe ti yingo na kota bungbi ti e ti district?
3 Mo yeke te ye nzoni tongana nyen? Zo alingbi ti duti na gbâ ti akobe me lo lingbi ti te ye nzoni pëpe tongana lo sala ngangu pëpe (aProv. 26:15). A yeke legeoko tongaso na lege ti yingo. Na ambeni kota bungbi, a bâ so azo mingi ayeke tambela wala ayeke sala tënë na azo senge senge na ngoi so bungbi ni ayeke kporo. Kpengba songo ayeke mbeni kota mbage ti kota bungbi ni, me ngoi ni ayeke kozo nga na peko ti bungbi oko oko (Zo-ti. 3:1, 7). Tongana e yeke na ndo ti duti ti e pëpe ti dengi mê nzoni, mbeni kota tënë alingbi ti hon e. Asurveillant so ayeke bâ lege ti kota bungbi ni nga na aita-koli so ayeke na akungba alingbi ti bâ ngoi na ngoi so a lingbi ala sala lisoro na ndo atënë ti kota bungbi ni na ngoi so abungbi ni ayeke tambela. Tongana a yeke ndali ti aye so pëpe, a lingbi ala zia tapande na dengingo mê na programme ni. A lingbi zo oko pëpe na popo ti e amanke mbeni oko mbage ti kobe ti yingo so a mû.—1 aCor. 10:12; aPhil. 2:12.
4. Tongana nyen e lingbi ti fa so e yeke kiri singila teti gbâ ti aye so Jéhovah amû?
4 So ngia si e yeke wara na yâ gbâ ti atâ tënë ti yingo so Jéhovah ayeke mû, nde na atënë ti mabe ti wataka ti Chrétienté so akpengba zo pëpe! (Es. 65:13, 14). Mbeni lege so na yâ ni e lingbi ti “mû merci” ayeke ti bâ kota bungbi ni tongana mbeni lege so Jéhovah ayeke fa ye na e (aCol. 3:15). Bâ pëpe gi ita so ayeke mû diskur ni, me bâ tokua ni tongana ye so alondo na “Maître” ti e (Es. 30:20, 21; 54:13). Dengi mê ngangu. Sû angbongboro tënë ni na mbeti ndulu. Kiri mo bâ akota tënë ni na lakui oko oko. Sala kusala na ye so mo manda.
5. Akota bungbi ti district amû na e anda ti tënë wa ti duti na ngia?
5 Kota bungbi oko oko kue so a sala kozo na Harmaguédon, atâa a sala ni na ndo ti batango aréfugié, na yâ kodoro ti bira wala na yâ mbeni ndo so siriri ayeke dä mingi, ayeke mbeni songo benda na ndo Satan! Teti so e yeke aita so ayeke beoko, e bâ na nene ni alege so e yeke na ni ti bungbi ndo oko na akota bungbi ti district (Ezéch. 36:38). E hinga na bê kue so fade Jéhovah ayeke kiri ti mû na e na lege ti ndoye “kobe . . . na l’heure ni so alingbi.”—Luc 12:42.
[Kete tënë na lembeti 4]
Kiri singila teti table ti Jéhovah
◼ Dengi mê nzoni
◼ Sû angbongboro tënë ni
◼ Kiri mo bâ akota tënë ni na lakui oko oko
◼ Sala kusala na ye so mo manda